Aadhaar PAN Linking Last Date : आजकाल आधारकार्ड हे सर्वांचे ओळखपत्र बनले आहे. आता याच आधारकार्ड आणि पॅनकार्ड बाबत मोठी अपडेट समोर आली आहे. जर तुम्ही तुमचे आधारकार्ड आणि पॅनकार्ड अपडेट केले नसेल तर 31 डिसेंबर 2025 पर्यंत करणे आवश्यक असणार आहे. कारण या तारखेपर्यंत जर तुम्ही पॅनकार्ड अपडेट न केल्यास तुमचे पॅनकार्ड 1 जानेवारी 2026 पासून निष्क्रिय होणार आहे. याचा संपूर्ण परिणाम थेट आर्थिक व्यवहार, कर भरणे आणि बँकिंग सुविधांवर दिसून येईल.

पॅन लिंक न केल्यास मोठं नुकसान :

जर तुम्ही अंतिम मुदतीपूर्वी पॅन कार्ड आणि आधार लिंक केलं नाही, तर तुमचे अनेक व्यवहार अडकू शकतात. निष्क्रिय पॅनमुळं आयकर रिटर्न दाखल करता येणार नाही, बँकेतील व्यवहार थांबतील आणि क्रेडिट किंवा कर्ज प्रक्रियेत अडचणी येतील. वित्तीय संस्था आणि गुंतवणूकदारांसाठी KYC प्रक्रिया अपूर्ण राहील, ज्यामुळं खातं वापरण्यावरही मर्यादा येतील. सरकारनं यापूर्वीही अनेकदा अंतिम तारीख वाढवली होती, मात्र यावेळी ही ‘शेवटची संधी’ असल्याचं स्पष्ट करण्यात आलं आहे.

लिंकिंगची सोपी ऑनलाइन पद्धत :

पॅन आणि आधार लिंक करणे अतिशय सोपं आहे आणि ते घरबसल्या काही मिनिटांत करता येतं.

– सर्वप्रथम आयकर विभागाच्या https://eportal.incometax.gov.in या अधिकृत पोर्टलवर जा.

– ‘Link Aadhaar’ या पर्यायावर क्लिक करा.

– तुमचा 10 अंकी पॅन नंबर आणि 12 अंकी आधार नंबर टाका.

– माहिती योग्य असल्याची खात्री करून Submit वर क्लिक करा.

– प्रक्रिया पूर्ण झाल्यावर तुम्हाला त्वरित पुष्टी (confirmation message) मिळेल.

– तुमचं पॅन आणि आधार लिंक झालं आहे का, हे तपासण्यासाठी याच पोर्टलवरील ‘Link Aadhaar Status’ पर्याय वापरता येईल.

किंवा तुम्ही SMS च्या माध्यमातून देखील पॅनकार्ड लिंक करू शकतात. त्यासाठी सर्वात पहिले तुमचा आधार कार्ड आणि पॅनकार्ड नंबर 567678 किंवा 56161 या क्रमांकावर पाठवावे लागेल. त्यानंतर दिलेली प्रोसेस पूर्ण करावी लागेल.

हे ही वाचा : रेल्वे प्रवास महागणार! रेल्वेनं केली भाडेवाढ; कसे असतील नवे दर?

UIDAI कडून आधार अपडेटसाठी नवीन नियम :

नोव्हेंबरपासून UIDAI नं आधार अपडेटसाठी नवीन नियम लागू केले आहेत. आता नागरिकांना नाव, पत्ता, जन्मतारीख आणि मोबाइल नंबर यासारखे तपशील ऑनलाइन बदलता येतील. या प्रक्रियेसाठी जास्त कागदपत्रांची गरज नाही, मात्र बायोमेट्रिक बदल (फोटो, फिंगरप्रिंट, डोळ्याचा स्कॅन) करण्यासाठी आधार सेवा केंद्रावर प्रत्यक्ष भेट आवश्यक आहे.

ई-केवायसीसाठी लिंकिंग का गरजेचं आहे?

सध्याच्या डिजिटल युगात ई-केवायसी प्रक्रिया प्रत्येक आर्थिक व्यवहारासाठी आवश्यक ठरली आहे. बँका, विमा कंपन्या आणि वित्तीय संस्थांसाठी पॅन-आधार लिंक असणं अनिवार्य आहे. लिंक न झाल्यास तुमची ओळख वैध राहणार नाही आणि गुंतवणूक, कर्ज किंवा कर व्यवहारांमध्ये अडथळे येतील.