Navratri Recipe: चैत्र नवरात्राची सुरुवात झाली आहे. जर तुम्हाला साबुदाणा आवडत नसेल किंवा खाऊन कंटाळा आला असेल, तर हे हेल्दी आणि टेस्टी उपवासाचे अप्पे नक्की ट्राय करा

चैत्र नवरात्र सुरू होताच अनेक जण उपवास करतात, पण काही दिवसांनी रोजचा तोच साबुदाणा, बटाट्याचे पदार्थ किंवा तळलेले खाणे खाऊन कंटाळा येऊ लागतो. शिवाय जास्त तळलेले आणि जड पदार्थ खाल्ल्याने शरीराला सुस्ती येते आणि दिवसभर ऊर्जा कमी जाणवते. अशा वेळी चव आणि आरोग्य यांचा समतोल साधणारा पर्याय निवडणं गरजेचं ठरतं.

हेही वाचा: लिंबू की पुदिन्याचे पाणी? उन्हाळ्यात कोणतं आहे शरीरासाठी जास्त फायदेशीर

जर तुम्हाला उपवासात काहीतरी हलकं, पौष्टिक आणि वेगळं खायचं असेल, तर हेल्दी अप्पे हा एक उत्तम पर्याय ठरू शकतो. कमी तेलात बनणारे, पोटभर आणि चविष्ट असे हे अप्पे तुमच्या सकाळच्या नाश्त्याला एक नवीन ट्विस्ट देतात. चला तर मग, ही सोपी आणि झटपट बनणारी रेसिपी जाणून घेऊया.

साहित्य

१ कप तांदूळ
½ कप साबुदाणा
१ लहान तुकडा आले
½ कप किसलेले पनीर
½ कप किसलेले गाजर
२ हिरव्या मिरच्या (बारीक चिरलेल्या)
थोडी कोथिंबीर (चिरलेली)
सैंधव मीठ (चवीनुसार)
½ टीस्पून जिरेपूड
आवश्यकतेनुसार पाणी
अप्पे बनवण्यासाठी थोडे तेल किंवा तूप

शेंगदाणा-नारळ चटणी

एक कप भाजलेले शेंगदाणे घ्या. त्यात ताजे नारळ, 2 हिरव्या मिरच्या, कोथिंबीर, सैंधव मीठ आणि जिरेपूड घाला. थोडं पाणी घालून बारीक वाटा. नंतर एका पॅनमध्ये थोडं तेल गरम करून त्यात जिरे आणि कढीपत्ता घालून फोडणी तयार करा आणि ती चटणीवर ओता.

कृती

तांदूळ आणि साबुदाणा वेगवेगळे धुऊन 2-3 तास भिजत ठेवा.

नंतर हे दोन्ही घटक आलेसह मिक्सरमध्ये टाकून थोडं पाणी घालून स्मूथ पेस्ट तयार करा.

तयार बॅटर एका भांड्यात काढून त्यात पनीर, गाजर, हिरवी मिरची, कोथिंबीर, मीठ आणि जिरेपूड घाला.

सर्व मिश्रण चांगले एकजीव करून 10 मिनिटे झाकून ठेवा.

अप्पे पॅन गरम करून त्याला हलकं तेल लावा.

प्रत्येक साच्यात बॅटर घालून मंद आचेवर झाकण ठेवून 3-4 मिनिटे शिजवा.

एक बाजू सोनेरी झाली की अप्पे पलटून दुसऱ्या बाजूनेही भाजून घ्या.

गरमागरम अप्पे नारळ किंवा शेंगदाणा चटणीसोबत सर्व्ह करा.