नसरापूर बलात्कार (Nasrapur Rape Case) : २ मे २०२६ रोजी पुणे जिल्ह्यातील भोर तालुक्यातील नसरापूर येथे घडलेली एक अत्यंत संतापजनक आणि मानवतेला काळिमा फासणारी घटना संपूर्ण राज्याला हादरवून सोडणारी ठरली आहे. अवघ्या चार वर्षांच्या निष्पाप चिमुकलीवर ६५ वर्षांच्या व्यक्तीने केलेल्या बलात्काराच्या या अमानुष कृत्यामुळे सर्वत्र संताप, दुःख आणि असुरक्षिततेचे वातावरण निर्माण झाले आहे. या घटनेनंतर समाजातील सर्व स्तरांतून तीव्र निषेध व्यक्त केला जात असून आरोपीस कठोरात कठोर शिक्षा देण्याची मागणी दिवसेंदिवस अधिक तीव्र होत आहे.

त्यालाही ठेचा

या प्रकरणात आरोपी भीमराव कांबळे याच्याविरोधात सर्व स्तरांतून संताप व्यक्त होत असतानाच, त्याच्या स्वतःच्या कुटुंबीयांनीही त्याची साथ सोडल्याचे स्पष्ट दिसून येते. आरोपीच्या कृत्यामुळे संतप्त झालेल्या त्याच्या पत्नीने अत्यंत कठोर शब्दांत प्रतिक्रिया देत, “जिथे त्या चिमुकलीवर अत्याचार झाला, तिथेच त्यालाही ठेचून मारा,” असे वक्तव्य केले आहे. त्यांनी स्पष्टपणे सांगितले की, अशा अमानुष कृत्य करणाऱ्या व्यक्तीशी त्यांचा कोणताही संबंध राहू शकत नाही आणि कायद्याने जी शिक्षा ठरवली जाईल तीच त्याला व्हावी.

प्राण्यांवर देखील बलात्कार

दरम्यान, स्थानिक पातळीवरून काही धक्कादायक दावेही पुढे येत आहेत. परिसरातील काही नागरिकांच्या म्हणण्यानुसार, आरोपीचे पूर्वीपासूनच वर्तन संशयास्पद आणि विचलित करणारे असल्याची चर्चा होती. त्याच्यावर प्राण्यांवरील अत्याचार केल्याचे आरोपही यापूर्वी करण्यात आले होते, आणि या कथित कृत्यांमुळे स्थानिकांमध्ये तीव्र नाराजी निर्माण झाली होती. परिणामी, समाजाच्या दबावामुळे त्याला परिसरातून हाकलून देण्यात आल्याचीही माहिती काही जणांकडून दिली जात आहे.

समाजाकडून संताप

या घटनेने महिला आणि लहान मुलांच्या सुरक्षेबाबत पुन्हा एकदा गंभीर प्रश्न उपस्थित केले आहेत. कठोर कायदे अस्तित्वात असतानाही अशा घटना घडत असल्याने त्यांच्या अंमलबजावणीतील त्रुटींवर चर्चा सुरू झाली आहे. नागरिकांकडून या प्रकरणाची जलदगतीने चौकशी करून आरोपीला कठोर शिक्षा देण्याची जोरदार मागणी होत आहे.

पीडितेला न्याय मिळणे हीच समाजाची खरी अपेक्षा असून, भविष्यात अशा घटना घडू नयेत यासाठी सर्वांनी एकत्रितपणे प्रयत्न करण्याची गरज अधोरेखित झाली आहे.