Tukaram Mundhe FDA Raids : वर्षभरापासून कँटिनमधील अस्वच्छता आणि खाद्यपदार्थांच्या दर्जाबाबत तक्रारी करूनही दखल घेतली जात नसल्याचा आरोप; कर्मचाऱ्यांनी FDA कडे धाव घेतल्यानंतर आठवडाभरात कारवाई.

अन्न व औषध प्रशासनाचे आयुक्त तुकाराम मुंढे यांच्या नेतृत्वाखालील FDA विभागाने मुंबई पोलीस दलाच्या नागपाडा येथील कँटिनवर कारवाई केली आहे. या कँटिनमधील अस्वच्छता (canteen unhygienic) आणि खाद्यपदार्थांच्या दर्जाबाबत तक्रारी प्राप्त झाल्यानंतर विभागाने तपासणी केली. त्यानंतर कँटिन चालकाला ७५ हजार रुपयांचा दंड ठोठावण्यात आल्याची माहिती समोर आली आहे. या कारवाईमुळे गेल्या अनेक महिन्यांपासून तक्रारी करणाऱ्या पोलीस कर्मचाऱ्यांना दिलासा मिळाल्याचे सांगितले जात आहे.

वर्षभर तक्रारी, तरीही दखल नसल्याचा आरोप

मुंबई पोलीस (Mumbai Police) दलाच्या नागपाडा येथील मोटार ट्रान्सपोर्ट विभागाच्या कँटिनमध्ये मिळणाऱ्या खाद्यपदार्थांच्या गुणवत्तेबाबत आणि स्वच्छतेबाबत कर्मचारी गेल्या वर्षभरापासून तक्रारी करत होते. मात्र, या तक्रारींवर अपेक्षित कार्यवाही होत नसल्याने कर्मचाऱ्यांनी थेट अन्न व औषध प्रशासनाकडे धाव घेतली. कर्मचाऱ्यांकडून तक्रार प्राप्त झाल्यानंतर FDA विभागाने त्याची दखल घेतली. त्यानंतर संबंधित कँटिनची तपासणी करण्यात आली आणि अस्वच्छतेच्या कारणावरून चालकावर ७५ हजार रुपयांची दंडात्मक कारवाई करण्यात आली. तक्रार केल्यानंतर अवघ्या आठवडाभरात कारवाई झाल्याने हा विषय चर्चेत आला आहे.

तुकाराम मुंढेंची भेसळखोरांविरोधातील मोहीम सुरूच

दरम्यान, तुकाराम मुंढे यांनी मुंबईत घेतलेल्या पत्रकार परिषदेत भेसळयुक्त खाद्यतेलाविरोधातील कारवाई सुरूच राहणार असल्याचे स्पष्ट केले. खाद्यपदार्थ (Food Item) तयार करताना योग्य आणि दर्जेदार तेलाचा वापर करणे आवश्यक असल्याचे त्यांनी सांगितले. मुंढे यांनी दिलेल्या माहितीनुसार, खाद्यतेलाच्या आतापर्यंत १,०८९ तपासण्या करण्यात आल्या असून, ८० परवाने रद्द करण्यात आले आहेत. तसेच २८ हजार ७५३ क्विंटल माल जप्त करण्यात आल्याचे त्यांनी सांगितले.

कालबाह्य अन्न पुन्हा वापरल्यास कारवाई

कालबाह्य किंवा खराब झालेले अन्नपदार्थ पुन्हा वापरात आणले जाण्याच्या प्रकारांना आळा घालण्यासाठी FDA कडून नियम अधिक स्पष्ट करण्यात येत आहेत. (Expired Food Package) कालबाह्य, परत आलेले किंवा खराब झालेले अन्न पूर्णपणे नष्ट केल्याचा पुरावा संबंधित कंपनीला द्यावा लागेल, अशी माहितीही मुंढे यांनी दिली. हॉटेल, दूध व दुग्धजन्य पदार्थ, खाद्यतेल आणि शालेय खाद्यपदार्थ यांसारख्या क्षेत्रांसाठी नियमांचे पालन सुनिश्चित करण्यावर विभागाचा भर असल्याचे त्यांनी स्पष्ट केले. अन्न व्यवसाय करणाऱ्या कंपन्या आणि विक्रेत्यांनी स्वच्छता, अन्नाचा दर्जा आणि सुरक्षिततेबाबत जबाबदारीने काम करणे आवश्यक आहे. नागपाडा येथील पोलीस कँटिनवरील कारवाईमुळे सार्वजनिक ठिकाणी आणि संस्थांच्या कँटिनमध्ये अन्नसुरक्षेचे नियम पाळले जात आहेत का, हा प्रश्न पुन्हा चर्चेत आला आहे.

हेही वाचा :  FDA New Rules : तुकाराम मुंढेंचा ई-कॉमर्स कंपन्यांना इशारा; कालबाह्य खाद्यपदार्थ विकल्यास कठोर कारवाई