US Airstrike on ISIS Bases : अमेरिकेनं नायजेरियातील आयसिसच्या ठिकाणांवर मोठा हल्ला केला आहे. अमेरिकेनं वायव्य नायजेरियात हवाई हल्ला केला. या हवाई हल्ल्याचा व्हिडिओही अमेरिकेनं प्रसिद्ध केला आहे. अमेरिकेचे अध्यक्ष डोनाल्ड ट्रम्प यांनी सोशल मीडियावर या हल्ल्याची घोषणा केली.

काय म्हणाले ट्रम्प :

डोनाल्ड ट्रम्प यांनी ट्रुथ सोशलवरील एका पोस्टमध्ये म्हटलं आहे की वायव्य नायजेरियातील आयसिसवर हा हल्ला ख्रिश्चनांना मारणाऱ्या दहशतवाद्यांना लक्ष्य करण्यासाठी करण्यात आला होता. ट्रम्प यांनी पुढं लिहिलं की, “आज रात्री, कमांडर-इन-चीफ म्हणून माझ्या निर्देशानुसार, अमेरिकेनं वायव्य नायजेरियातील आयसिस दहशतवादी गटांवर एक शक्तिशाली आणि प्राणघातक हल्ला केला.” ट्रम्प पुढं म्हणाले, “हे आयसिस दहशतवादी वर्षानुवर्षे, खरं तर शतकानुशतकं निष्पाप ख्रिश्चनांना लक्ष्य करून त्यांची निर्घृण हत्या करत आहेत. मी या दहशतवाद्यांना आधीच इशारा दिला आहे की जर त्यांनी ख्रिश्चनांचा नरसंहार थांबवला नाही तर त्यांना गंभीर परिणाम भोगावे लागतील आणि आज रात्री तेच घडलं.”

हेही वाचा : एपस्टाईन फाइल्स प्रसिद्ध झाल्या, पण त्या ट्रम्पला वाचवण्यासाठी वेगळाच डाव; नव्या वादाला सुरुवात

अमेरिका कट्टरपंथी इस्लामिक दहशतवाद वाढू देणार नाही :

अमेरिकेचे अध्यक्ष म्हणाले, “युद्ध विभागानं असंख्य अचूक हल्ले केले, जे माझ्या नेतृत्वाखाली फक्त अमेरिकाच करु शकते. आपला देश कट्टरपंथी इस्लामिक दहशतवादाला वाढू देणार नाही. देव आपल्या सैन्याला आशीर्वाद देवो आणि सर्वांना नाताळाच्या शुभेच्छा. जर दहशतवाद्यांनी ख्रिश्चनांची कत्तल सुरू ठेवली तर त्यांची संख्या आणखी वाढेल.”

हल्ल्याचा व्हिडिओ प्रसिद्ध :

युद्ध विभागानं सोशल मीडिया प्लॅटफॉर्म X वर हवाई हल्ल्यांचं फुटेज प्रसिद्ध केलं. युद्ध विभागानं सांगितलं की हे हल्ले रात्रभर चालले आणि या कारवाईचं वर्णन शक्तीद्वारे शांततेचं प्रदर्शन म्हणून केलं. नायजेरियातील अमेरिकेची ही आतापर्यंतची सर्वात मोठी कारवाई आहे. मध्य सीरियातील पालमीरा शहरात संशयित इस्लामिक स्टेट हल्लेखोरानं अमेरिकन आणि सीरियन सैन्यांना घेऊन जाणाऱ्या ताफ्याला लक्ष्य केल्यानंतर काही दिवसांतच ही कारवाई करण्यात आली.