Rahul Gandhi Protest: दिल्लीतील राजकीय वातावरण पुन्हा एकदा तापलं आहे. निवडणूक आयोगाविरोधातील आंदोलन, ज्ञानेश कुमार यांच्या राजीनाम्याची मागणी आणि राहुल गांधींच्या भूमिकेमुळे आता विरोधकांच्या पुढील रणनीतीकडे सर्वांचे लक्ष लागलं आहे.
INDIA Bloc Protest Against Election Commission: निवडणूक प्रक्रियेतील (Election Commission Protest) कथित अनियमितता, मतदार याद्यांमधील फेरफार आणि EVM संदर्भातील आरोपांचा मुद्दा पुन्हा एकदा राष्ट्रीय राजकारणाच्या केंद्रस्थानी आला आहे. लोकसभेतील विरोधी पक्षनेते राहुल गांधी (Rahul Gandhi Protest) यांनी ७ ऑगस्ट २०२५ रोजी या मुद्द्यांवरून निवडणूक आयोगावर गंभीर प्रश्न उपस्थित केले होते. महाराष्ट्र, हरियाणा आणि कर्नाटकातील निवडणुकांचे दाखले देत त्यांनी मतदार यादी आणि निवडणूक प्रक्रियेतील पारदर्शकतेवर चिंता व्यक्त केली होती.
INDIA आघाडीचा दिल्लीतील संघर्ष तीव्र
देशातील तब्बल १९ विरोधी पक्षांनी INDIA आघाडीच्या माध्यमातून (INDIA Bloc Protest) निवडणूक आयोगाविरोधातील आपला विरोध अधिक तीव्र करण्याचा निर्णय घेतला आहे. मुख्य निवडणूक आयुक्त ज्ञानेश कुमार (Gyanesh Kumar) यांच्या राजीनाम्याची मागणी(Gyanesh Kumar Resignation) करत राहुल गांधी, प्रियंका गांधी यांच्यासह काँग्रेसचे अनेक मोठे खासदार आंदोलनात सहभागी झाल्याचे पाहायला मिळत आहे.
संसद परिसरातून निवडणूक आयोगाच्या कार्यालयाच्या दिशेने काढण्यात आलेल्या मोर्चामुळे दिल्लीतील राजकीय वातावरण चांगलेच तापले. आकाशवाणी भवन परिसरातही विरोधकांनी आंदोलन सुरू ठेवत सरकार आणि निवडणूक आयोगावर जोरदार टीका केली.
हे आंदोलन केवळ दिल्लीपुरते मर्यादित न ठेवता त्याचा विस्तार देशभर करण्याची रणनीती विरोधकांकडून आखली जात असल्याचे संकेत मिळत आहेत. त्यामुळे आगामी काळात INDIA आघाडी (INDIA Alliance Protest) कोणती मुख्य भूमिका जाहीर करते, याकडे राजकीय वर्तुळाचे लक्ष लागले आहे.
आंदोलनाचा विस्तार गावपातळीपर्यंत?
मतदार याद्यांमधील कथित त्रुटी आणि SIR प्रक्रियेच्या पार्श्वभूमीवर INDIA आघाडीने व्यापक आंदोलन उभारण्याची तयारी सुरू केली आहे. आघाडीच्या बैठकीत मतदार यादीतील बदलांचा मुद्दा प्राधान्याने चर्चेत आला होता.
ज्या मतदारांची नावे SIR प्रक्रियेदरम्यान मतदार यादीतून वगळण्यात आल्याचा दावा केला जात आहे, त्यांना पुन्हा यादीत समाविष्ट करण्यासाठी व्यापक जनजागृती मोहीम राबवण्याची तयारी काँग्रेसने दर्शवली आहे. ही मोहीम सुमारे महिनाभर चालवण्याची शक्यता असून, आंदोलन दिल्लीपासून देशातील विविध भागांपर्यंत नेण्याचा प्रयत्न केला जाणार आहे.
हेही वाचा: नवरात्राच्या नऊ दिवसांत काय करावे अन् काय करू नये? जाणून घ्या एका क्लिकवर
राहुल गांधींच्या आरोपांना वर्षभराची पार्श्वभूमी
निवडणूक प्रक्रियेतील कथित अनियमितता आणि EVM संदर्भातील प्रश्न राहुल गांधी गेल्या वर्षभरापासून सातत्याने उपस्थित करत आहेत. 7 ऑगस्ट 2025 रोजी पत्रकार परिषद घेत त्यांनी निवडणूक आयोगाच्या कार्यपद्धतीवर प्रश्नचिन्ह उपस्थित केले होते.
यानंतर महाराष्ट्रासह विविध राज्यांतील विरोधी पक्षांनीही मतदार याद्या आणि निवडणूक प्रक्रियेबाबत आक्षेप नोंदवले. महाराष्ट्रात महाविकास आघाडीतील घटक पक्षांनीही या मुद्द्यावर निवडणूक आयोगाला लक्ष्य केले. ठाकरे बंधूंनीदेखील निवडणूक प्रक्रियेतील कथित त्रुटींवरून प्रश्न उपस्थित केले.
SIR मुद्द्यावरून विरोधक एकत्र
पश्चिम बंगालमधील SIR प्रक्रियेदरम्यान मोठ्या संख्येने मतदारांची नावे वगळल्याचा विरोधकांचा आरोप आहे. या पार्श्वभूमीवर इतर राज्यांमध्येही अशीच परिस्थिती निर्माण होण्याची शक्यता व्यक्त करत INDIA आघाडीतील पक्षांनी केंद्र सरकार आणि निवडणूक आयोगाविरोधात आक्रमक भूमिका घेतली आहे.
SIR प्रक्रियेच्या पारदर्शकतेवर प्रश्न उपस्थित करत विरोधकांनी मुख्य निवडणूक आयुक्त ज्ञानेश कुमार यांच्या राजीनाम्याची मागणी पुढे रेटली आहे.
दरम्यान, दिल्लीतील राजकीय आंदोलन आणखी तीव्र होण्याची शक्यता आहे. येत्या काही दिवसांत विविध विरोधी पक्षांकडून स्वतंत्र आंदोलनांचीही तयारी सुरू आहे. आम आदमी पक्ष आणि डाव्या पक्षांकडून जंतरमंतरवर आंदोलन सुरू असल्याने राजधानीतील राजकीय हालचालींना वेग आला आहे.
त्यामुळे पुढील काही दिवस दिल्लीच्या राजकारणासाठी महत्त्वाचे ठरण्याची शक्यता असून, INDIA आघाडीच्या पुढील घोषणेकडे संपूर्ण देशाचे लक्ष लागले आहे.
