Maharashtra Court Bomb Threat : महाराष्ट्रातील परभणी, सातारा, बीड, पुणे (शिवाजीनगर) आणि पंढरपूरसह अनेक ठिकाणच्या न्यायालयांना बॉम्बस्फोटाची धमकी देणारे ई-मेल आल्याची माहिती समोर आली आहे. तसेच मुंबईतील दिंडोशी, ठाणे आणि नाशिक येथील न्यायालयांनाही धमकीचे संदेश मिळाल्याचे सांगितले जात आहे.

ई-मेलमध्ये दुपारी ३ वाजून १० मिनिटांनी स्फोट होण्याची वेळ नमूद करण्यात आल्याने पोलीस आणि प्रशासन सतर्क झाले आहे. खबरदारीचा उपाय म्हणून संबंधित न्यायालयीन इमारती रिकाम्या करून तपासणी सुरू करण्यात आली आहे.

परभणी, सातारा, बीडसह पुणे आणि पंढरपूरमध्येही सतर्कता

परभणी, सातारा आणि बीड येथील जिल्हा न्यायालयांना धमकीचे ई-मेल मिळाल्याची माहिती आहे. यासोबत पुण्यातील शिवाजीनगर आणि पंढरपूर येथील न्यायालयांचाही या प्रकरणात समावेश असल्याची माहिती समोर आली आहे. धमकीचे गांभीर्य लक्षात घेऊन संबंधित ठिकाणी सुरक्षा यंत्रणा सतर्क करण्यात आल्या आहेत.

सातारा जिल्हा व सत्र न्यायालयाला धमकीचा ई-मेल मिळाल्यानंतर न्यायालयाची इमारत आणि परिसर रिकामा करण्यात आला. पोलिसांसह बॉम्बशोधक व नाशक पथक (BDDS) आणि श्वान पथकाकडून तपासणी करण्यात येत आहे.

दुपारी ३.१० वाजताची वेळ ई-मेलमध्ये नमूद

धमकीच्या ई-मेलमध्ये दुपारी ३ वाजून १० मिनिटांनी बॉम्बस्फोट होणार असल्याचा उल्लेख असल्याची माहिती आहे. त्यामुळे प्रशासनाने कोणताही धोका न पत्करता सुरक्षा व्यवस्था वाढवली आहे. न्यायालय परिसरातील संशयास्पद वस्तूंची तपासणी केली जात आहे.

मुंबई, ठाणे आणि नाशिकमधील न्यायालयांनाही धमकी

दिंडोशी (मुंबई), ठाणे आणि नाशिक येथील सत्र न्यायालयांनाही अशाच स्वरूपाचे धमकीचे ई-मेल मिळाल्याची माहिती आहे. खबरदारी म्हणून संबंधित न्यायालयीन इमारती रिकाम्या करण्यात आल्याचे सांगितले जात आहे. पोलिसांकडून परिसराची तपासणी आणि ई-मेलचा स्रोत शोधण्याची प्रक्रिया सुरू आहे.

राज्यभरातील पोलीस यंत्रणा सतर्क

एकाच वेळी विविध शहरांतील न्यायालयांना धमकीचे ई-मेल मिळाल्याने राज्यातील पोलीस आणि प्रशासनाने खबरदारी घेतली आहे. अमरावतीसह इतर ठिकाणच्या सुरक्षा यंत्रणांनाही सतर्क ठेवण्यात आले आहे. तपास पूर्ण होईपर्यंत नागरिकांनी अफवांवर विश्वास ठेवू नये आणि प्रशासनाच्या सूचनांचे पालन करावे.

या धमकीच्या ई-मेलमागे कोण आहे, ते कुठून पाठवण्यात आले आणि त्यामागचा उद्देश काय आहे, याचा तपास सुरू आहे. तपासणीत स्फोटक आढळले आहे की नाही, याबाबत अधिकृत माहितीची प्रतीक्षा आहे.