Chandipura Virus: गुजरातमध्ये चांदीपुरा व्हायरसच्या वाढत्या प्रकरणांमुळे चिंता वाढली आहे. या व्हरायरसमुळे आतापर्यंत २२ जणांचा मृत्यू झाला असून, त्यावर अद्याप कोणतेही ठोस औषध उपलब्ध झालेलं नाही. जाणून घ्या चांदीपुरा व्हायरसची लक्षणे, संसर्ग कसा पसरतो आणि कोणती काळजी घ्यावी.
गुजरातमध्ये (Gujarat News) चांदीपुरा व्हायरसच्या (Chandipura Virus) वाढत्या प्रकरणांमुळे नागरिकांमध्ये चिंता निर्माण झाली आहे. आतापर्यंत या व्हायरसमुळे २२ जणांचा मृत्यू झाला आहे. परिस्थिती नियंत्रणात आणण्यासाठी राज्य सरकार आणि आरोग्य विभागाकडून सर्वतोपरी प्रयत्न केले जात आहेत. चांदीपुरा व्हायरसवर अद्याप कोणतेही निश्चित औषध किंवा उपचार उपलब्ध नाहीत. त्यामुळे रुग्णांवर त्यांच्या लक्षणांनुसार उपचार केले जात आहेत. आरोग्यमंत्री प्रफुल्ल पानशेरिया यांनी नागरिकांना सतर्क राहण्याचे आवाहन केले आहे.
हेही वाचा: पंकजा मुंडेंना काँग्रेसची मुख्यमंत्रीपदाची ऑफर; महाराष्ट्राच्या राजकारणात नवं समीकरण?
वाढते रुग्ण आणि आरोग्य विभागाची सतर्कता
गुजरातमध्ये या व्हायरसशी संबंधित १८४ संशयित प्रकरणे नोंदवण्यात आली आहेत. त्यापैकी ३५ रुग्णांमध्ये चांदीपुरा व्हायरसची पुष्टी झाली आहे. सध्या 7 रुग्ण रुग्णालयात दाखल असून तज्ज्ञ डॉक्टरांच्या देखरेखीखाली त्यांच्यावर उपचार सुरू आहेत. आरोग्य विभागाने प्रभावित भागांमध्ये देखरेख वाढवली असून संक्रमित मुलांवर प्रमुख सिव्हिल रुग्णालयांमध्ये उपचार केले जात आहेत.
विशेष वैद्यकीय सुविधा उपलब्ध
आरोग्य विभागाच्या (health department) माहितीनुसार, सहा रुग्ण उपचारानंतर बरे होऊन घरी परतले आहेत. गंभीर स्थितीतील रुग्णांसाठी विशेष वैद्यकीय सुविधा उपलब्ध करून देण्यात आल्या आहेत. संशयित रुग्णांची लवकर ओळख पटवण्यासाठी आरोग्य विभागाकडून विविध योजना राबवल्या जात आहेत. अनेक भागांमध्ये आरोग्य पथके गावागावात जाऊन तपासणी करत आहेत.
सॅंडफ्लायच्या चाव्यामुळे पसरतो संसर्ग, सरकार सतर्क
आरोग्यमंत्री प्रफुल्ल पानशेरिया यांनी सांगितले की, चांदीपुरा व्हायरस प्रामुख्याने सॅंडफ्लाय (वाळूमाशी) चावल्यामुळे पसरतो. हा कीटक वेगाने वाढत असून अनेक ठिकाणी आढळतो. त्यामुळे नागरिकांनी अधिक काळजी घेण्याची गरज आहे.
जर ताप, उलट्या किंवा गंभीर लक्षणे (Chandipura Symptoms) दिसत असतील, तर त्वरित जवळच्या सरकारी रुग्णालयाशी संपर्क साधण्याचे आवाहन करण्यात आले आहे. मुख्यमंत्री भूपेंद्र पटेल यांच्या देखरेखीखाली आरोग्य विभाग परिस्थितीवर लक्ष ठेवून आहे. नागरिकांनी घाबरून न जाता योग्य माहिती घेऊन खबरदारी घेण्याचे आवाहन करण्यात आले आहे.
WHO च्या माहितीनुसार वाढतोय धोका (WHO Chandipura Virus)
जागतिक आरोग्य संघटनेच्या (WHO) माहितीनुसार, चांदीपुरा व्हायरस ही गंभीर आरोग्य समस्या बनत आहे. पावसाळ्यात या व्हायरसचा धोका वाढतो, विशेषतः पश्चिम आणि मध्य भारतातील भागांमध्ये याचा प्रभाव अधिक दिसून येतो. गुजरातमध्ये फ्लेबोटोमस पपाटासी सॅंडफ्लायला या व्हायरसच्या प्रसाराचे प्रमुख माध्यम मानले जात आहे. त्यामुळे सावधगिरी बाळगणे अत्यंत महत्त्वाचे आहे.
