Panchayat Samiti Elections : राज्यातील 12 जिल्हा परिषदा आणि 125 पंचायत समित्यांच्या निवडणुका शनिवारी (7 फेब्रुवारी) पार पडल्या, ज्यामध्ये सुमारे 67 टक्के मतदान झालं होतं. याचे निकाल आज सोमवार, ९ फेब्रुवारी रोजी जाहीर होतील. याचा अर्थ उमेदवारांचं भवितव्य आज ठरवलं जाईल, ते जिंकतील की हरतील. निवडणूक निकालांबद्दल राजकीय पक्ष आणि उमेदवार मोठ्या प्रमाणात उत्सुक आहेत.

किती जागांसाठी किती उमेदवारांची प्रतिष्ठा पणाला :

जिल्हा परिषदांच्या 731 जागांसाठी 2,624 उमेदवारांनी निवडणूक लढवली. यात 369 महिला, 83 अनुसूचित जाती, 25 अनुसूचित जमाती, 191 इतर मागासवर्गीय जागांचा समावेश आहे. तर 1462 पंचायत समितीच्या जागांसाठी 4,814 उमेदवारांनी निवडणूक लढवली, यात 731 महिला, 166 अनुसूचित जाती, 38 अनुसूचित जमाती, 342 इतर मागासवर्गीय जागांचा समावेश आहे.

मतदारांची संख्या किती होती?

• 1.06 कोटी पुरुष
• 1.02 कोटी महिला
• 468 इतर श्रेणीतील मतदार

राज्य निवडणूक आयोगानं केली होती विशेष व्यवस्था :

राज्य निवडणूक आयोगानं ही निवडणूक घेण्यासाठी 1.28 लाख कर्मचारी, 125 निवडणूक अधिकारी, 51,537 ईव्हीएम नियंत्रण युनिट आणि 1.10 लाख मतपत्रिका तैनात केल्या. मतदारांनी जिल्हा परिषदांसाठी पांढऱ्या मतपत्रिका आणि पंचायत समित्यांसाठी गुलाबी मतपत्रिकांचा वापर केला. सकाळी लवकर मतदान करणाऱ्यांमध्ये उपमुख्यमंत्री सुनेत्रा पवार यांचाही समावेश होता. त्यांनी बारामतीतील काटेवाडी शाळेत त्यांचा मुलगा पार्थसह मतदान केलं. हे उल्लेखनीय आहे की अजित पवार यांचं विमान अपघातात निधन झाल्यानंतर त्यांच्या पत्नीनं राज्याच्या उपमुख्यमंत्री म्हणून शपथ घेतली.

दोन्ही राष्ट्रवादीसाठी निवडणूक महत्त्वाची :

जिल्हा परिषद आणि पंचायत समितीच्या 5 फेब्रुवारी रोजी निवडणुका होणार होत्या. परंतु उपमुख्यमंत्री अजित पवार यांच्या निधनानंतर आणि त्यानंतर तीन दिवसांच्या राज्य दुखवट्यामुळं निवडणुकांसाठी मतदान आणि मतमोजणी पुढं ढकलली. यादरम्यान दोन्ही राष्ट्रवादी एकत्र येणार की नाही, याबाबत विविध पातळीवर राजकीय चर्चा सुरु असताना आणि उपमुख्यमंत्री अजित पवारांच्या निधनानंतर ही पहिली निवडणूक आहे. त्यामुळं ही निवडणूक दोन्ही राष्ट्रवादीसाठी महत्त्वाची असणार आहे.