Sanjay Gaikwad | शिवसेनेचे आमदार संजय गायकवाड (Sanjay Gaikwad) हे अडचणीत सापडले आहेत. त्यांना न्यायालयाने मोठा धक्का दिला आहे. ‘शिवाजी कोण होता’ या पुस्तकाच्या (Shivaji Kon Hota Book) शीर्षकावरून पुस्तकाचे प्रकाशक प्रशांत आंबी (Prashant Ambi) यांना संजय गायकवाड यांनी संतप्त होत धमकी (Threat) दिली होती. तर आता संजय गायकवाड यांना धमकी देणं चांगलंच महागात पडलं आहे.

हेही वाचा – ठाकरेंना मिळाला मोठा धक्का; 250 कार्यकर्त्यांसह बडा नेता मुंबईकडे रवाना, भाजपमध्ये होणार सामील

संजय गायकवाड यांनी का दिलेली धमकी? नेमकं प्रकरण काय?

गेल्या काही दिवसांपूर्वी ‘शिवाजी कोण होता’ या पुस्तकावरून मोठा गदारोळ झाला होता. संजय गायकवाड यांनी या पुस्तकाच्या शीर्षकावर आक्षेप घेत प्रकाशक प्रशांत आंबी यांना अश्लील शिवीगाळ करत धमकी दिली होती. तसेच या पुस्तकातून छत्रपती शिवाजी महाराजांची बदनामी करण्यात आली आहे. यामध्ये महाराजांचा खोटा इतिहास लिहिला असून 300 ते 400 वेळा महाराजांचा एकेरी उल्लेख करण्यात आला आहे. सोबतच या पुस्तकात औरंगजेबाचा उल्लेख औरंगजेबजी करण्यात आला आहे आणि महाराजांचा एकेरी उल्लेख करण्यात आला आहे, असे आरोप संजय गायकवाड यांनी केले होते. याचे काही कथित ऑडिओ क्लिपही समोर आले होते.

संजय गायकवाड यांनी धमकी दिल्यानंतर प्रशांत आंबी यांनी त्यांच्याविरोधात कोल्हापूरमधील राजारामपुरी पोलीस स्थानकात तक्रार दाखल केली होती. तसेच संजय गायकवाडांची पोलीस चौकशी व्हावी यासाठी आंबी यांनी कोल्हापूर सत्र न्यायालयात धाव घेतली होती. तर आता या प्रकरणी कोल्हापूर सत्र न्यायालयाने संजय गायकवाड यांच्या पोलीस चौकशीला परवानगी दिली आहे. त्यामुळे याप्रकरणी संजय गायकवाडांची चौकशी होणार असून त्यांच्या अडचणीत वाढ निर्माण झाली आहे.

दुसरीकडे, प्रशांत आंबी यांनी आणखी एक नवीन तक्रार पोलीस स्थानकात दाखल केली आहे. संजय गायकवाड यांच्या समर्थकांकडून आजही धमक्या मिळत असल्याची माहिती आंबी यांनी पोलिसांना दिली आहे. त्यांना शंभरहून अधिक धमक्यांचे फोन आले असल्याची माहिती देत आंबी यांनी आणखी एक नवीन तक्रार पोलीस स्थानकात दाखल केली आहे. त्यामुळे आता हे प्रकरण चांगलंच तापलं असून राजकीय वर्तुळात एकच खळबळ उडाली आहे.