नवी दिल्ली :
इंडिगोच्या विमानसेवेभोवतीचं संकट सलग सहाव्या दिवशीही सुरुच आहे. रविवार, 7 डिसेंबर रोजी दिल्ली विमानतळावर इंडिगोच्या अनेक विमानसेवा रद्द झाल्यानं प्रवाशांना वाढत्या अडचणींना तोंड द्यावं लागलं. इंदिरा गांधी आंतरराष्ट्रीय विमानतळावर लांब रांगा लागल्या होत्या, प्रवाशांना तासनतास वाट पाहावी लागली. एएनआय नुसार, दिल्ली विमानतळावरील उड्डाण माहिती स्क्रीनवर अनेक इंडिगोच्या उड्डाणं रद्द झाल्याचं दाखवण्यात येत होतं.
#WATCH | Long queues of passengers seen at Indira Gandhi International Airport in Delhi amid IndiGo flight cancellations. pic.twitter.com/MVk3T2Deyg
— ANI (@ANI) December 7, 2025
अनेक विमानतळावरुन उड्डाणं रद्द :
चेन्नई विमानतळावरही 30 हून अधिक उड्डाणं रद्द करण्यात आली. मुंबईच्या छत्रपती शिवाजी महाराज आंतरराष्ट्रीय विमानतळावरही इंडिगोच्या अनेक प्रवाशांना उड्डाणं रद्द आणि विलंबाचा सामना करावा लागला. हे लक्षात घ्यावं की गेल्या पाच दिवसांत 2000 हून अधिक इंडिगोच्या उड्डाणं रद्द करण्यात आली आहेत, ज्यामुळं दिल्ली, बेंगळुरु आणि हैदराबाद सारख्या प्रमुख केंद्रांवर परिणाम झाला आहे, जिथं शेकडो उड्डाणं रद्द करण्यात आली आहेत.
शनिवारी 800 उड्डाणं रद्द :
इंडिगोनं शनिवारी एक निवेदन जारी करुन म्हटलं आहे की त्यांनी त्या दिवशी 800 हून अधिक उड्डाणं रद्द केली, शुक्रवारच्या तुलनेत ही घट आहे, जेव्हा 1000 हून अधिक उड्डाणं रद्द करण्यात आली होती. विमान कंपन्यांच्या नेटवर्कमध्ये सतत वाढत असलेल्या गोंधळामुळं प्रवाशांची परिस्थिती आणखी बिकट झाली आहे.
सरकारची विमान भाड्यावर कडक कारवाई :
या संकटाच्या काळात, सरकारनं विमान भाडं नियंत्रित करण्याचा आदेश जारी केला. नागरी उड्डाण मंत्रालयाच्या म्हणण्यानुसार, 500 किलोमीटरपर्यंतच्या विमानांसाठी कमाल भाडे 7500 रुपये, 500 ते 1000 किलोमीटरच्या विमानांसाठी 12000 रुपये, 1000 ते 1500 किलोमीटरच्या विमानांसाठी 15000 रुपये आणि 1500 किलोमीटरपेक्षा जास्त लांबीच्या विमानांसाठी 18000 रुपये निश्चित करण्यात आले आहे. हे नियम बिझनेस क्लास आणि उडान योजनेच्या विमानांना लागू होणार नाहीत.
