अमेरिकेचे राष्ट्राध्यक्ष डोनाल्ड ट्रम्प यांनी शुक्रवारी (19 सप्टेंबर 2025) एक आदेश जारी केला ज्यामध्ये H-1B व्हिसाचे शुल्क 1,00,000 अमेरिकन डॉलर्स किंवा अंदाजे 9 दशलक्ष डॉलर्सपर्यंत वाढवण्यात आले आहे. ट्रम्प यांच्या या निर्णयामुळे अमेरिकेतील भारतीय कामगारांवर विपरीत परिणाम होण्याची शक्यता आहे. दरम्यान, शुक्रवारी ट्रम्प यांनी हा आदेश काढल्यानंतर व्हाईट हाऊसच्या एका अधिकाऱ्याने शनिवारी (20 सप्टेंबर 2025) स्पष्ट केले, की एच-1बी व्हिसासाठी 1,00,000 अमेरिकन डॉलर्स शुल्क फक्त नवीन अर्जदारांना लागू होईल.

नेमकं H-1B व्हिसा म्हणजे काय?

H-1B व्हिसा हा अमेरिकन नॉन-इमिग्रंट वर्क व्हिसा आहे. या व्हिसा अंतर्गत अमेरिकन कंपन्यांना परदेशी कामगारांना कामावर ठेवता येते. हा व्हिसा सामान्यतः शास्त्रज्ञ, सॉफ्टवेअर अभियंते, प्रोग्रामर आणि तांत्रिक तज्ञांना दिला जातो. सुरुवातीला तो तीन वर्षांसाठी वैध असतो आणि तो सहा वर्षांपर्यंत वाढवता येतो.

नवीन नियम काय आहे? कधी पासून लागू होणार?

व्हाईट हाऊसच्या प्रेस रिलीजनुसार, एच-1बी व्हिसाचे नवे नियम 21 सप्टेंबर 2025 पासून लागू होतील. राष्ट्राध्यक्ष डोनाल्ड ट्रम्प यांनी जाहीर केल्याप्रमाणे, आता आजपासून (२१ सप्टेंबर २०२५) प्रत्येक अर्जासोबत 1,00,000 अमेरिकन डॉलर्स शुल्क आकारले जाईल. या शुल्काशिवाय दाखल केलेले अर्ज अवैध मानले जातील आणि अशा कामगारांना अमेरिकेत प्रवेश दिला जाणार नाही.

H-1B व्हिसा नियम बदलण्यामागे कारण काय?

याविषयी सांगताना राष्ट्राध्यक्ष ट्रम्प यांनी म्हटलं की, H-1B व्हिसाचा गैरवापर होत आहे. अनेक आउटसोर्सिंग कंपन्या त्यावर अवलंबून असतात आणि त्यामुळे राष्ट्रीय सुरक्षेला धोका निर्माण होतो. कायदा अंमलबजावणी संस्था आता या गैरवापराची चौकशी करत आहेत.

नवीन नियमानुसार, कंपन्यांनी कोणत्याही H-1B याचिकेवर प्रक्रिया सुरू करण्यापूर्वी शुल्क भरल्याचे प्रमाणपत्र घेणे अनिवार्य आहे. हे प्रमाणपत्र त्यांना स्वतःकडे सुरक्षित ठेवावे लागेल आणि गरज भासल्यास सरकारकडे सादर करावे लागेल.

नवीन H-1B व्हिसा नियमांमध्ये कोणते बदल आहेत?

– हे एकवेळ शुल्क आहे जे फक्त प्रत्येक नवीन H-1B व्हिसा अर्जावर लागू होईल.

– हा नियम फक्त नवीन व्हिसांना लागू होईल, विद्यमान व्हिसा धारकांना किंवा त्यांच्या नूतनीकरणासाठी नाही.

– पुढील H-1B लॉटरी सायकलमध्ये हा नियम पहिल्यांदाच लागू होईल.

– याचा परिणाम 2025 च्या लॉटरीच्या विजेत्यांवर होणार नाही.

– ज्यांच्याकडे आधीच H-1B व्हिसा आहे किंवा ज्यांनी 2025 ची लॉटरी जिंकली आहे. त्यांना काळजी करण्याचे कारण नाही.