Sunetra Pawar NCP President : अजित पवार यांचे विमान अपघातात निधन झाल्यानंतर राज्याच्या राजकारणाने वेगळे वळण घेतले. अजितदादांकडे असलेल्या उपमुख्यमंत्रिपदाची जबाबदारी आता सुनेत्रा पवार यांच्याकडे आली आहे. त्यानंतर अजितदादांचे सुपूत्र पार्थ पवार यांच्यावरही महत्त्वाची जबाबदारी दिली जाण्याची शक्यता आहे. गेल्या काही दिवसांपासून दोन्ही राष्ट्रवादींच्या विलिनीकरणाची चर्चा चालू होती परंतु अजितदादांच्या पक्षातील वरिष्ठ नेत्यांनी यात स्वारस्य न दाखवल्याने आता ही चर्चा मागे पडली आहे. असे असतानाच आता मोठी माहिती समोर येत आहे. सुनेत्रा पवार यांची राष्ट्रवादीच्या राष्ट्रीय अध्यक्षपदी निवड करण्यात आली आहे. पक्षाच्या बैठकीत एकमताने हा निर्णय घेण्यात आला आहे. सुनेत्रा पवार पक्षाच्या राष्ट्रीय अध्यक्षा झाल्यानंतर आता राज्यात नवे सुनेत्रा प सुरू झाल्याचे बोलले जात आहे.

हेही वाचा – “कबुतरं चोरीला गेली की गुन्हा दाखल होतो, मग अजितदादांच्या अपघाताचा का नाही?”; रोहित पवार संतप्त सवाल

अधिवेसनात सुनेत्रा पवार यांची राष्ट्रीय अध्यक्ष म्हणून निवड

मुंबईच्या वरळी येथे राष्ट्रवादी काँग्रेस पक्षाचे राष्ट्रीय अधिवेसन 2026 आयोजित करण्यात आले होते. या अधिवेशनासाठी पक्षाचे सर्व महत्त्वाचे आणि वरिष्ठ नेते तसेच पक्षाचे इतरही काही नेते आणि पदाधिकार उपस्थित होते. यावेळी अधिवेसनात सुनेत्रा पवार यांची राष्ट्रीय अध्यक्ष म्हणून निवड करण्याचा प्रस्ताव ठेवण्यात आला. या प्रस्तावाला सर्वच नेत्यांनी एकमताने सहमती दाखवली. आता राष्ट्रवादी पक्षाच्या राष्ट्रीय अध्यक्षपदाची जबाबदारी सुनेत्रा पवार यांच्याकडे आली आहे. पक्षाचे कार्यकारी अध्ययक्ष प्रफुल्ल पटेल हेच असतील. तर महाराष्ट्र प्रदेशाध्यक्षपदाची जबाबदारी खासदार सुनील तटकरे यांच्याकडे असेल. सुनेत्रा पवार यांच्या नावाची घोषणा प्रफुल्ल पटेल यांनी केली.

दादांकडे असलेल्या दोन महत्त्वाच्या जबाबदाऱ्या सुनेत्रा पवार यांच्याकडे

दरम्यान, अजितदादांकडे असलेल्या दोन महत्त्वाच्या जबाबदाऱ्या आता सुनेत्रा पवार यांच्याकडे आल्या आहेत. यासह सुनेत्रा पवार या बारामती विधानसभा मतदारसंघाची पोटनिवडणूकही लढवणार आहेत. तसे झाले तर ही निवडणूक बिनविरोध होईल, असा विश्वास खासदार सुप्रिया सुळे यांनी व्यक्त केला आहे. त्यामुळे भविष्यात सुनेत्रा पवार या बारामतीच्या आमदार ठरण्याची शक्यता आहे. दुसरीकडे अजितदादा आणि सुनेत्रा पवार यांचे ज्येष्ठ चिरंजीव पार्थ पवार यांच्यावरही महत्त्वाची जबाबदारी दिली जाण्याची शक्यता आहे. ते राज्यसभेत खासदार होण्याची शक्यता आहे.