US-Iran Conflict: होर्मुझ समुद्रधुनीत एका व्यापारी मालवाहू जहाजावर झालेल्या ड्रोन हल्ल्यानंतर अमेरिकेने इराणमधील काही लष्करी ठिकाणांवर हवाई कारवाई केल्याचा दावा केला आहे. या घटनेमुळे मध्य पूर्वेतील तणाव पुन्हा एकदा वाढला आहे.

अमेरिकेच्या सेंट्रल कमांड (CENTCOM) ने प्रसिद्ध केलेल्या माहितीनुसार, २५ जून रोजी ओमानच्या किनाऱ्याजवळून होर्मुझ सामुद्रधुनी पार करणाऱ्या एका व्यापारी जहाजावर ड्रोनद्वारे हल्ला करण्यात आला. या घटनेच्या दुसऱ्या दिवशी, म्हणजे २६ जून रोजी, अमेरिकेने प्रत्युत्तर म्हणून इराणमधील काही लष्करी ठिकणांवर हवाई हल्ले केल्याचे सांगितले.

हेही वाचा: मोठी बातमी! राम मंदिर ट्रस्टचे चंपत राय आणि अनिल मिश्रा यांनी दिला राजीनामा; नेमकं कारण काय?

क्षेपणास्त्र साठे, ड्रोन केंद्रे आणि रडार यंत्रणा लक्ष्य

अमेरिकन लष्कराच्या माहितीनुसार, या कारवाईत इराणमधील क्षेपणास्त्र साठवण केंद्रे, ड्रोन ऑपरेशन तळ आणि किनारी रडार यंत्रणा लक्ष्य करण्यात आली. अमेरिकेने असा दावा केला आहे की, M/V Ever Lovely या सिंगापूरच्या ध्वजाखाली नोंदणीकृत मालवाहू जहाजावर एकमार्गी हल्लेखोर ड्रोनचा वापर करून हल्ला करण्यात आला.

अमेरिकेच्या मते, व्यापारी जहाजावर झालेला हा हल्ला आंतरराष्ट्रीय सागरी सुरक्षेच्या नियमांचे तसेच दोन्ही देशांतील युद्धविरामाच्या अटींचे उल्लंघन करणारा आहे.

व्यापारी जहाजांच्या सुरक्षेसाठी अमेरिका सज्ज

CENTCOM ने स्पष्ट केले की, होर्मुझ सामुद्रधुनीतून ये-जा करणाऱ्या व्यापारी जहाजांच्या सुरक्षेसाठी अमेरिकन नौदल आणि हवाई दल सतत तैनात राहतील. परिसरातील सागरी वाहतूक सुरळीत आणि सुरक्षित ठेवण्यासाठी आवश्यक ती सर्व पावले उचलली जातील, असेही त्यांनी म्हटले. (LS Marathi News Channel)

ब्रिटननेही घटनेची केली पुष्टी

ब्रिटनच्या United Kingdom Maritime Trade Operations (UKMTO) ने देखील ओमानच्या किनाऱ्याजवळ एका कंटेनर जहाजाला प्रोजेक्टाइलचा फटका बसल्याची माहिती दिली आहे. या घटनेत कोणतीही जीवितहानी झाली नसल्याचे ब्रिटिश अधिकाऱ्यांनी स्पष्ट केले.

IMO ने जहाजांच्या हालचालींवर तात्पुरते निर्बंध

आंतरराष्ट्रीय सागरी संघटना (IMO) ने पर्शियन आखातातील काही जहाजांच्या हालचालींवर तात्पुरते निर्बंध घातले आहेत. इतर जहाजांच्या सुरक्षिततेची खात्री होईपर्यंत स्थलांतर किंवा मार्गदर्शनाची प्रक्रिया थांबवण्यात आली आहे.

IMO चे महासचिव अर्सेनियो डोमिंगुएज यांच्या माहितीनुसार, अलीकडच्या काळात 115 जहाजांनी होर्मुझ सामुद्रधुनी पार केली असून, सुमारे 500 जहाजे अजूनही त्या परिसरात आहेत.

ट्रम्प यांची तीव्र प्रतिक्रिया

अमेरिकेचे राष्ट्राध्यक्ष डोनाल्ड ट्रम्प यांनी व्यापारी जहाजावरील हल्ल्याचा तीव्र शब्दांत निषेध केला. त्यांनी Truth Social वर केलेल्या पोस्टमध्ये म्हटले की, जहाजावर चार ड्रोनद्वारे हल्ला करण्यात आला होता. त्यापैकी एक ड्रोन जहाजाला धडकला, तर उर्वरित तीन ड्रोन अमेरिकन संरक्षण यंत्रणेने पाडले.

इराणला स्पष्ट इशारा

व्हाईट हाऊसमधील पत्रकार परिषदेत ट्रम्प यांना या घटनेबाबत विचारण्यात आले असता त्यांनी सांगितले, “याचे परिणाम इराणला लवकरच दिसतील.”

ते पुढे म्हणाले की, व्यापारी जहाजावर हल्ला करणे अत्यंत चुकीचे होते. अशा प्रकारच्या कारवायांना अमेरिका योग्य वेळी आणि योग्य पद्धतीने प्रत्युत्तर देईल, असा इशाराही त्यांनी दिला.