political mudslinging social media debate : महाराष्ट्रातील राजकीय वर्तुळात नेत्यांमधील शब्दयुद्ध आणि सोशल मीडियावरील वाद प्रतिवाद नवीन नाहीत, परंतु शिवसेना उद्धव बाळासाहेब ठाकरे पक्षाचे खासदार संजय राऊत आणि भारतीय जनता पक्षाचे नेते नवनाथ बन यांच्यात उफाळलेला ताजा वाद आता एका अत्यंत संवेदनशील वळणावर येऊन पोहोचला आहे. हा वाद केवळ दोन राजकीय पक्षांमधील चिखलफेक उरलेला नसून, त्याला थेट देशातील युवा पिढीची अस्मिता, राष्ट्रभक्ती, जागतिक विचारसरणी आणि धार्मिकतेचे स्वरूप प्राप्त झाले आहे. खासदार संजय राऊत यांनी रशियन क्रांतीचे जनक व्लादिमीर लेनिन यांच्या एका विधानाचा हवाला देत भारतीय तरुणांच्या विचारसरणीवर केलेल्या एका टिप्पणीमुळे या वादाची ठिणगी पडली. त्याला नवनाथ बन यांनी अत्यंत आक्रमक उत्तर दिल्याने आता राज्यातील राजकीय वातावरण पूर्णपणे तापले असून दोन्ही बाजूंचे समर्थक आमनेसामने आले आहेत.

या संपूर्ण प्रकरणाची सुरुवात खासदार संजय राऊत यांच्या एका सोशल मीडिया पोस्टमुळे झाली. आपल्या नेहमीच्या आक्रमक आणि उपरोधिक शैलीत वक्तव्ये करण्यासाठी प्रसिद्ध असलेल्या राऊत यांनी सर्व भारतीयांना उद्देशून एक संदेश लिहिला होता. त्यांनी आपल्या पोस्टमध्ये लिहिले होते की, जर तुम्हाला एखादे राष्ट्र नष्ट करायचे असेल, तर त्या देशातील युवकांची विचार करण्याची क्षमता नष्ट करा, असे व्लादिमीर लेनिन यांचा कोट आहे. या विधानाचा संदर्भ जोडत त्यांनी कंसात पुढे अत्यंत गंभीर टिप्पणी केली की, सध्या भारतीय युवक असाच भरकटलेला आणि मंद झाला आहे, जय श्रीराम. राऊत यांच्या या विधानामुळे राजकीय आणि सामाजिक वर्तुळात प्रचंड संतापाची लाट उसळली. देशातील तरुणांना थेट भरकटलेला आणि मंद बुद्धीचा म्हणणे आणि त्यासोबत हिंदूंचे श्रद्धास्थान असलेल्या जय श्रीराम या घोषणेचा नकारात्मक जोड देणे अनेकांना रुचले नाही. राऊत यांचा रोख प्रामुख्याने सत्ताधारी भाजपच्या विचारसरणीला पाठिंबा देणाऱ्या तरुणांवर होता, परंतु त्यांनी वापरलेले शब्द संपूर्ण तरुण वर्गाचा अपमान करणारे ठरले, असा सूर उमटू लागला.

नवनाथ बन यांनी अत्यंत टोकदार शब्दांत प्रत्युत्तर

संजय राऊत यांच्या या विधानाला भाजपचे नेते नवनाथ बन यांनी अत्यंत टोकदार शब्दांत प्रत्युत्तर दिले. बन यांनी आपल्या उत्तरात लिहिले की, जनाब संजय राऊतजी, लेनिनचे कोट शोधताना तुम्ही इतके गुंग झालात की भारतीय युवक काय करत आहेत हेच विसरलात. ज्यांना तुम्ही मंद म्हणता तेच युवक आज स्टार्टअप उभारतायत, चंद्रावर मोहिमा पाठवतायत, देश चालवतात, सीमेवर उभे राहतात, आणि मतदानातून तुमच्यासारख्या लोकांना वास्तवही दाखवतायत. बन यांनी आपल्या उत्तरातून भारतीय तरुणांनी गेल्या काही वर्षांत विविध क्षेत्रांत केलेल्या ऐतिहासिक कामगिरीचा पाढाच राऊत यांच्यासमोर वाचला. तंत्रज्ञान, उद्योग, अंतराळ संशोधन, देशाचे रक्षण आणि लोकशाही प्रक्रिया या सर्वच पातळ्यांवर तरुण आघाडीवर असताना त्यांना मंद म्हणणे हा केवळ राजकीय द्वेष आहे, असे बन यांनी म्हटलंय.

तरुण पिढी नकारात्मक राजकारणाला कंटाळली

नवनाथ बन यांनी आपल्या उत्तरात संजय राऊत यांच्या रोजच्या पत्रकार परिषदांवर आणि त्यांच्याकडून होणाऱ्या टीकेच्या स्वरूपावरही थेट भाष्य केले. त्यांनी पुढे लिहिले की, खरं तर युवकांची विचार करण्याची क्षमता संपलेली नाही, फक्त दररोज सकाळी उठून नैराश्य विकणाऱ्या राजकारणाकडे त्यांनी दुर्लक्ष करायला सुरुवात केली आहे. तरुण पिढी आता अशा नकारात्मक राजकारणाला कंटाळली असून ती विकासाच्या आणि प्रगतीबाद्द्ल बोलणाऱ्या विचारांकडे आकर्षित होत आहे, म्हणूनच ते राऊत यांच्या विधानांकडे दुर्लक्ष करत आहेत, असा टोला त्यांनी लगावला. तरुणांची विचार करण्याची क्षमता नष्ट झालेली नसून, ती अधिक प्रगल्भ झाली आहे आणि म्हणूनच ती अशा प्रकारच्या जुनाट राजकीय अपप्रचाराला बळी पडत नाही, असा युक्तिवाद बन यांनी केला.

जय श्रीराम लिहिल्यामुळे युवक भरकटले

या वादातील सर्वात संवेदनशील भाग म्हणजे जय श्रीराम या घोषणेचा झालेला वापर. संजय राऊत यांनी तरुणांना भरकटलेले म्हणताना जय श्रीराम या घोषणेचा जो उपरोधिक वापर केला होता, त्याचा नवनाथ बन यांनी समाचार घेतला. बन यांनी लिहिले की, आणि हो, जय श्रीराम लिहिल्यामुळे युवक भरकटले असे म्हणत असाल, तर भारतात रामाचा जयघोष हजारो वर्षांपासून आहे. तुम्ही मात्र अद्याप भरकटलेले आहात कारण तुम्हाला अजूनही मॉस्कोच्या सावलीत भारत दिसतो. या विधानातून बन यांनी राऊत यांच्यावर थेट वैचारिक हल्ला चढवला. शिवसेना उबाठा गट आता डाव्या विचारसरणीच्या प्रभावाखाली गेल्याचा आरोप भाजप सातत्याने करत आला आहे. राऊत यांनी रशियन कम्युनिस्ट नेते लेनिन यांच्या विचारांचा आधार घेतल्यामुळे बन यांनी त्यांना मॉस्कोच्या सावलीत भारत दिसणारा नेता अशी उपाधी दिली. भारताची संस्कृती रामाच्या नावाशी जोडलेली आहे आणि तरुण जर त्या संस्कृतीचा अभिमान बाळगत असतील, तर ते भरकटलेले नसून आपल्या मुळांशी जोडलेले आहेत, असे बन यांनी म्हणालेत.