Nashik Onion Andholan: नाशिक मधील चांदवड येथे कांद्याला योग्य हमीभाव मिळावा या मागणीसाठी शेतकरी क्रांती महामोर्चा काढण्यात आला. या आंदोलनात मोठ्या संख्येने शेतकरी सहभागी झाले होते.

मुंबई- आग्रा महामार्गावर रास्ता रोको करत आंदोलकांनी सरकारविरोधात जोरदार घोषणाबाजी केली. परिस्थिती नियंत्रणात आणण्यासाठी पोलिसांनी हस्तक्षेप करत महाविकास आघाडी नेते हर्षवर्धन सपकाळ आणि रोहित पवार यांना ताब्यात घेतले

कांद्याच्या दारावरून शेतकऱ्यांचा संताप

कांद्याला अपेक्षित दर मिळत नसल्याने शेतकऱ्यांमध्ये तीव्र नाराजी आहे. हमीभाव आणि योग्य बाजारभाव मिळावा या मागणीसाठी शेतकऱ्यांनी सकाळपासून आंदोलन सुरू केले होते. आंदोलकांनी महामार्ग रोखून सरकारविरोधात जोरदार घोषणा दिल्या.

हेही वाचा: बैलगाडी, गळ्यात कांद्याच्या माळा… रोहित पवार, हर्षवर्धन सपकाळांसह महाविकास आघाडीचा एल्गार; कुठे आणि का रास्ता रोको?

पोलिसांचा हस्तक्षेप आणि ताब्यात घेणे

आंदोलन तीव्र होत गेल्याने पोलिसांनी कारवाई करत महामार्गावरील गर्दी हटवण्याचा प्रयत्न केला. त्यावेळी आंदोलकांना ताब्यात घेण्यात आले. या कारवाईदरम्यान रोहित पवार आणि हर्षवर्धन सपकाळ यांनाही पोलिसांनी ताब्यात घेतले.

महामार्गावर वाहतूक विस्कळीत

रास्ता रोकोमुळे मुंबई-आग्रा महामार्गावर मोठ्या प्रमाणात वाहतूक कोंडी झाली. अनेक किलोमीटरपर्यंत वाहनांच्या रांगा लागल्या होत्या. काही काळ परिसरात तणावाचे वातावरण निर्माण झाले.

आंदोलकांचा ठाम पवित्रा

पोलिस कारवाईनंतरही शेतकऱ्यांनी आंदोलन सुरू ठेवण्याचा निर्धार व्यक्त केला आहे. आपल्या मागण्या मान्य होईपर्यंत मागे हटणार नाही, अशी भूमिका आंदोलकांनी घेतली आहे.