Ashok Kharat Case | नाशिकचा (Nashik) भोंदू ज्योतिषी अशोक खरातचा (Ashok Kharat) खरा चेहरा आता संपूर्ण जगासमोर आला आहे. अशोक खरातने अनेक महिलांचा गैरफायदा घेत त्यांच्यावर अत्याचार केल्याचं उघडकीस आलं आहे. त्याने विवाहित महिला आणि तरूणींचे लैंगिक शोषण केले आहे. या प्रकरणी पोलिसांनी अशोक खरातला अटक केली आहे. नराधम खरातला अटक केल्यानंतर त्याचे अनेक काळे कारनामे उघडकीस येताना दिसत आहेत. आताही या प्रकरणात आणखी एक धक्कादायक खुलासा झाला आहे.

हेही वाचा – होर्मुज सामुद्रधुनी बंद करणाऱ्या इराणच्या IRGC नौदल प्रमुखाचा मृत्यू; इस्रायलचा मोठा दावा

अशोक खरातने महिलांसोबतच पुरूषांचीही मोठी फसवणूक केल्याचं समोर आलं आहे. ढोंगीबाब अशोक खरात आता तब्बल 5 कोटींच्या खंडणीप्रकरणामध्ये अडचणीत आला आहे. अंधश्रद्धा, काळी जादू आणि मृत्यूची भीती या गोष्टींचा आधार घेत खरातने कोट्यावधी रुपये उकळल्याचा आरोप त्याच्यावर करण्यात आला आहे.

ढोंगीबाबा अशोक खरातने व्यावसायिकाला घातला तब्बल 5 कोटींचा गंडा

पुण्यातील बांधकाम व्यावसायिक राजेंद्र जासूद यांनी अशोक खरातविरोधात सरकारवाडा पोलीस स्थानकात तक्रार दाखल केली आहे. काळी जादू करत आणि मृत्यूची भीती दाखवत तब्बल 5 कोटी रूपयांची खंडणी उकळल्याचा आरोप व्यावसायिक राजेंद्र जासूद यांनी केला आहे.

व्यावसायिकाने दिलेल्या तक्रारीनुसार, व्यवसायात यश मिळावं म्हणून तक्रारदार व्यावसायिक त्याच्या एका मित्राच्या मदतीनं ढोंगी खरातकडे गेला होता. त्यानंतर खरातने अवतार पूजा करण्याचा सल्ला व्यावसायिकाला दिला होता. ही पूजा करण्याआधी खरातने त्याला मृत्यूची भीती दाखवत त्याच्याकडून मर्सिडीज कार खरेदी करून घेतली. एवढंच नाही तर परिसाची शक्ती मिळवण्यासाठी तब्बल 21 देश फिरावं लागेल, अशी भीती त्याला घातली. तसेच मिरगावमधील मंदिरात सापाचा चमत्कार दाखवून नागदेवतेचा कोप होईल असं सांगितलं. अशाप्रकारे पूजा, परदेश दौरे, औषधोपचार या सगळ्याचा खर्च खरातने तक्रारदाराकडूनच करून घेतला

खरातने ईशानेश्वर मंदिराच्या मागे तक्रारदाराभोवती रिंगण आखून व्यावसायिकाला मृत्यूची भीती दाखवत त्याला अक्षरश: कैद करून ठेवलं होतं. त्यानंतर त्याच्यावर मानसिक दबाव आणत त्याला भीती, अंधश्रद्धा दाखवत त्याला तब्बल 5 कोटींचा गंडा घातल्याचा दावा तक्रारदाराने केला आहे. तसेच खरातने त्याच्या मिरगावमधील फार्महाऊसच्या बांधकामाचा खर्च आणि त्यातील फर्निचरचाही खर्च त्याने जबरदस्तीने वसूल केल्याचा आरोपही तक्रारदाराने केला आहे.

आपल्याला अशोक खरात फसवत असल्याचं लक्षात येताच व्यावसायिकानं आपली मर्सिडीज कार आणि पैसे त्याला परत मागितले. मात्र, खरातने हे सर्व परत करण्यास नकार देत त्याला धमकावलं होतं. तर या प्रकरणी आता पोलिसांनी खरातवर गुन्हा दाखल केला आहे. सध्या या प्रकरणाचा तपास SIT कडून केला जात आहे.