VINESH PHOGAT NEWS : एशियन गेम्समध्ये विनेश फोगाटचा समावेश न केल्याच्या प्रकरणात दिल्ली उच्च न्यायालयाने भारतीय कुस्ती महासंघाला (WFI) फटकारले आहे. या प्रकरणावर सुनावणी करताना न्यायालयाने केंद्र सरकारला स्पष्ट निर्देश दिले आहेत की, या प्रकरणाची सखोल तपासणी आणि मूल्यांकन करण्यासाठी एक तज्ज्ञ समिती स्थापन करण्यात यावी. तसेच विनेश फोगाटला 2026 एशियन गेम्सच्या निवड ट्रायलमध्ये सहभागी होण्याची संधी मिळावी याची खात्री करण्याचेही निर्देश देण्यात आले आहेत.
सुनावणीदरम्यान न्यायालयाने WFI ला प्रश्न विचारला की, विनेश फोगाटला देशांतर्गत स्पर्धांसाठी “अपात्र” का घोषित करण्यात आले. न्यायालयाने स्पष्ट केले की खेळाडू आणि संघ यांच्यातील वादाचा परिणाम खेळावर होऊ नये आणि कोणत्याही परिस्थितीत खेळाडूंचे हित सर्वात महत्त्वाचे आहे.यापूर्वी सोमवारी झालेल्या सुनावणीत न्यायालयाने विनेश फोगाटला 30 आणि 31 मे रोजी होणाऱ्या एशियन गेम्स निवड ट्रायलमध्ये सहभागी होण्यास अंतरिम दिलासा देण्यास नकार दिला होता. न्यायमूर्ती पुरुषेंद्र कुमार कौरव यांच्या खंडपीठाने असे म्हटले होते की, विनेशला आधीच देशांतर्गत स्पर्धांसाठी अपात्र घोषित करण्यात आले असल्यामुळे सध्या कोणताही तातडीचा दिलासा देता येणार नाही.
शिस्तभंग आणि अँटी-डोपिंग नियमांचे पालन न केल्याचा आरोप
WFI ने 9 मे रोजी जारी केलेल्या नोटिसमध्ये विनेश फोगाटवर 26 जूनपर्यंत देशांतर्गत स्पर्धांमध्ये सहभागी होण्यास बंदी घातली होती, ज्यामध्ये राष्ट्रीय ओपन रँकिंग स्पर्धेचाही समावेश होता. महासंघाने तिच्यावर शिस्तभंग आणि अँटी-डोपिंग नियमांचे पालन न केल्याचा आरोप केला आहे. तसेच निवृत्तीनंतर पुनरागमन करणाऱ्या खेळाडूंनी युनायटेड वर्ल्ड रेसलिंगच्या नियमांनुसार सहा महिने आधी सूचना देणे आवश्यक असल्याचेही WFI ने नमूद केले आहे.
वैयक्तिक हित आणि देशाचे क्रीडा हित यांचा समतोल राखणे आवश्यक
दरम्यान, WFI च्या नवीन निवड धोरणावरही प्रश्न उपस्थित करण्यात आले आहेत, ज्यामध्ये केवळ अलीकडील राष्ट्रीय स्पर्धांतील पदकविजेत्या खेळाडूंनाच एशियन गेम्स ट्रायलसाठी पात्र ठरवले जात असल्याचे म्हटले आहे. या धोरणामुळे अनुभवी खेळाडूंवर अन्याय होऊ शकतो, असा विनेशचा दावा आहे. सुनावणीदरम्यान न्यायालयाने हेही नमूद केले की विनेश सध्या मातृत्व रजेवर आहे, मात्र अशा परिस्थितीतही खेळाडूंचे वैयक्तिक हित आणि देशाचे क्रीडा हित यांचा समतोल राखणे आवश्यक आहे.
