Chatrapati Sambhajinagar Paithan Harassment Case: छत्रपती संभाजीनगर जिल्ह्यातील पैठण तालुक्यातून एक अत्यंत धक्कादायक प्रकार समोर आला आहे. शासकीय महिला अधिकाऱ्याला अश्लील मेसेज पाठवून तिच्या मुलीला जीवे मारण्याची धमकी दिल्याप्रकरणी अजित पवार गटाच्या एका पदाधिकाऱ्यावर गुन्हा दाखल करण्यात आला आहे. नेमकं काय आहे हे प्रकरण, चला जाणून घेऊया.

छत्रपती संभाजीनगर (Chatrapati Sambhajinagar) जिल्ह्यातील पैठण तालुक्यातून एक अत्यंत गंभीर आणि संतापजनक प्रकार समोर आला आहे. शासकीय महिला अधिकाऱ्याला लक्ष्य करत तिला अश्लील संदेश पाठवणे, सतत मानसिक छळ करणे आणि तिच्या कुटुंबाला थेट जीवे मारण्याची धमकी देणे असा गंभीर आरोप अजित पवार गटाच्या एका पदाधिकाऱ्यावर करण्यात आला आहे.

आणखी वाचा: एका बड्या मंत्र्यांच्या मुलावर POCSO अंतर्गत गुन्हा; पाहा संपूर्ण प्रकरण नेमकं काय?

या घटनेत आरोपीवर गुन्हा दाखल झाला आहे. यात आरोपीचे नाव युवराज चावरे असून तो स्वतःला राष्ट्रवादी काँग्रेस (अजित पवार गट) पक्षाचा तालुकाध्यक्ष असल्याचा दावा करत असल्याचे समोर आले आहे. यामुळे प्रशासकीय वर्तुळात मोठी खळबळ उडाली असून महिला अधिकाऱ्याच्या सुरक्षिततेवरही प्रश्नचिन्ह निर्माण झाले आहे. नेमकं हे प्रकरण कसं घडलं आणि त्यामागे काय घडामोडी आहेत, ते सविस्तर जाणून घेऊया.

व्हॉट्सअ‍ॅपवर अश्लील मेसेज आणि धमक्या

मिळालेल्या माहितीनुसार, विहामांडवा विभागात कार्यरत असलेल्या महिला मंडळ अधिकाऱ्याच्या मोबाईलवर आरोपीने वारंवार अश्लील मेसेज आणि व्हिडिओ पाठवले. तसेच “मला तुला पर्सनल भेटायचं आहे” असे आक्षेपार्ह मेसेज पाठवत मानसिक त्रास दिल्याचा आरोप आहे.

तक्रारीनुसार, विरोध केल्यानंतर आरोपीने धमक्या देणे सुरूच ठेवले आणि सतत मानसिक दबाव टाकण्याचा प्रयत्न केला.

तहसील कार्यालयात घुसून धमकी

हा प्रकार केवळ ऑनलाईनपुरता मर्यादित राहिला नाही. आरोपीने थेट तहसील कार्यालयात जाऊन महिला अधिकाऱ्याला अडवले. तेथे त्याने शिवीगाळ करत धक्काबुक्की केली तसेच ‘तुझे घर मला माहिती आहे, तुझ्या मुलीला गायब करीन” अशी गंभीर जीवे मारण्याची धमकी दिल्याचे तक्रारीत नमूद आहे.

या घटनेनंतर महिला अधिकारी अत्यंत भीती आणि मानसिक तणावाखाली आल्याचे सांगण्यात येत आहे.

पोलिसांत गुन्हा दाखल

या प्रकाराला कंटाळून महिला अधिकाऱ्याने पाचोड पोलीस ठाण्यात तक्रार दाखल केली. त्यानंतर पोलिसांनी युवराज चावरे याच्याविरुद्ध विनयभंग, माहिती तंत्रज्ञान कायदा (IT Act) आणि जीवे मारण्याच्या धमकीसह विविध कलमांखाली गुन्हा नोंदवला आहे.

पोलिसांकडून या प्रकरणाचा पुढील तपास सुरू असून आरोपीचा शोध घेतला जात आहे. शासकीय महिला अधिकाऱ्यावरील या प्रकारामुळे परिसरात संताप व्यक्त केला जात आहे.