CBSE Class 10 Result 2026: केंद्रीय माध्यमिक शिक्षण मंडळाच्या (सीबीएसई) दहावीच्या परीक्षेचा निकाल जाहीर झाला असून यंदा ९३.७० टक्के विद्यार्थी उत्तीर्ण झाले आहेत. विशेष म्हणजे, ५५ हजारांहून अधिक विद्यार्थ्यांनी ९५ टक्क्यांपेक्षा जास्त गुण मिळवत उल्लेखनीय कामगिरी केली आहे.

केंद्रीय माध्यमिक शिक्षण मंडळाच्या (सीबीएसई) दहावीच्या परीक्षेचा निकाल जाहीर झाला असून या निकालात एकूण २४.७१ लाखांहून अधिक विद्यार्थ्यांनी परीक्षा दिली होती. यापैकी २.२० लाखांहून अधिक विद्यार्थ्यांनी ९० टक्क्यांपेक्षा जास्त गुण मिळवले आहेत.

हेही वाचा: नाशिकमध्ये मोठी खळबळ! TCS शाखेतील कर्मचाऱ्यांवर गंभीर आरोप; FIR मधून नेमकं काय समोर आलं?

यंदाही मुलींनी मुलांपेक्षा सरस कामगिरी केली आहे. मुलींचा उत्तीर्णतेचा टक्का ९४.९९ इतका असून मुलांचा टक्का ९२.६९ आहे. परीक्षा देशभरातील ८,०७४ केंद्रांवर घेण्यात आली होती. २१ फेब्रुवारी रोजी एकाच दिवशी जवळपास २४.९५ लाख विद्यार्थ्यांनी परीक्षा दिल्याने ती आतापर्यंतची सर्वात मोठी परीक्षा ठरली.

परदेशातील शाळांचा निकालही जाहीर

पश्चिम आशियातील तणाव लक्षात घेता परदेशातील शाळांचा निकालही भारतातील निकालासोबतच जाहीर करण्यात आला. परदेशातील शाळांनी ९९.१० टक्के उत्तीर्णतेची नोंद केली आहे.

सर्वाधिक उत्तीर्ण विद्यार्थ्यांचे प्रमाण कुठे ?

विभागनिहाय निकालात त्रिवेंद्रम आणि विजयवाडा विभाग आघाडीवर राहिले, तर गुवाहाटी विभागात सर्वात कमी उत्तीर्णतेचे प्रमाण नोंदवले गेले. दिल्ली विभागानेही उल्लेखनीय कामगिरी करत ९७.३८ टक्के निकाल नोंदवला आहे.

संस्थांच्या कामगिरीत केंद्रीय विद्यालयांनी ९९.५७ टक्के उत्तीर्णतेसह अव्वल स्थान मिळवले. खाजगी शाळांचा निकाल ९३.७७ टक्के, तर सरकारी अनुदानित शाळांचा निकाल ९१.०१ टक्के राहिला.

९० टक्क्यांपेक्षा जास्त गुण

सीडब्ल्यूएसएन (विशेष गरजा असलेल्या विद्यार्थ्यां) गटाने ९६.२४ टक्के उत्तीर्णतेचे प्रमाण नोंदवले. या गटातील २१ विद्यार्थ्यांनी ९५ टक्क्यांहून अधिक गुण मिळवले, तर ४५२ विद्यार्थ्यांनी ९० टक्क्यांपेक्षा जास्त गुण प्राप्त केले.