Pune Metro Leakage : काल पुण्यात मान्सूनपूर्व पावसान धुमाकूळ घातला, पण या पहिल्याच पावसाट पुण्याच्या हजारो कोटी खर्चून बनवलेल्या मेट्रोची खरी परिस्थिती प्रवासांना अनुभवाला मिळाली. पहिल्याच पावसात मेट्रोत गळणारं हे पाणी बघून अनेकांनी यावर आता मीम बनवायला सुरू केलीये. पण हा विषय फक्त मीमचा नाहीये, कोट्यवधी रुपये खर्चून बनवलेल्या मेट्रोची ही दयनीय आणि गळकी अवस्था पाहून पुणेकर जोरदार चिडलेत. त्याचबरोबर प्रशासनाच्या गैरकारभाराचा हा एक प्रकारे दाखलाच मिळाला आहे, असं म्हणावं लागेल.

पुण्यात शुक्रवारी झालेल्या मुसळधार पावसामुळे पिंपरी-स्वारगेट पर्पल लाईनवरील धावत्या मेट्रो कोचच्या छतातून पाणी गळती झाल्याची धक्कादायक घटना समोर आली आहे. या पहिल्याच साधारण पावसाने पुणे मेट्रोच्या आधुनिक पायाभूत सुविधांच्या दर्जाची पोलखोल केली असून, प्रवाशांना धावत्या ट्रेनमध्येच छत्री उघडण्याची किंवा भिजत प्रवास करण्याची वेळ आली आहे. या घटनेचा व्हिडिओ सोशल मीडियावर वाऱ्यासारखा व्हायरल झाल्यानंतर पुणेकरांनी महामेट्रो प्रशासनाच्या कारभाराचे अक्षरशः धिंडवडे काढले आहेत. एरवी आपल्या उपरोधिक आणि टोकदार टोमण्यांसाठी प्रसिद्ध असलेल्या पुणेकरांनी सोशल मीडियावर मेट्रोची टिंगल उडवासा सुरूवात केली असून, नव्याने सुरू झालेल्या या मेट्रोला ‘ॲक्वा मेट्रो’ किंवा ‘धावता वॉटर पार्क’ अशी उपरोधिक नावे दिली आहेत.

ट्रेनच्या आतच पाऊस पडत असल्याचा भास निर्माण झाला

शुक्रवारी संध्याकाळच्या सुमारास पुणे शहर आणि परिसरात अचानक आलेल्या मुसळधार पावसामुळे जनजीवन विस्कळीत झाले. नोकरी आणि व्यवसायावरून घरी परतणाऱ्या हजारो नागरिकांनी रस्त्यावरील वाहतूक कोंडी टाळण्यासाठी मेट्रो प्रवासाला प्राधान्य दिले होते. मात्र, पिंपरी-चिंचवड ते स्वारगेट दरम्यान धावणाऱ्या पर्पल लाईनवरील एका मेट्रो कोचमध्ये प्रवाशांना अत्यंत विचित्र अनुभवाला सामोरे जावे लागले. ट्रेन वेगात धावत असताना अचानक कोचच्या छतामधून पावसाचे पाणी वेगाने आत टपकू लागले. सुरुवातीला किरकोळ वाटणारी ही गळती काही वेळातच एवढी वाढली की जणू काही ट्रेनच्या आतच पाऊस पडत असल्याचा भास निर्माण झाला. कोचच्या मध्यभागातून पाणी थेट प्रवाशांच्या अंगावर पडत असल्याने डब्यात एकच गोंधळ उडाला.

चक्क धावत्या मेट्रोच्या डब्यात छत्र्या उघडून स्वतःचा बचाव

या अचानक उद्भवलेल्या परिस्थितीमुळे प्रवाशांचे प्रचंड हाल झाले. डब्यात उभे असलेले नागरिक स्वतःचे सामान आणि कपडे वाचवण्यासाठी इकडून तिकडे धावपळ करू लागले. ज्या प्रवाशांकडे छत्र्या होत्या, त्यांनी चक्क धावत्या मेट्रोच्या डब्यात छत्र्या उघडून स्वतःचा बचाव केला. छतातून पडणारे पाणी सातत्याने खाली साचत गेल्यामुळे मेट्रो कोचच्या संपूर्ण फर्शवर पाण्याचे तळे साचले आणि जलभराव सारखी स्थिती निर्माण झाली. यामुळे ट्रेन चालू असताना आणि थांबताना प्रवाशांना घसरून पडण्याचा मोठा धोका निर्माण झाला होता. अनेक ज्येष्ठ नागरिक आणि महिला प्रवाशांना या साचलेल्या पाण्यातून अत्यंत कसरतीने आणि भीतीच्या छायेत प्रवास करावा लागला.

