Vinesh Phogat: भारताची स्टार कुस्तीपटू विनेश फोगाटच्या आंतरराष्ट्रीय कुस्तीतील पुनरागमनाला मोठा धक्का बसला आहे. २०२६ सीनियर वर्ल्ड चॅम्पियनशिपच्या निवड चाचणीत सहभागी होण्यासाठी तिने मागितलेली अंतरिम सवलत दिल्ली उच्च न्यायालयाने नाकारली आहे.

भारताची स्टार कुस्तीपटू विनेश फोगाटच्या आंतरराष्ट्रीय कुस्तीमध्ये पुनरागमनाच्या प्रयत्नांना मोठा धक्का बसला आहे. २०२६ सीनियर वर्ल्ड रेसलिंग चॅम्पियनशिपसाठी होणाऱ्या निवड चाचणीत सहभागी होण्याची परवानगी देण्याची तिची मागणी दिल्ली उच्च न्यायालयाने अंतरिम टप्प्यावर फेटाळली आहे. ही निवड चाचणी १४ सप्टेंबर रोजी दिल्लीतील इंदिरा गांधी स्टेडियममध्ये होणार आहे.

विनेशने भारतीय कुस्ती महासंघाच्या (WFI) ७ सप्टेंबरच्या निवड निकषांना न्यायालयात आव्हान दिले होते. प्रसूती आणि त्यानंतरच्या विश्रांतीमुळे ती निर्धारित स्पर्धांमध्ये सहभागी होऊ शकली नाही. त्यामुळे सध्याच्या पात्रता निकषांनुसार तिला निवड चाचणीपासून दूर ठेवले जात असल्याचा तिचा युक्तिवाद होता. विनेशने थेट निवड न मागता, केवळ चाचणीत सहभागी होण्याची संधी द्यावी आणि अंतिम निवड तिच्या कामगिरीच्या आधारे व्हावी, अशी मागणी केली होती.

हेही वाचा: एकाच दिवशी हरितालिका आणि गणेश चतुर्थी! आधी कोणती पूजा करायची? जाणून घ्या एका क्लिकवर

कोर्टाने काय म्हटले?

न्यायालयाने स्पष्ट केले की WFIने ७ सप्टेंबरला निश्चित केलेले पात्रता निकष सर्व खेळाडूंना समानपणे लागू होतात. निर्धारित स्पर्धांमध्ये सहभागी न झालेल्या खेळाडूला सध्याच्या निकषांनुसार पात्र ठरवता येणार नाही, असे न्यायालयाने नमूद केले.

विनेशच्या गर्भधारणा, प्रसूती आणि प्रसूतीनंतरच्या पुनर्प्राप्तीशी संबंधित परिस्थितीचा धोरणाच्या वैधतेचा विचार करताना निश्चितच विचार करावा लागेल, असेही न्यायालयाने स्पष्ट केले. मात्र, धोरणाची वैधता तपासण्याआधी केवळ विनेशला अंतरिम सवलत दिल्यास समान परिस्थितीतील इतर खेळाडूंना वेगळी वागणूक मिळण्याची शक्यता असल्याचे कोर्टाने म्हटले.

महिला खेळाडूंच्या पुनरागमनाबाबत WFIला महत्त्वाचे निर्देश

या प्रकरणाच्या सुनावणीदरम्यान दिल्ली उच्च न्यायालयाने प्रसूतीनंतर स्पर्धात्मक खेळात परतणाऱ्या महिला खेळाडूंसाठी स्पष्ट नियम आणि कालमर्यादा तयार करण्याची गरज अधोरेखित केली. गर्भधारणा आणि मातृत्वामुळे काही काळ स्पर्धेपासून दूर राहावे लागलेल्या खेळाडूंना पात्रतेच्या प्रक्रियेत अन्याय होऊ नये, यासाठी योग्य व्यवस्था असणे आवश्यक असल्याचे न्यायालयाने नमूद केले.

वर्ल्ड चॅम्पियनशिप कधी होणार?

२०२६ सीनियर वर्ल्ड रेसलिंग चॅम्पियनशिपचे आयोजन २४ ऑक्टोबर ते १ नोव्हेंबरदरम्यान कझाकिस्तानमधील अस्ताना येथे होणार आहे. त्यासाठी भारतीय संघाची निवड करण्याकरिता १४ सप्टेंबरला दिल्लीतील इंदिरा गांधी स्टेडियममध्ये चाचण्या आयोजित करण्यात आल्या आहेत.

दरम्यान, न्यायालयाने WFIच्या सध्याच्या निवड धोरणाच्या वैधतेवर अंतिम मत व्यक्त केलेले नाही. त्यामुळे विनेश फोगाटच्या मुख्य याचिकेवरील पुढील सुनावणी महत्त्वाची ठरणार आहे