Dharavi Anthem : मुंबईतील धारावीच्या पुनर्विकास प्रकल्पाला आता एका नव्या स्वरूपात सादर करण्यात आलं आहे. मुख्यमंत्री देवेंद्र फडणवीस यांच्या उपस्थितीत अधिकृत ‘Dharavi Anthem’ लॉन्च करण्यात आलं. यासोबतच धारावीच्या प्रस्तावित पुनर्विकासाची संकल्पना आणि भविष्यातील स्वरूप दर्शवणाऱ्या विविध मॉडेल्सचं प्रदर्शनही आयोजित करण्यात आलं.

धारावी हा मुंबईच्या मध्यवर्ती भागातील महत्त्वाचा परिसर असून, गेल्या अनेक वर्षांपासून त्याच्या पुनर्विकासाचा मुद्दा चर्चेत आहे. प्रस्तावित प्रकल्पामध्ये रहिवाशांसाठी पुनर्वसनासोबतच व्यावसायिक आणि पायाभूत सुविधांचा विकास करण्याचा आराखडा आहे.

‘Dharavi Anthem’मधून काय संदेश?

धारावीच्या पुनर्विकासाची नवी ओळख, येथील नागरिकांचं भविष्यातील जीवन आणि परिसराच्या परिवर्तनाची संकल्पना लोकांपर्यंत पोहोचवण्यासाठी ‘Dharavi Anthem’ सादर करण्यात आलं. या माध्यमातून धारावीला केवळ निवासी परिसर म्हणून नव्हे, तर निवास, व्यवसाय आणि आधुनिक पायाभूत सुविधांचा समावेश असलेला विकसित परिसर म्हणून साकारण्याची संकल्पना मांडली जात आहे.

हेही वाचा : Apple Pay ची एन्ट्री अन् UPI वर MDR! भारताच्या डिजिटल पेमेंटमध्ये नेमकं काय बदललं?

पुनर्विकासाच्या मॉडेल्समध्ये काय पाहायला मिळालं?

प्रदर्शनामध्ये प्रस्तावित पुनर्विकासानंतर धारावीचं स्वरूप कसं असेल, याची मॉडेल्सच्या माध्यमातून झलक दाखवण्यात आली.

मुख्यमंत्री फडणवीस यांनी यापूर्वी सांगितलं होतं की धारावी प्रकल्पाच्या 104 हेक्टर क्षेत्रामध्ये मोठ्या प्रमाणावर पुनर्वसनासाठी जागा राखण्यात आली असून व्यावसायिक विकासासाठीही स्वतंत्र क्षेत्र प्रस्तावित आहे. पहिल्या टप्प्यातील 10 हजार पुनर्वसन घरांचं काम पुढे नेण्याचं उद्दिष्टही त्यांनी मांडलं होतं.

धारावीचा विकास नेमका कसा होणार?

धारावी पुनर्विकासाचा उद्देश विद्यमान रहिवाशांचं पुनर्वसन करण्यासोबतच परिसरातील व्यवसाय आणि रोजगाराच्या संधी टिकवण्याचा आहे. धारावीमध्ये मोठ्या प्रमाणावर लघुउद्योग आणि अनौपचारिक व्यवसाय चालतात. त्यामुळे पुनर्विकासाच्या आराखड्यात निवासासोबत व्यावसायिक जागा आणि आधुनिक पायाभूत सुविधा यांना महत्त्व देण्यात आलं आहे.

हेही वाचा : देशात अदानींचं साम्राज्य! जमिनीपासून आकाशापर्यंत विस्तार; राज ठाकरे कडाडले, नेमकं काय म्हणाले?

पुनर्विकासाला राजकीय विरोधही

धारावी पुनर्विकास प्रकल्पावरून महाराष्ट्राच्या राजकारणातही मतभेद राहिले आहेत. प्रकल्पाच्या अंमलबजावणीमध्ये अदानी समूहाच्या सहभागावर विरोधकांनी प्रश्न उपस्थित केले आहेत, तर सरकारकडून हा प्रकल्प धारावीच्या परिवर्तनासाठी महत्त्वाचा असल्याचं सांगितलं जात आहे.

त्यामुळे आता ‘Dharavi Anthem’ आणि पुनर्विकासाच्या मॉडेल्सच्या प्रदर्शनामुळे धारावीच्या भविष्यातील बदलाची चर्चा पुन्हा केंद्रस्थानी आली आहे.