पुणेकरांनी शैलीत या परिस्थितीची खिल्ली उडवण्यास सुरुवात

या संपूर्ण घटनेचे चित्रीकरण काही प्रवाशांनी आपल्या मोबाईल कॅमेऱ्यात कैद केले आणि ते सोशल मीडिया प्लॅटफॉर्म्सवर पोस्ट केले. हा व्हिडिओ समोर येताच पुणेकरांच्या संतापाचा कडाडला बांध फुटला. ट्विटर, इंस्टाग्राम आणि फेसबुकवर नेटीझन्सनी पुणे मेट्रोच्या ढिसाळ व्यवस्थापनावर आणि निकृष्ट दर्जाच्या कामावर जोरदार टीका केली आहे. नागरिकांनी थेट प्रश्न विचारला आहे की, “जर पहिल्याच मोठ्या पावसात कोट्यवधी रुपये खर्च करून बांधलेल्या मेट्रोची ही अवस्था होत असेल, तर संपूर्ण पावसाळ्यात नागरिकांच्या सुरक्षेची हमी कोण घेणार?”पुणेकरांनी आपल्या नेहमीच्या उपरोधिक शैलीत या परिस्थितीची खिल्ली उडवण्यास सुरुवात केली आहे.

उन्हाच्या त्रासानंतर प्रवाशांना घेता आला ट्रेनमध्येच मान्सूनचा आनंद

एका युझरने लिहिले की, “पुणे मेट्रोने उन्हाळ्याच्या त्रासानंतर प्रवाशांना थेट ट्रेनमध्येच मान्सूनचा मोकळा आनंद घेण्यासाठी ‘लाईव्ह शॉवर’ची मोफत व्यवस्था केली आहे, यासाठी प्रशासनाचे आभार मानले पाहिजेत.” तर दुसऱ्या एका युझरने या ट्रेनचा उल्लेख ‘ॲक्वा मेट्रो’ असा केला असून, “मेट्रो प्रवासाच्या तिकिटात आता वॉटर पार्कच्या तिकिटाचाही समावेश करण्यात आला आहे का?” असा सवाल प्रशासनाला विचारला आहे. सोशल मीडियावरील या जोरदार टिंगलटावलीमुळे महामेट्रोची अब्रू चव्हाट्यावर आली आहे.

मेट्रोसारख्या अत्याधुनिक आणि संवेदनशील सार्वजनिक वाहतूक व्यवस्था

तज्ज्ञांच्या मते, ही गळती मेट्रो कोचच्या छतावर बसवण्यात आलेल्या एअर कंडिशनिंग सिस्टीमच्या डक्टमध्ये पाणी साचल्यामुळे किंवा छताच्या जोडणीत राहिलेल्या तांत्रिक त्रुटींमुळे झाली असण्याची दाट शक्यता आहे. ट्रेन वेगाने धावत असताना हवेच्या दाबाने आणि पाण्याच्या प्रवाहाने ही गळती अधिक तीव्र झाली. मेट्रोसारख्या अत्याधुनिक आणि संवेदनशील सार्वजनिक वाहतूक व्यवस्थेमध्ये अशा प्रकारची गळती होणे हे केवळ प्रवाशांच्या गैरसोयीचे नसून शॉर्ट सर्किटसारख्या मोठ्या अपघातांना निमंत्रण देणारे ठरू शकते, अशी भीती तज्ज्ञांनी व्यक्त केली आहे.

मेट्रो प्रशासनाच्या कार्यक्षमतेवर आणि देखभालीच्या पद्धतीवर मोठे प्रश्नचिन्ह

या गंभीर प्रकारानंतर पुणे मेट्रो प्रशासनाच्या कार्यक्षमतेवर आणि देखभालीच्या पद्धतीवर मोठे प्रश्नचिन्ह निर्माण झाले आहे. पावसाळा पूर्व तयारीचा दावा करणाऱ्या प्रशासनाचा फुगा पहिल्याच पावसात फुटल्याचे या घटनेवरून स्पष्ट झाले आहे. महामेट्रोने या घटनेची गंभीर दखल घेऊन तातडीने संबंधित कोच बाजूला करणे, गळतीचे नेमके कारण शोधणे आणि सर्वच ट्रेन्सची सुरक्षा तपासणी करण्यात येत आहे. नागरिकांमधून आता या निष्काळजीपणाला जबाबदार असणाऱ्या अधिकाऱ्यांवर आणि कंत्राटदारांवर कडक कारवाई करण्याची मागणी केली जात आहे.