Praniti Shinde: “ट्रम्प बोले, मोदी डोले” अशी टीका करत काँग्रेस खासदार प्रणिती शिंदे यांनी सोलापुरात आंदोलनादरम्यान केंद्र सरकारवर निशाणा साधला असून राजकीय वर्तुळात चर्चा रंगली आहे.

देशभरात इंधन दरवाढ, महागाई आणि शेतकरी प्रश्नांवरून राजकीय वातावरण तापले असताना काँग्रेस खासदार प्रणिती शिंदे यांनी केंद्र सरकारवर जोरदार टीका केली आहे. वाढती महागाई, खतांचा प्रश्न, पीकविमा आणि इंधन दरवाढ यासाठी त्यांनी केंद्राच्या धोरणांना जबाबदार धरले.

हेही वाचा: फेरारीची ‘लुचे’ ठरली गेमचेंजर; 20 मिनिटांत चार्ज होणारी सुपरकार लॉन्च, पाहा खास फोटो

प्रणिती शिंदे आंदोलनादरम्यान बोलताना

सोलापुरात आंदोलनादरम्यान बोलताना प्रणिती शिंदे यांनी पंतप्रधान नरेंद्र मोदी यांच्या परराष्ट्र आणि आर्थिक धोरणांवर प्रश्नचिन्ह उपस्थित केले. जागतिक संघर्षांचा परिणाम भारतातील सामान्य नागरिकांवर होत असल्याचे सांगत त्यांनी इंधन दरवाढीमुळे शेतकरी आणि मध्यमवर्गीय कुटुंबांवर अतिरिक्त आर्थिक ताण निर्माण झाल्याचा आरोप केला.

शेतकरी सध्या मोठ्या संकटाचा सामना करत असून सोयाबीन, तूर आणि इतर पिकांना योग्य दर मिळत नसल्याचे त्यांनी नमूद केले. पीकविमा योजनांमधील अडचणी, वाढलेले उत्पादन खर्च आणि खतांच्या उपलब्धतेचा प्रश्न यामुळे ग्रामीण भागातील परिस्थिती गंभीर होत असल्याचेही त्यांनी सांगितले.

उद्योगपतींना प्राधान्य दिल्याचा आरोप

यावेळी त्यांनी केंद्र सरकारवर उद्योगपतींना प्राधान्य दिल्याचा आरोप करत कृषी क्षेत्राकडे दुर्लक्ष होत असल्याची टीका केली. वाढती महागाई आणि इंधन दरवाढ यामुळे सर्वसामान्य नागरिकांचे जीवन कठीण बनत असल्याचे त्यांनी म्हटले.

जागतिक घडामोडी

जागतिक घडामोडींवर भाष्य करताना प्रणिती शिंदे यांनी अमेरिकेचे माजी राष्ट्राध्यक्ष Donald Trump यांचाही उल्लेख केला. भारताने स्वतंत्र आर्थिक आणि परराष्ट्र धोरण अधिक प्रभावीपणे राबवण्याची गरज असल्याचे त्यांनी मत व्यक्त केले.

दरम्यान, इंधन दरवाढ आणि कृषी प्रश्नांवरून विरोधकांकडून राज्यभरात आंदोलनांची मालिका सुरू असून, आगामी काळात केंद्र सरकारविरोधातील राजकीय संघर्ष आणखी तीव्र होण्याची शक्यता व्यक्त केली जात आहे.

यावर देवेंद्र फडणवीस बोलताना म्हणाले…

प्रणिती शिंदे या नुकत्याच खासदार झाल्या आहेत; यापूर्वी त्या आमदार होत्या. त्यामुळे त्यांच्याकडून अधिक राजकीय परिपक्वतेची अपेक्षा केली जाते. अशा परिस्थितीत जर कोणी अपरिपक्व वर्तन किंवा वक्तव्य करत असेल, तर त्यावर प्रतिक्रिया देणे आवश्यक ठरते.

जर सार्वजनिक पदावरील व्यक्तीला आपल्या जबाबदारीची जाणीव राहत नसेल, तर जनताच योग्य वेळी त्यांना त्यांचे स्थान दाखवते.