(IPL 2026) : इंडियन प्रीमियर लीग सीझन 19 (IPL 2026) मधील 68वा सामना आज लखनौ सुपर जायंट्स आणि पंजाब किंग्स यांच्यात रंगणार आहे. इकाना स्टेडियमवर होणारा हा सामना PBKS साठी ‘करो या मरो’ असा असणार आहे. श्रेयस अय्यरच्या नेतृत्वाखालील पंजाब संघाला प्लेऑफच्या आशा जिवंत ठेवण्यासाठी आजचा सामना कोणत्याही परिस्थितीत जिंकावाच लागणार आहे. दुसरीकडे LSG आधीच प्लेऑफच्या शर्यतीतून बाहेर पडली असली तरी संघ आता निर्भय क्रिकेट खेळताना दिसत आहे आणि शेवटचा सामना जिंकण्यासाठी पूर्ण ताकद लावणार आहे. जाणून घ्या आज इकाना स्टेडियमची पिच कोणाला साथ देईल आणि लखनौमधील हवामान कसे असेल.

लखनौ सुपर जायंट्स गुणतालिकेत तळाच्या स्थानावर आहे. ऋषभ पंतच्या नेतृत्वाखालील संघासाठी हा हंगाम निराशाजनक ठरला आहे. मात्र मागील काही सामन्यांमध्ये संघ आक्रमक आणि निर्भय क्रिकेट खेळताना दिसत असून आज पंजाब किंग्सचा खेळ बिघडवू शकतो. पंजाब किंग्सने सुरुवातीचे 7 सामने गमावले नव्हते, पण मागील 6 सामन्यांमध्ये संघाला विजयासाठी संघर्ष करावा लागला आहे. एकेकाळी टॉप-2 मध्ये राहण्याची शक्यता असलेल्या पंजाबला आता प्लेऑफमध्ये पोहोचण्यासाठी इतर संघांच्या निकालांवरही अवलंबून राहावे लागणार आहे. मात्र त्याआधी आजचा सामना जिंकणे अत्यंत आवश्यक आहे, अन्यथा संघ स्पर्धेबाहेर जाईल.

पंजाब किंग्सचे प्लेऑफ समीकरण

PBKS ने आज लखनौ सुपर जायंट्सला पराभूत केल्यास त्यांच्या खात्यात 15 गुण होतील. त्यानंतर राजस्थान रॉयल्सने मुंबई इंडियन्सविरुद्धचा शेवटचा सामना गमावणे आवश्यक असेल. तसेच रविवारी संध्याकाळी होणाऱ्या सामन्यात KKR चा पराभव झाल्यास पंजाब प्लेऑफमध्ये पोहोचणारा चौथा संघ ठरू शकतो. जर KKR जिंकली तरी त्यांच्या देखील 15 गुण होतील आणि त्यानंतर नेट रनरेटच्या आधारे निर्णय घेतला जाईल. राजस्थान जिंकली तर ती चौथी संघ ठरेल.

LSG vs PBKS सामन्यात हवामान कसे असेल?

लखनौमध्ये आज हवामान सामन्यासाठी अनुकूल राहणार आहे. पावसाची कोणतीही शक्यता नाही. सामना संध्याकाळी 7:30 वाजता सुरू होईल. त्यावेळी तापमान 41 ते 42 अंश सेल्सियस दरम्यान राहण्याची शक्यता आहे. सुरुवातीचा एक तास वातावरण उष्ण राहील, तर रात्री 8:30 नंतर तापमान 35 ते 36 अंशांपर्यंत खाली येईल.

LSG vs PBKS पिच रिपोर्ट

लखनौ सुपर जायंट्स विरुद्ध पंजाब किंग्स सामना इकाना स्टेडियमच्या पिच क्रमांक-5 वर खेळवला जाणार आहे. ही मिश्र मातीची पिच असून फलंदाज आणि गोलंदाज दोघांनाही समान मदत मिळते. IPL 2026 मध्ये येथे झालेल्या 6 सामन्यांपैकी 3 सामने लक्ष्याचा पाठलाग करणाऱ्या संघांनी जिंकले आहेत, तर एका सामन्याचा निकाल सुपर ओव्हरमध्ये लागला होता. लखनौमध्ये फलंदाजांना मोठी धावसंख्या उभारणे सोपे नसते आणि आजही तसाच अंदाज आहे. त्यामुळे गोलंदाजांची भूमिका निर्णायक ठरू शकते.

इकाना स्टेडियमवरील IPL रेकॉर्ड

लखनौच्या या मैदानावर आतापर्यंत IPL चे एकूण 28 सामने खेळले गेले आहेत. त्यापैकी 12 वेळा प्रथम फलंदाजी करणाऱ्या संघाने, तर 15 वेळा लक्ष्याचा पाठलाग करणाऱ्या संघाने विजय मिळवला आहे. या मैदानावरील सर्वात मोठी धावसंख्या 235 धावांची आहे, जी KKR ने 2024 मध्ये उभारली होती. सर्वात मोठी वैयक्तिक खेळी 118 धावांची असून ती ऋषभ पंतने गेल्या वर्षी RCB विरुद्ध केली होती. येथे पहिल्या डावातील सरासरी धावसंख्या 174 आहे, तर सर्वात यशस्वी रन चेस 177 धावांचा आहे, जो पंजाब किंग्सने मागील वर्षी पूर्ण केला होता.

LSG vs PBKS सामन्याचे थेट प्रक्षेपण

लखनौ सुपर जायंट्स आणि पंजाब किंग्स यांच्यातील सामन्याचे थेट प्रक्षेपण स्टार स्पोर्ट्स नेटवर्कच्या विविध चॅनेल्सवर पाहता येणार आहे. तसेच सामन्याचे लाईव्ह स्ट्रीमिंग जिओहॉटस्टार अॅप आणि वेबसाइटवर उपलब्ध असेल.