सातारा | प्रशांत जगताप, प्रतिनिधी

Maharashtra Character Verification Portal: महाराष्ट्रातील ऑनलाइन चरित्र पडताळणी सेवा ३१ ऑगस्टपासून बंद असल्याने अग्निवीरांसह हजारो उमेदवारांसमोर अडचणी निर्माण झाल्या आहेत.

महाराष्ट्रातील नागरिकांना ऑनलाइन पद्धतीने उपलब्ध करून देण्यात येणारी चरित्र पडताळणीची सेवा ३१ ऑगस्ट २०२६ पासून बंद असल्याने नोकरी, सैन्य भरती आणि विविध शासकीय तसेच खासगी प्रक्रियांसाठी आवश्यक असलेल्या प्रमाणपत्रांकरिता अर्ज करणाऱ्या नागरिकांची मोठी कोंडी झाली आहे. ‘आपले सरकार’च्या माध्यमातून उपलब्ध असलेली ऑनलाइन चरित्र पडताळणी सेवा देणारे pcs.mahaonline.gov.in हे पोर्टल सध्या खुले होत नसल्याने अर्जदारांना ऑनलाइन अर्ज करता येत नाहीत.

विशेषतः आर्मी अग्निवीर भरतीसाठी चरित्र पडताळणी आवश्यक असलेल्या उमेदवारांसमोर मोठे संकट निर्माण झाले आहे. सातारा जिल्ह्यातून सुमारे १५ हजार तरुण आर्मी अग्निवीर भरतीच्या विविध प्रक्रियेत सहभागी होण्यासाठी प्रयत्नशील असल्याचे सांगण्यात येत आहे. अशा परिस्थितीत आवश्यक कागदपत्रांपैकी एक असलेली चरित्र पडताळणी वेळेत उपलब्ध न झाल्यास पात्र असूनही काही उमेदवारांना भरती प्रक्रियेत अडथळ्यांना सामोरे जावे लागू शकते.

हेही वाचा: Asia Cup मध्ये आज ‘करो या मरो’! भारत-बांगलादेशमध्ये फायनलसाठी थरार; सामना कधी, कुठे पाहायचा?

नोकरीच्या संधींवरही परिणाम

खासगी कंपन्या, सुरक्षा सेवा, विविध संस्था तसेच काही शासकीय प्रक्रियांमध्ये उमेदवारांकडून ऑनलाइन चरित्र पडताळणी अहवाल किंवा प्रमाणपत्राची मागणी केली जाते. पोर्टल बंद असल्याने संबंधित उमेदवारांना अर्जाची प्रक्रिया पूर्ण करता येत नसून, काही ठिकाणी चरित्र पडताळणी सादर करण्यासाठीची अंतिम मुदत चुकण्याची भीती निर्माण झाली आहे.

ग्रामीण भागातील अनेक युवक नोकरी किंवा सैन्य भरतीच्या संधीवर अवलंबून आहेत. भरती प्रक्रियेत सहभागी होण्यासाठी त्यांनी आर्थिक खर्च करून कागदपत्रांची पूर्तता केलेली असते. मात्र, शासनाच्या ऑनलाइन प्रणालीतील तांत्रिक अडचणीमुळे जर आवश्यक प्रमाणपत्रच वेळेत मिळाले नाही, तर त्याचा थेट फटका उमेदवारांना बसण्याची शक्यता आहे.

‘पोर्टल बंद’चा फटका अर्जदारांना का?

चरित्र पडताळणीची प्रक्रिया ऑनलाइन केल्याने नागरिकांना पोलीस ठाण्यात वारंवार हेलपाटे मारण्याची गरज कमी झाली होती. अर्ज, कागदपत्रे आणि पडताळणीची प्रक्रिया ऑनलाइन प्रणालीशी जोडण्यात आली आहे. त्यामुळे पोर्टल बंद पडल्यास केवळ ऑनलाइन अर्जाची सुविधा बंद होत नाही, तर त्यावर अवलंबून असलेल्या पुढील प्रशासकीय प्रक्रियांवरही परिणाम होऊ शकतो.
सध्या पोर्टल सुरू करण्याबाबत अथवा सेवा पूर्ववत होण्याबाबत स्पष्ट माहिती उपलब्ध नसल्याने अर्जदारांमध्ये संभ्रमाचे वातावरण आहे. सेवा शासन स्तरावरून बंद असल्यास त्याची अधिकृत माहिती, पर्यायी व्यवस्था आणि सेवा पूर्ववत होण्याची निश्चित कालमर्यादा शासनाने स्पष्ट करणे गरजेचे आहे.

अग्निवीर उमेदवारांसाठी तातडीची पर्यायी व्यवस्था हवी

सातारा जिल्ह्यातील हजारो युवक सैन्यात जाण्याचे स्वप्न घेऊन भरती प्रक्रियेत सहभागी होत आहेत. अशा वेळी तांत्रिक कारणामुळे ऑनलाइन चरित्र पडताळणी रखडल्यास त्यांची संधी हुकण्याची शक्यता नाकारता येत नाही. त्यामुळे आर्मी अग्निवीर भरतीसह ज्या ज्या प्रक्रियेत चरित्र पडताळणी आवश्यक आहे, त्या उमेदवारांसाठी शासनाने तातडीने पर्यायी व्यवस्था उपलब्ध करून द्यावी, अशी मागणी जोर धरत आहे.
पोर्टल बंद राहिल्याचा कालावधी लक्षात घेऊन संबंधित भरती अथवा नोकरी प्रक्रियेत चरित्र पडताळणी सादर करण्यासाठी मुदतवाढ देण्याची अथवा पोर्टल सुरू होईपर्यंत तात्पुरती ऑफलाइन प्रक्रिया स्वीकारण्याची व्यवस्था करावी, अशीही मागणी केली जात आहे.

शासनाने गांभीर्याने दखल घेण्याची गरज

ऑनलाइन सेवांचा उद्देश नागरिकांना सुलभ, पारदर्शक आणि वेळेत सेवा उपलब्ध करून देणे हा आहे. मात्र, सलग अनेक दिवस महत्त्वाची सेवा उपलब्ध नसल्यास त्याचा परिणाम थेट नागरिकांच्या शिक्षण, रोजगार आणि करिअरच्या संधींवर होऊ शकतो. त्यामुळे चरित्र पडताळणी पोर्टल तातडीने कार्यान्वित करावे, तांत्रिक अडचणीचे कारण स्पष्ट करावे आणि सेवा बंद असल्याने नुकसान होणाऱ्या उमेदवारांसाठी विशेष पर्यायी व्यवस्था करावी, अशी मागणी होत आहे.
विशेषतः सातारा जिल्ह्यातील अग्निवीर उमेदवारांच्या संख्येचा विचार करता हा प्रश्न केवळ तांत्रिक अडचणीपुरता मर्यादित न ठेवता तरुणांच्या भवितव्याशी निगडित गंभीर बाब म्हणून शासनाने तातडीने हाताळण्याची गरज आहे.