चेन्नई Tamil Nadu Assembly Elections : तामिळनाडूमध्ये 17वी विधानसभा स्थापन करण्यासाठी सर्व 234 जागांकरिता 23 एप्रिल रोजी एकाच टप्प्यात मतदान होणार आहे. या निवडणुकीत राज्यातील राजकीय पटलावरील दोन प्रमुख आघाड्या एकमेकांविरुद्ध उभ्या ठाकल्या आहेत, ज्यामुळं ही लढत अत्यंत रंजक बनली आहे. डीएमके आणि एआयएडीएमके विविध पक्षांसोबत युती करुन निवडणूक लढवत आहेत.
हेही वाचा : मोठी बातमी! नेपाळ गृहमंत्र्यांनी सोडलं २६ दिवसांत पद, नेमकं कारण
डीएमके आघाडीत 13 पक्षांचा समावेश :
एका बाजूला एम.के. स्टॅलिन यांच्या नेतृत्वाखालील डीएमके आघाडी आहे, ज्यात एकूण 13 मित्रपक्ष आहेत. या आघाडीत भारतीय राष्ट्रीय काँग्रेससारख्या प्रमुख पक्षांचाही समावेश आहे. दुसऱ्या बाजूला एडप्पाडी के. पलानीस्वामी यांच्या नेतृत्वाखालील एआयएडीएमके आघाडी आहे, ज्यात नऊ पक्षांचा समावेश आहे. या आघाडीत भारतीय जनता पार्टी (भाजपा) हा प्रमुख मित्रपक्ष आहे. राज्यातील 234 जागांसाठी एकूण 4023 उमेदवार निवडणूक लढवत आहेत.
अनेक प्रमुख उमेदवारही रिंगणात :
- कोलाथूर – एम.के. स्टॅलिन
- एडप्पाडी – एडप्पाडी के. पलानीस्वामी
- पेरंबूर आणि त्रिची ईस्ट – सी. जोसेफ विजय
- काराकुडी – सीमान
- चेपॉक-तिरुवल्लिकेनी – उदयनिधी स्टॅलिन
- बोडीनायक्कनूर – ओ. पनीरसेल्वम
- विरुधाचलम – प्रेमलता विजयकांत
- गोबिचेट्टीपलायम – के. सेंगोत्तैयन
5 कोटींहून अधिक मतदार बजावणार मतदानाचा हक्क :
यावेळी तामिळनाडूमध्ये 5 कोटींहून अधिक मतदार आपला मतदानाचा हक्क बजावतील. विशेष म्हणजे, महिला मतदारांची संख्या पुरुषांपेक्षा जवळपास 10 लाखांनी जास्त आहे, ज्यामुळं निवडणुकीच्या समीकरणांवर परिणाम होऊ शकतो. शिवाय, 20 ते 40 वयोगटातील लोकसंख्या 2 कोटींहून अधिक आहे. तमिळ अभिनेते आणि टीव्हीके प्रमुख सी. जोसेफ विजय यांच्याबद्दलच्या क्रेझमुळं, यावेळी जय-पराजय याच जनतेच्या मतांवर अवलंबून असेल असे दिसते.
