पुणे जिल्ह्यातील लोहगड किल्ल्यावर १८ जून २०२६ रोजी घडलेल्या केतन अग्रवाल मृत्यू प्रकरणात महत्त्वाची घडामोड समोर आली आहे. सुरुवातीला अपघाती मृत्यू वाटणाऱ्या या घटनेचा तपास करताना पुणे ग्रामीण पोलिसांनी हत्या आणि कट रचल्याचा संशय व्यक्त केला. तपासानंतर पोलिसांनी वडगाव मावळ न्यायालयात ५,०५३ पानी आरोपपत्र (चार्जशीट) दाखल केले आहे. (5053 Page Charge sheet) या प्रकरणात केतनची होणारी पत्नी सिया गोयल, तिचा कथित प्रियकर चेतन चौधरी आणि चेतनचा मित्र रितेश हांगे यांना आरोपी करण्यात आले आहे. ज्येष्ठ वकील उज्ज्वल निकम यांची या प्रकरणात विशेष सरकारी वकील म्हणून नियुक्ती करण्यात आली आहे.

सुरुवातीला अपघाताचा संशय; तपासातून हत्येचा दावा

१८ जून रोजी केतन अग्रवाल (Ketan Agarwal) लोहगड (Lohgad) किल्ल्यावर गेला असताना दरीत पडून त्याचा मृत्यू झाल्याची घटना समोर आली होती. सुरुवातीला हा अपघात असल्याचे चित्र होते. मात्र, घटनेच्या परिस्थितीबाबत संशय निर्माण झाल्यानंतर पोलिसांनी सखोल तपास सुरू केला. तपासादरम्यान केतनची होणारी पत्नी सिया गोयल (Siya Goyal) आणि चेतन चौधरी (Chetan Choudhary)  यांच्यातील संबंध तसेच कथित कटाच्या शक्यतेचा तपास करण्यात आला. पोलिसांच्या आरोपानुसार, केतनचा मृत्यू अपघात असल्याचे भासवण्याचा प्रयत्न करण्यात आला. तपासात डिजिटल पुरावे, मोबाईलमधील संदेश आणि इतर तांत्रिक माहिती महत्त्वाची ठरल्याचे आरोपपत्रावरील वृत्तांत नमूद करण्यात आले आहे.

बनावट इन्स्टाग्राम अकाउंटचा वापर केल्याचा आरोप (Fake Instagram Account)

पोलिसांच्या आरोपपत्रानुसार, केतनला लोहगडावर बोलावण्यासाठी ‘माही’(Mahi) नावाच्या बनावट इन्स्टाग्राम अकाउंटचा वापर करण्यात आला. या अकाउंटवरून केतनशी संवाद साधण्यात आला आणि सियाला सरप्राइज देण्यासाठी लोहगडावर येण्यास त्याला प्रवृत्त करण्यात आल्याचा पोलिसांचा दावा आहे.तपासात आरोपींच्या मोबाईलमधील डिलीट केलेले संदेश आणि डिजिटल माहिती मिळवण्यात आल्याचे वृत्त आहे. या प्रकरणात सिया गोयल आणि चेतन चौधरी यांना २३ जून रोजी अटक करण्यात आली, तर रितेश हांगे याला ५ सप्टेंबर रोजी अटक करण्यात आली. तिघांविरोधात हत्या आणि गुन्हेगारी कटासह विविध आरोप ठेवण्यात आले आहेत.

उज्ज्वल निकम यांची विशेष सरकारी वकील म्हणून नियुक्ती (Ad. Ujjwal Nikam)

या प्रकरणात केतनच्या कुटुंबीयांनी ज्येष्ठ वकील उज्ज्वल निकम यांची विशेष सरकारी वकील म्हणून नियुक्ती करण्याची मागणी केली होती. मुख्यमंत्री देवेंद्र फडणवीस यांनी ही मागणी मान्य केल्यानंतर निकम यांच्यावर सरकारी पक्षाची बाजू न्यायालयात मांडण्याची जबाबदारी सोपवण्यात आली आहे.या प्रकरणात जलदगतीने न्याय मिळावा, अशी केतनच्या कुटुंबीयांची अपेक्षा आहे. आरोपपत्रात डिजिटल पुरावे, तांत्रिक विश्लेषण आणि १०० हून अधिक साक्षीदारांच्या जबाबांचा समावेश असल्याचे वृत्त आहे.

केतनच्या कुटुंबीयांना न्यायाची आशा (Justice)

केतन अग्रवालच्या मृत्यूमुळे त्याच्या कुटुंबीयांना मोठा धक्का बसला. सुरुवातीला अपघात(Accident) वाटणाऱ्या घटनेत हत्या झाल्याचा पोलिसांचा दावा आणि त्यानंतर दाखल झालेले आरोपपत्र यामुळे या प्रकरणाला गंभीर वळण मिळाले आहे.आता न्यायालयात आरोपपत्रातील पुरावे, साक्षीदारांचे जबाब आणि सरकारी पक्षाचे युक्तिवाद महत्त्वाचे ठरणार आहेत. उज्ज्वल निकम यांच्या नियुक्तीमुळे खटल्याला अधिक प्रभावीपणे पुढे नेण्यास मदत होईल, अशी अपेक्षा कुटुंबीयांना आहे.

हेही वाचा : मुस्कान-साहिलला फाशी! सिया-चेतनला काय शिक्षा होणार? केतन हत्या प्रकरणाची चर्चा