T20 World Cup : कॅनेडियन क्रिकेट सध्या आपल्या सर्वात कठीण काळातून जात आहे, कारण आयसीसीच्या भ्रष्टाचारविरोधी पथकानं संघाविरुद्ध दोन मोठ्या चौकश्या सुरु केल्या आहेत. सार्वजनिक प्रसारक सीबीसीच्या ‘करप्शन, क्राईम अँड क्रिकेट’ या शोधपर माहितीपटानं असे धक्कादायक दावे केले आहेत, ज्यामुळं क्रीडा जग हादरलं आहे. या चौकशांपैकी सर्वात महत्त्वाची चौकशी भारत आणि श्रीलंकेत नुकत्याच खेळल्या गेलेल्या टी-20 विश्वचषक 2026 च्या सामन्याशी संबंधित आहे, ज्यात न्यूझीलंडविरुद्ध कॅनडाच्या कामगिरीवर मॅच फिक्सिंगचे गंभीर आरोप लावण्यात आले आहेत.

हेही वाचा : डी कॉकच्या शतकानंतरही घरच्या मैदानावर मुंबईचा पराभव; पंजाबचा सलग चौथा विजय

विश्वचषकातील षटकावरुन संशय अधिकच बळावला :

ही चौकशी विशेषतः न्यूझीलंडच्या डावातील पाचव्या षटकावर केंद्रित आहे, जे कॅनडाचा तरुण कर्णधार दिलप्रीत बाजवानं टाकलं होतं. स्पर्धेच्या सुरुवातीच्या केवळ तीन आठवड्यांपूर्वी कर्णधार म्हणून नियुक्त झालेल्या बाजवानं, त्या षटकात नो-बॉल आणि वाईड टाकून 15 धावा दिल्या, ज्यामुळं सामन्याचं चित्र पूर्णपणे पालटलं. ही केवळ खराब गोलंदाजी होती की यात सट्टेबाजी करणाऱ्या सिंडिकेटचा सहभाग होता, हे निश्चित करण्यासाठी आयसीसी आता सखोल चौकशी करत आहे.

लीक झालेली ऑडिओ क्लिप आणि संघ निवडीतील भ्रष्टाचार :

हा भ्रष्टाचाराचा घोटाळा केवळ मैदानापुरता मर्यादित नाही, कारण एका लीक झालेल्या टेलिफोन रेकॉर्डिंगमुळं संघ निवडीतील एक मोठा घोटाळा उघडकीस आला आहे. माजी प्रशिक्षक खुर्रम चौहान यांनी दावा केला आहे की, क्रिकेट कॅनडा बोर्डाच्या वरिष्ठ सदस्यांनी राष्ट्रीय संघात विशिष्ट खेळाडूंचा समावेश करण्यासाठी त्यांच्यावर दबाव टाकला होता. माजी प्रशिक्षक पुबुडू दस्सनायके यांनीही या आरोपांना दुजोरा दिला असून, 2024 च्या विश्वचषकादरम्यान संघ निवडीतील हस्तक्षेपाला विरोध केल्यामुळं आपल्याला बडतर्फ करण्याची धमकी देण्यात आल्याचं म्हटलं आहे.

फसवणुकीचं प्रकरण :

प्रशासकीय स्तरावरही कॅनडा क्रिकेटची प्रतिमा डागाळली आहे, कारण माजी सीईओ सलमान खान यांच्यावर चोरी आणि फसवणुकीचे फौजदारी आरोप आहेत. खेळाडूंची परिस्थितीही अत्यंत दयनीय असल्याचं म्हटलं जात आहे, कारण त्यांना विश्वचषकाची बक्षीस रक्कम मिळण्यास केवळ विलंबच झाला नाही, तर व्यावसायिक करारांशिवाय दीर्घ काळासाठी त्यांना कमी मानधनावर ठेवण्यात आलं होतं. खेळाची सचोटी जपण्यासाठी या सर्व बाबींची बारकाईनं चौकशी करत असल्याचं आयसीसीनं स्पष्ट केलं आहे.