Bank Holiday 21 September 2026: उद्या सोमवार, २१ सप्टेंबर २०२६ रोजी देशातील काही राज्यांमध्ये बँका बंद राहणार आहेत. वाचा याबाबत अधिक सविस्तर माहिती.

सप्टेंबर महिन्याच्या सुरुवातीला अनेक जण बँकेशी संबंधित कामांचे नियोजन करतात. मात्र, उद्या म्हणजेच सोमवार, २१ सप्टेंबर रोजी देशातील काही भागांमध्ये बँकांच्या शाखांना सुट्टी असणार आहे. त्यामुळे चेक जमा करणे, रोख रक्कम काढणे, कागदपत्रांशी संबंधित काम किंवा इतर बँकिंग व्यवहारांसाठी शाखेत जाणार असाल, तर आधी आपल्या शहरातील बँक सुरू आहे की नाही, हे तपासून घेणं फायदेशीर ठरेल.

रिझर्व्ह बँक ऑफ इंडियाच्या सुट्टीच्यावेळापत्रकानुसार, २१ सप्टेंबर रोजी स्थानिक सण आणि महत्वाच्या दिवसांमुळे काही ठिकाणी बँकांचे प्रत्यक्ष कामकाज बंद राहणार आहे.

हेही वाचा: मुंबई कोस्टल रोडवर काळरात्र! भरधाव BMWचा अपघात, तिघांचा मृत्यू; एक तरुण गंभीर

कुठे बंद राहतील बँकांच्या शाखा?

21 सप्टेंबर रोजी आसाम आणि केरळमध्ये बँकांना स्थानिक कारणांमुळे सुट्टी आहे. आसाममध्ये श्रीमंत शंकरदेव जन्मोत्सव, तर केरळमध्ये श्री नारायण गुरु समाधी दिन पाळला जात असल्याने या दोन्ही राज्यांमध्ये बँकांच्या शाखा बंद राहतील.

या दिवशी संबंधित राज्यांतील सरकारी तसेच खासगी बँकांच्या शाखांचे कामकाज होणार नाही. मात्र, ऑनलाइन बँकिंग, मोबाइल बँकिंग आणि ATMसारख्या डिजिटल सुविधा उपलब्ध राहण्याची शक्यता आहे.

श्रीमंत शंकरदेव जन्मोत्सवाचे महत्त्व

आसामच्या सामाजिक आणि सांस्कृतिक इतिहासात श्रीमंत शंकरदेव यांना विशेष स्थान आहे. ते संत, कवी आणि समाजसुधारक म्हणून ओळखले जातात.

त्यांनी आसाममध्ये भक्ती परंपरेचा प्रसार करण्याबरोबरच सामाजिक आणि धार्मिक एकतेचा संदेश दिला. त्यांच्या जन्मदिनानिमित्त आसाममध्ये विविध धार्मिक आणि सांस्कृतिक कार्यक्रम आयोजित केले जातात.

केरळमध्ये नारायण गुरु समाधी दिन

केरळमध्ये 21 सप्टेंबरला श्री नारायण गुरु समाधी दिन पाळला जातो. समाजातील जातीय विषमता आणि भेदभावाविरोधात श्री नारायण गुरु यांनी काम केलं.

वर्कला येथील शिवगिरी मठाशी हा दिवस विशेषतः जोडला जातो. त्यांच्या सामाजिक आणि आध्यात्मिक कार्याच्या स्मरणार्थ विविध कार्यक्रम आयोजित केले जातात.

महाराष्ट्रात बँका सुरू राहणार

महाराष्ट्रातील ग्राहकांसाठी दिलासादायक बाब म्हणजे 21 सप्टेंबर रोजी महाराष्ट्रात बँकांना या कारणासाठी सुट्टी नाही. त्यामुळे मुंबई, पुणे, नागपूर, नाशिक आणि राज्यातील इतर भागांमध्ये बँकांच्या शाखा नियमितपणे सुरू राहण्याची अपेक्षा आहे.

याचप्रमाणे दिल्ली, उत्तर प्रदेश, बिहार, कर्नाटक, ओडिशा, तामिळनाडू, आंध्र प्रदेश, गोवा, गुजरात, मध्य प्रदेश आणि तेलंगणा यांसारख्या अनेक राज्यांमध्येही शाखा सुरू राहतील.

सप्टेंबरच्या उर्वरित दिवसांत बँकांच्या सुट्ट्या

सप्टेंबर महिन्यात स्थानिक सण आणि नियमित सुट्ट्यांमुळे काही शहरांमध्ये बँकांचे कामकाज बंद राहणार आहे.

20 सप्टेंबर – रविवार
21 सप्टेंबर – श्रीमंत शंकरदेव जन्मोत्सव आणि श्री नारायण गुरु समाधी दिन; संबंधित राज्यांमध्ये बँका बंद
22 सप्टेंबर – करमा पूजेनिमित्त रांचीमध्ये सुट्टी
23 सप्टेंबर – महाराजा हरिसिंह जयंतीनिमित्त जम्मू आणि श्रीनगरमध्ये सुट्टी
25 सप्टेंबर – इंद्रजात्रेनिमित्त गंगटोकमध्ये बँका बंद
26 सप्टेंबर – चौथा शनिवार
27 सप्टेंबर – रविवार

बँकांच्या सुट्ट्या राज्य आणि शहरानुसार वेगळ्या असू शकतात. त्यामुळे शाखेत प्रत्यक्ष जाण्यापूर्वी आपल्या बँकेच्या स्थानिक शाखेचे वेळापत्रक तपासणे योग्य ठरेल.