Donald Trump Hormuz Blockade : अमेरिकेचे राष्ट्राध्यक्ष डोनाल्ड ट्रम्प यांनी एका मोठ्या घोषणेनं तेल संकट अधिक गडद केलं आहे. ट्रम्प यांनी घोषणा केली आहे की, अमेरिकन नौदल होर्मुझच्या सामुद्रधुनीतून जहाजांना आत-बाहेर जाण्यापासून रोखेल आणि तात्काळ नाकेबंदी सुरु करेल. पाकिस्तानमधील अमेरिका-इराण शांतता चर्चा निष्फळ ठरल्यानंतर ट्रम्प यांनी ही घोषणा केली.

हेही वाचा : LPG जहाज ‘जग विक्रम’ होर्मुझहून सुरक्षित रवाना; 15 एप्रिलला मुंबईत पोहोचण्याची शक्यता

अमेरिकेचे सामरिक नियंत्रण प्रस्थापित करण्याचे प्रयत्न :

हे जाणून घ्या की, ट्रम्प आता त्या सागरी मार्गावर सामरिक नियंत्रण प्रस्थापित करण्याचा प्रयत्न करतील, जो युद्ध सुरु होण्यापूर्वी जागतिक तेल पुरवठ्याच्या 20 टक्के वाहतुकीसाठी जबाबदार होता. असं करुन, ते इराणच्या प्रभावाचा प्रमुख स्रोत नष्ट करण्याचा प्रयत्न करतील.

ऊर्जा संकट अधिक गडद करण्याच्या दिशेनं अमेरिकेचे पाऊल :

हे लक्षात घेण्यासारखं आहे की, अमेरिकेच्या नाकेबंदीच्या घोषणेमुळं जागतिक ऊर्जा बाजारपेठ आणि तेल, नैसर्गिक वायू व संबंधित उत्पादनांच्या किमती आणखी अस्थिर होण्याची शक्यता आहे. मात्र, अमेरिकन नौदल ही नाकेबंदी कशी आणि केव्हा सुरु करेल, हे अद्याप स्पष्ट झालेलं नाही.

इराणला टोल देणाऱ्यांना रोषाचा सामना करावा लागेल :

डोनाल्ड ट्रम्प म्हणाले की, त्यांनी अमेरिकी नौदलाला आंतरराष्ट्रीय सागरी हद्दीतून जाण्यासाठी इराणला टोल देणाऱ्या कोणत्याही जहाजाचा शोध घेऊन ते थांबवण्याचे निर्देश दिले आहेत. बेकायदेशीरपणे टोल देणाऱ्या कोणत्याही जहाजाला खुल्या समुद्रातून सुरक्षित मार्ग दिला जाणार नाही. ते म्हणाले की इतर देशही अमेरिकेच्या नाकेबंदीत सामील होतील, पण ट्रम्प यांनी त्यांची नावं सांगितली नाहीत.

डोनाल्ड ट्रम्प यांची इराणला धमकी :

ट्रम्प यांनी यावर जोर दिला की, युद्ध संपवण्यात आलेल्या अपयशाचं मूळ कारण तेहरानची अणुमहत्वाकांक्षा होती. ते म्हणाले की, अमेरिका इराणला पूर्णपणे नष्ट करण्यासाठी ‘योग्य वेळेची’ वाट पाहत आहे.