Candidate dies during field test : पोलिस (Maharashtra Police Recruitment) होण्याचे स्वप्न उराशी घेऊन मैदानावर धावत असलेल्या एका उमद्या तरूणाचा दुर्दैवी मृत्यू झाल्याची धक्कादायक घटना बीडमधून समोर आले आहे. दीपक भास्कर व्हावळ (Deepak Bhaskar Waval candidate) असे या उमेदवार तरुणाचे नाव असून अस्वस्थपणामुळे मृत्यू झाल्याचे कारण सांगितले जात आहे. बीड जिल्हा पोलीस दलात (Beed Police Recruitment) १७४ पदांसाठी ८ हजार १३४ उमेदवार भरती प्रक्रियेत सहभागी आहेत. आज पहाटेपासून या भरती प्रक्रियेला सुरुवात झालीय. दुपारच्या सुमारास मैदानी चाचणी (Field test of recruitment process) सुरू असताना या उमेदवाराचा मैदानावरच दुर्दैवी मृत्यू झालाय. अचानक झालेल्या या घटनेनं अनेकांना मात्र जबर धक्का बसला असून परिसरात हळहळ व्यक्त केली जात आहे.

हेही वाचा – शेतकरी आणि कामगार संघटनांकडून आज भारत बंदची हाक; काय सुरु, काय बंद? वाचा सविस्तर

शवविच्छेदनासाठी उमेदवाराचा मृतदेह जिल्हा रुग्णालयात नेण्यात आला असून शवविच्छेदन अहवालानंतर मृत्यूचे कारण कळू शकणार आहे. परंतु अनेक स्वप्न उराशी बाळगून पोलीस भरती प्रक्रियेत सहभागी झालेल्या तरुणाच्या दुर्दैवी मृत्यूने हळहळ व्यक्त केली जाते. बीड जिल्हा पोलिस दलात रिक्त १७४ पदांसाठी आजपासून भरती प्रक्रियेला सुरुवात झाली. 18 तारखेपर्यंत ही प्रक्रिया पार पडणार असून ८ हजारांहून अधिक उमेदवारांनी अर्ज दाखल केले आहेत. मैदानी चाचणी आणि लेखी परीक्षा पारदर्शी करिता जिल्हा पोलीस दल वरिष्ठ अधिकारी प्रयत्नशील आहेत.

जागतिक स्तरावरील स्पर्धांमध्ये वापरले जाणारे तंत्रज्ञान उपलब्ध

या भरती प्रक्रियेदरम्यान कोणत्याही उमेदवारावर अन्याय होणार नाही, संपूर्ण प्रक्रिया पारदर्शकपणे पार पडावी याकरिता अत्याधुनिक तंत्रज्ञानाचा वापर केला जात आहे. यामध्ये धावण्याच्या चाचणीकरिता फोटो फिनीश हे जागतिक स्तरावरील स्पर्धांमध्ये वापरले जाणारे तंत्रज्ञान उपलब्ध करण्यात आलेले आहे. याबरोबरच सर्व परिसरात सीसीटीव्ही कॅमेरे आणि व्हीडीओ चित्रीकरण केले जात आहे. तसेच एखाद्या उमेदवाराने उत्तेजक द्रव घेतले आहे का, हे तपासणी करण्यासाठी रक्त चाचणीही करण्यात येतेय.