Donald Trump | अमेरिका (America) आणि इस्त्रायल (Israel) या दोन देशांनी मिळून इराणवर (Iran) हवाई हल्ले (Air Strike) केले आहेत. इराणवर हल्ला केल्यानंतर या तिन्ही देशांमध्ये युद्ध चांगलंच पेटलं आहे. कारण अमेरिका-इस्त्रायलने केलेल्या हल्ल्यात इराणचे सर्वोच्च नेते अयातुल्लाह खामनेई (Ayatollah Khameneni) यांचा मृत्यू झाला आहे. त्यामुळे आता संतप्त इराणकडूनही प्रत्युत्तर दिले जात आहे. अशातच आता डोनाल्ड ट्रम्प (Donald Trump) यांनी हे युद्ध आणखी पेटण्याचे संकेत दिले आहेत.

हेही वाचा – युद्धाचा भडका आणि बाजारात उसळी! सोन्या-चांदीचे दर कडाडले, सोने 11 हजारांनी महाग तर चांदी…

एकिकडे इराणसोबत युद्ध सुरू असताना दुसरीकडे डोनाल्ड ट्रम्प यांनी म्हटलं आहे की, “जोपर्यंत आमचे ध्येय साध्य होत नाही तोपर्यंत अमेरिकेचे हल्ले सुरू राहणार आहेत. यासाठी आमचे लष्करी अभियान पूर्ण ताकदीने सुरू आहे. दुर्दैवानं या युद्धात अमेरिकेच्या काही लोकांचे जीव जातील, पण युद्धात असंच होत असतं.”

“मानवी सभ्यतेच्या विरोधात ज्या लोकांनी युद्ध छेडले आहे, त्या दहशतवाद्यांना अमेरिका सर्वात कठोर शिक्षा देईल. तसेच ज्या निष्पाप लोकांचे जीव गेले आहेत त्यांचाही बदला घेतला जाईल”, असं म्हणत डोनाल्ड ट्रम्प यांनी इराणला थेट इशारा दिला आहे.

पुढे ट्रम्प यांनी युद्ध आणखी वाढवण्याचे संकेत दिले आहेत. “मी इराणच्या सैन्य पोलिसांना आवाहन करतो की, त्यांनी हे हल्ले थांबवावेत आणि सुरक्षित राहावे. जर हल्ले नाही थांबवले तर मग पुढे मृत्यूसाठी तयार राहावे”, असंही ट्रम्प यांनी म्हटलं आहे.