14 TMC MPs Joining BJP : पश्चिम बंगालची सत्ता गेल्यानंतर ममता बॅनर्जीसाठी आता काळ कठीण बनला आहे. अधिच वय साथ देत नाही, त्यात एकामागून एक पक्षाला हादरे बसत आहेत. मोदी सरकारच्या विरोधात विरोधकांची एकजूट बांधण्यासाठी इंडिया आघाडीची आज नवी दिल्लीतल कॉन्स्टिट्युशन क्लबमध्ये बैठक पार पडली. या बैठकीला स्वतः ममता बॅनर्जी यांनी हजेरी लावली. तर दुसरीकडं दिल्लीतच त्यांचे १४ खासदार मात्र गायब झाले आहेत, अशी चर्चा आहे. या खासदारांनी एकत्र येत एक बैठकही घेतल्याची माहिती समोर येत आहे.

१४ खासदारांनी CM सुवेंदू अधिकारी यांची घेतली भेट

तर दुसरीकडं तृणमूलच्या १४ खासदारांनी पश्चिम बंगालचे मुख्यमंत्री सुवेंदू अधिकारी यांची दिल्लीत भेट घेत बैठकही घेतली आहे. ही बैठक भाजपचे नेते भुपेंद्र यादव यांच्या घरी पार पडली आहे. पश्चिम बंगालचे मुख्यमंत्री आजच दिल्लीत पोहोचले आहेत. सुत्रांच्या माहितीनुसार, त्यांच्यासोबत संपन्न झालेल्या या बैठीकीत तृणमूलचे १४ खासदार उपस्थित होते. विशेष म्हणजे या बैठकीचे फोटोही समोर आले आहेत. या बैठकीत भाजपचे नेते आणि त्रिपुराचे माजी मुख्यमंत्री बिप्लव देव हे देखील उपस्थित असल्याचे फोटोमध्ये दिसून येत आहे.

सुखेंदू शेखर रॉय यांचा तडकाफडकी राजीनामा

तृणमूलचे राज्यसभा खासदार सुखेंदू शेखर रॉय यांनी पक्षाच्या प्राथमिक सदस्यत्वाचा आणि खासदारकीची राजीनामा दिला. राजीनामा दिल्यानंतर तृणमूलचे ५ खासदार त्यांच्या भेटीसाठी पोहोचले आहेत. यामध्ये बर्दमान पूर्व च्या खासदार शर्मिला सरकार, हावडाचे खासदार प्रसून बॅनर्जी, कूचबिहारचे खासदार जगदीश बसुनिया, झारग्रामचे खासदार कालिपद सोरेन आणि बांकुराचे खासदार अरुप चक्रवर्ती यांचा समावेश आहे. सुखेंदू शेखर रॉय हे तृणमूलमध्ये गेल्या १० वर्षांहून अधिक काळापासून आहेत. ते तृणमूलमधील सर्वात वयस्कर खासदार म्हणून ओळखले जात होते. हे सर्व पाच खासदार देखील भाजपच्या गळाला लागण्याची शक्यता वर्तवण्यात येत आहे.