Vikram Kakade Nomination Rejected : महाराष्ट्रातील विधान परिषद निवडणुकीच्या रणधुमाळीत राजकीय घडामोडींना प्रचंड वेग आला असून एक अत्यंत मोठी आणि धक्कादायक बातमी समोर आली आहे. विधान परिषदेच्या 17 जागांसाठी उमेदवारी अर्ज दाखल करण्याचा काल अखेरचा दिवस होता आणि आजपासून अर्जांची छाननी प्रक्रिया सुरू झाली आहे. मात्र, छाननी प्रक्रियेच्या अगदी सुरुवातीलाच महायुतीचे उमेदवार विक्रम काकडे यांना मोठा झटका बसला. विक्रम काकडे यांनी भरलेल्या उमेदवारी अर्जावर शरद पवार यांच्या राष्ट्रवादी काँग्रेस पक्षाने थेट आक्षेप घेतला आहे. त्यामुळे या निवडणूकीत हायव्होल्टेज ट्विस्ट पाहायला मिळणार आहे.

या आक्षेपानंतर शरद पवार गटाचे प्रमुख कार्यकर्ते आणि पदाधिकारी तात्काळ निवडणूक निर्णय अधिकाऱ्यांच्या भेटीला गेले आहेत. छाननीच्या पहिल्याच दिवशी हा प्रकार घडल्याने विक्रम काकडे यांच्या उमेदवारीसमोर आता कायदेशीर आणि तांत्रिक अडचणींचे मोठे प्रश्नचिन्ह निर्माण झालेत. शरद पवार यांच्या राष्ट्रवादी काँग्रेस पक्षाकडून पुण्याच्या जागेवर श्रीकांत पाटील यांनी आपला अधिकृत उमेदवारी अर्ज दाखल केला आहे. श्रीकांत पाटील यांच्या अर्जाच्या पार्श्वभूमीवरच, आता शरद पवार गटाने प्रतिस्पर्धी उमेदवार विक्रम काकडे यांच्या अर्जावर कायदेशीर बोट ठेवले.

अर्जालाच न्यायालयात किंवा निवडणूक अधिकाऱ्यांसमोर आव्हान

शरद पवार गटाने नेमका कोणत्या तांत्रिक त्रुटीवर किंवा कायदेशीर मुद्द्यावर हा आक्षेप नोंदवला आहे, याचा सविस्तर आणि अधिकृत तपशील अद्याप प्रशासनाकडून समोर आलेला नाही. मात्र, एका प्रमुख विरोधी पक्षाने थेट अर्जालाच न्यायालयात किंवा निवडणूक अधिकाऱ्यांसमोर आव्हान दिल्याने विक्रम काकडे यांच्या अडचणीत मोठी वाढ झाली आहे. आता निवडणूक निर्णय अधिकारी या आक्षेपावर दोन्ही बाजू ऐकून नेमकी काय सुनावणी घेतात, यावर काकडेंचे राजकीय भवितव्य अवलंबून असणार आहे.

विक्रम काकडे हे सुपुत्र पार्थ पवार यांचे खंदे समर्थक आणि सच्चा दोस्त

विक्रम काकडे हे अजित पवार यांचे सुपुत्र पार्थ पवार यांचे खंदे समर्थक आणि सच्चा दोस्त म्हणून ओळखले जातात. नुकताच संजय काकडे आणि विक्रम काकडे यांनी अजित पवारांच्या राष्ट्रवादी काँग्रेस पक्षात जाहीर प्रवेश केला होता. पक्षप्रवेशानंतर तात्काळ विक्रम काकडे यांना राष्ट्रवादीकडून विधान परिषदेची अधिकृत उमेदवारी बहाल करण्यात आली. परंतु, ही उमेदवारी सुरुवातीपासूनच वादाच्या भोवऱ्यात राहिली.

विक्रम काकडे यांची उमेदवारी पहिल्यापासूनच वादाच्या भोवऱ्यात

ज्या दिवशी उमेदवारी अर्ज भरायचा होता, त्या दिवशी पक्ष कार्यालयात अजित पवार गटाचे माजी आमदार सुनील टिंगरे आणि विक्रम काकडे हे दोघेही उपस्थित होते. दोघांच्या उपस्थितीमुळे पक्षाच्या अधिकृत उमेदवाराबाबत कमालीचे संभ्रमाचे वातावरण निर्माण झाले होते. अखेर विक्रम काकडे यांना उमेदवारी जाहीर झाल्याने नाराज झालेल्या माजी आमदार सुनील टिंगरे यांच्या समर्थकांनी थेट आपल्या पदांचे राजीनामे देण्यास सुरुवात केली होती. हा अंतर्गत वाद उफाळून आलेला असतानाच आता विरोधकांनी काकडेंना घेरले आहे.

विक्रम काकडे यांचा अर्ज वैध ठरणार की बाद होणार याकडे सर्वांचे लक्ष

शरद पवार यांच्या पक्षाने घेतलेल्या या आक्षेपामुळे आता संपूर्ण पुणे जिल्ह्यासह राज्याच्या राजकीय वर्तुळाचे लक्ष निवडणूक निर्णय अधिकाऱ्यांच्या दालनाकडे लागले आहे. छाननीअंती विक्रम काकडे यांचा अर्ज वैध ठरणार की बाद होणार, यावर अनेक गणिते अवलंबून आहेत. जर हा अर्ज बाद झाला तर महायुतीसाठी हा फार मोठा मानहानीकारक धक्का असेल. तर दुसरीकडे, अर्ज वैध ठरल्यास निवडणुकीतील चुरस अधिकच वाढणार आहे. या नव्या ट्विस्टमुळे विधान परिषदेची ही जागा आता पूर्णपणे हायव्होल्टेज बनली आहे.