Punjab Bus Accident | मागील काही दिवसांपासून संपूर्ण देशभरात अपघातांचे सत्र सुरूच आहे. आताही पंजाबमध्ये (Punjab) भीषण अपघात (Accident) घडला आहे. पंजाबच्या फतेहगड साहिब जिल्ह्यात एका बसचा मोठा अपघात (Bus Accident) घडला आहे. प्रवाशांनी भरलेली एक बस थेट दरीत कोसळून मोठा अपघात घडला आहे. या भीषण अपघातात 5 जणांचा जागीच मृत्यू झाला असून 15 प्रवासी गंभीर जखमी झाले आहेत.

हेही वाचा – भाजप आमदाराच्या मुलीची भररस्त्यात दादागिरी; तरुणाला बुटाने मारत केला तमाशा, व्हिडीओ होतोय व्हायरल

अपघात नेमका कसा घडला?

मिळालेल्या माहितीनुसार, फतेहगड साहिब जिल्ह्यात बस्सी पठाणाजवळ प्रवाशांनी भरलेल्या बसचा मोठा अपघात झाला. भरधाव वेगाने जाणारी ही बस आधी विजेच्या खांबाला धडकली आणि नंतर ती उलटली अन् थेट दरीत कोसळली. या अपघातादरम्यान बसमध्ये 35 ते 40 लोक प्रवास करत होते. तर या अपघातात पाच जणांचा जागीच मृत्यू झाला असून 15 प्रवासी जखमी झाले आहेत. या घटनेनं पंजाबमध्ये एकच खळबळ उडाली आहे.

या भीषण अपघाताची माहिती मिळताच तेथील स्थानिकांनी तात्काळ घटनास्थळी धाव घेतली आणि जखमींना फतेहगड साहिब आणि बस्सी पठाणा येथील रुग्णालयांमध्ये दाखल केले. सध्या जखमींवर रूग्णालयात उपचार सुरू आहेत.

हा अपघात भीषण होता त्यामुळे घटनास्थळी मोठ्या प्रमाणावर घबराट पसरली. तसेच या अपघाताची माहिती मिळताच पोलीस आणि बचाव पथके तात्काळ घटनास्थळी दाखल झाले असून सध्या बचावकार्य सुरू झाले. हा अपघात तांत्रिक बिघाडामुळे झाला की इतर कोणत्या कारणामुळे झाला याचा तपास पोलीस करत आहेत.