Swiggy Share Price: ओनलाईन फूड डिलिव्हरी कंपनी स्वीगी लिमिटेडच्या शेअरमध्ये शुक्रवार मोठी घसरण पाहायला मिळाली. व्यवहारादरम्यान कंपनीचा शेअर सुमारे ७ टक्क्यांनी खाली आला. कंपनीच्या संचालक मंडळाने परदेशी भागभांडवलाच्या मर्यादेबाबत महत्वाचा प्रस्ताव मंजूर केल्यानंतर बाजारात नकारात्मक प्रतिक्रिया उमटल्याचे दिसून आले.
शुक्रवारी स्वीगी लिमिटेडच्या शेअरमध्ये सुमारे ७ टक्क्यांची घसरण झाली. कंपनीच्या संचालक मंडळाने परदेशी गुंतवणुकीवरील मर्यादा १०० टक्क्यांवरून ४९.५० % पर्यंत आणण्याचा प्रस्ताव मंजूर केल्यानंतर गुंतवणूकदारांमध्ये चिंता वाढली. या निर्णयानंतर शेअर विक्रीचा दबाव वाढल्याचे दिसून आले.
कंपनीने गुरुवारी सायंकाळी हा निर्णय जाहीर केला. मात्र या प्रस्तावाला अंतिम मंजुरी १८ ऑगस्ट रोजी होणाऱ्या वार्षिक सर्वसाधारण सभेत (AGM) भागधारकांकडून मिळणे आवश्यक आहे.
हेही वाचा: ‘रामायण’चा ट्रेलर आज नाही होणार रिलीज; जाणून घ्या पुढे ढकलण्यामागचं नेमकं कारण
कंपनीने हा निर्णय का घेतला?
स्विगीने भारतीय मालकी असलेल्या आणि नियंत्रित कंपनीचा (Indian Owned and Controlled Company – IOCC) दर्जा मिळवण्यासाठी यापूर्वीही प्रयत्न केले होते. यासाठी कंपनीला आपल्या आर्टिकल्स ऑफ असोसिएशन (AoA) मध्ये बदल करणे आवश्यक होते.
मात्र मे महिन्यात आवश्यक भागधारकांची मंजुरी न मिळाल्यामुळे हा प्रस्ताव पुढे जाऊ शकला नव्हता. आता संचालक मंडळाने पुन्हा आवश्यक बदलांना मंजुरी दिली आहे.
52 आठवड्यांच्या नीचांकी पातळीच्या जवळ शेअर
शुक्रवारी बीएसईवर स्विगीचा शेअर 260 रुपयांवर (Swiggy Share Price) उघडला. मात्र दिवसभरात तो 7 टक्क्यांहून अधिक घसरत 242.60 रुपये या दिवसातील नीचांकी पातळीवर पोहोचला.
सध्या कंपनीचा 52 आठवड्यांतील नीचांकी स्तर 235.85 रुपये, तर उच्चांकी स्तर 473 रुपये आहे. कंपनीचे बाजार भांडवल (Market Capitalisation) सुमारे 68,386 कोटी रुपये आहे.
गेल्या वर्षभरात मोठी घसरण
गेल्या तीन महिन्यांत स्विगीच्या शेअरमध्ये सुमारे 13 टक्क्यांची घसरण झाली आहे. तर मागील एका वर्षात कंपनीच्या शेअरची किंमत जवळपास 40 टक्क्यांनी घसरली आहे. त्याच कालावधीत सेन्सेक्समध्ये सुमारे 8 टक्क्यांची वाढ झाली असून, स्विगीची कामगिरी बाजारापेक्षा कमकुवत राहिली आहे.
संचालक मंडळाचे इतर महत्त्वाचे निर्णय
परदेशी गुंतवणुकीवरील मर्यादा निश्चित करण्याबरोबरच संचालक मंडळाने FEMA (Foreign Exchange Management Act) नियमांनुसार कंपनीच्या AoA मध्ये बदल करण्यासही मंजुरी दिली आहे.
