Odisha ICU fire tragedy: ओरिसा राज्य सरकारच्या कटक एससीबी मेडिकल रुग्णालयाच्या आयसीयूमध्ये आज पहाटे २.३० ते ३ च्या दरम्यान आग लागली.या आगीत १० रुग्णांचा मृत्यू झालाय.
ओरिसा राज्य सरकारच्या कटक एससीबी मेडिकल रुग्णालयाच्या आयसीयूमध्ये आज पहाटे २.३० ते ३ च्या दरम्यान आग लागली.या आगीत १० रुग्णांचा मृत्यू झालाय. तर ११ कर्मचारीही या आगीत जखमी झाले. या आगी प्रकरणी न्यायालयीन चौकशी करण्यात येईल अशी घोषणा मुख्यमंत्री मोहन चरण मांझी यांनी केलीय. दरम्यान रुग्णांना सुरक्षितस्थळी हलवताना रुग्णालयातील ११ कर्मचारीही भाजले. तर ही आग शॉर्ट सर्किटमुळे लागली असावी असा अंदाज व्यक्त केला जात आहे.
या प्रकरणाची चौकशी
२३ रुग्णांवर आयसीयूमध्ये उपचार सुरु होते. त्यावेळी आग लागली. या आगीत ७ रुग्ण मृत्युमुखी पडले तर इतर तीन जणांना बाहेर काढताना त्यांचा मृत्यू झाला. अग्निशमन सेवेच्या महासंचालकांना या प्रकरणाची चौकशी करून तात्काळ अहवाल देण्यास सांगण्यात आले आहे. न्यायालयीन चौकशीनंतर आलेल्या अहवालानंतर जर या घटनेत कोणी दोषी आढळले तर कठोर कारवाई केली जाईल, असे आश्वासन मुख्यमंत्र्यांनी दिले.
दरम्यान अग्निशमन दलाच्या कर्मचाऱ्यांनी रुग्णालयात धाव घेतली आगीवर नियंत्रण मिळवले. मुख्यमंत्री मांझी यांच्यासहित आरोग्यमंत्री मुकेश महालिंग यांनीही रुग्णालयाला भेट दिली य परिस्थितीचा आढावा घेतला. तर जखमी रुग्णांवर योग्य ते उपचार करावे असे आदेश आरोग्यमंत्री मुकेश महालिंग यांनी दिलेत.तर मृत झालेल्या रुग्णांच्या नातेवाईकांना २५ लाखांची मदत राज्य सरकारकडून जाहीर करण्यात आली आहे.या आगीत जे ११ कर्मचारी भाजले आहेत, त्यांच्यावर रुग्णालयातील एका वॉर्डमध्ये उपचार सुरु आहेत.
विरोधी पक्षनेत्याकडून शोक
या आगीत मृत्युमुखी पडलेल्या रुग्णांप्रती विरोधी पक्षनेते नवीन पटनायक यांनी शोक संवेदना व्यक्त केल्या आहेत. तर जखमी रुग्णांनी लवकरात लवकर बरे व्हा, अशा शुभेच्छा दिल्या आहेत.आपण लवकरच रुग्णालयाला भेट देऊ असेही त्यांनी सांगितले.
