Unauthorized Bike Taxi Services | महाराष्ट्र सरकारने (Maharashtra Government) ओला (Ola), उबर (Uber) आणि रॅपिडो (Rapido) अॅप्सवर कडक कारवाई केली आहे. तसेच सायबर विभागाने गूगल आणि ॲपलला उबर, ओला आणि रॅपिडो या राईड-हेलिंग कंपन्यांचे ॲप्स त्यांच्या संबंधित ॲप स्टोअरमधून काढून टाकण्याचे निर्देश दिले आहेत. ओला, उबर आणि रॅपिडो या कंपन्या राज्य सरकारकडून आवश्यक परवानगी न घेता रस्त्यांवर बाईक टॅक्सी चालवत होत्या. राईड-हेलिंग कंपन्यांच्या या वर्तनाविरोधात सरकारने कठोर कारवाई केली आहे.
राज्यात बेकायदेशीरपणे सुरू असलेल्या अनधिकृत बाईक टॅक्सी सेवांविरोधात परिवहन विभागाने कठोर भूमिका घेतली आहे. ओला, उबर आणि रॅपिडो सारख्या अनधिकृत बाईक टॅक्सी ॲप सेवा तात्काळ बंद करून संबंधित कंपनी मालकांवर एफआयआर दाखल करण्याची मागणी परिवहन मंत्री प्रताप सरनाईक यांनी सायबरक्राईम विभागाकडे पत्राद्वारे केली आहे. त्याचबरोबर परिवहन आयुक्त यांनी देखील यासंदर्भात सायबर क्राईम विभागाकडे पत्र पाठविले आहे.
गूगल आणि ॲपल या दोघांनाही त्यांच्या डिजिटल मार्केटप्लेसमधून हे ओला, उबर आणि रॅपिडोचे ॲप्लिकेशन्स काढून टाकण्याचे आणि त्यांचा ॲक्सेस ब्लॉक करण्याचे निर्देश देण्यात आले आहेत. तसेच असे निदर्शनास आले आहे की, काही ॲप आधारित प्लॅटफॉर्म हे वैध परवानगी, सरकारी मंजुरी किंवा परिवहन विभागाने घालून दिलेले नियम व कायदे आणि मोटार वाहन कायद्यातील तरतुदींचे पालन न करता बाईक टॅक्सीच्या माध्यमातून मोठ्या प्रमाणावर प्रवासी वाहतूक सेवा चालवत आहेत.
महाराष्ट्रात ओला, उबर आणि रॅपिडोच्या सर्व सेवा पूर्णपणे बंद करण्यात आल्याचा सोशल मीडियावरील दावा दिशाभूल करणारा आहे. #FactCheck #DGIPRFactCheck
राज्यात बेकायदेशीरपणे सुरू असलेल्या अनधिकृत बाईक टॅक्सी सेवांविरोधात परिवहन विभागाने कठोर भूमिका घेतली आहे. #ओला, #उबर आणि #रॅपिडो… pic.twitter.com/69jjCPbNbc
— MAHARASHTRA DGIPR (@MahaDGIPR) May 15, 2026
दरम्यान, महाराष्ट्राचे परिवहन मंत्री प्रताप सरनाईक यांनी राज्यातील बाईक टॅक्सी व्यवसायासंदर्भात या राईड-हेलिंग ॲप्सविरुद्ध एफआयआर दाखल करून कायदेशीर कारवाई करण्याचे निर्देश सायबर विभागाला दिले आहेत. तसेच महाराष्ट्रात ओला, उबर आणि रॅपिडोच्या सर्व सेवा पूर्णपणे बंद करण्यात आल्याचा सोशल मीडियावरील दावा दिशाभूल करणारा असल्याची माहिती देखील देण्यात आली आहे.
