BJP-Congress clash : काँग्रेस प्रदेशाध्यप हर्षवर्धन सपकाळ यांनी टिपू सुलतान यांची तुलना छत्रपती शिवाजी महाराज यांच्याशी केल्याचा आरोप भाजपकडून करण्यात आला आहे. या वक्तव्यानंतर पुण्यात भाजप कार्यकर्त्यांनी काँग्रेस भवन येथे आंदोलन केल्याची घटना घडली. आंदोलनादरम्यान काँग्रेस भवनवर दगडफेक झाल्याचा आरोप काँग्रेसकडून करण्यात आला असून, या दगडफेकीत अनेक कार्यकर्त्यांसह काही पत्रकारही जखमी व रक्तबंबाळ झाल्याचे सांगण्यात आले आहे.

या घटनेच्या निषेधार्थ काँग्रेस कार्यकर्ते पोलीस स्टेशनमध्ये दाखल झाले असून, भाजपचे शहराध्यक्ष धीरज घाटे तसेच नवनिर्वाचित महापौर मंजुषा नागपुरे यांच्याविरोधात गुन्हा दाखल करण्याची मागणी करण्यात आली आहे. संबंधित तक्रार विश्रामबाग पोलीस ठाणे तसेच शिवाजीनगर पोलीस ठाणे येथे नोंदवण्याची प्रक्रिया सुरू असल्याची माहिती आहे. यावेळी काँग्रेस नेते मोहन जोशी आणि शहराध्यक्ष अरविंद शिंदे यांनी तीव्र भूमिका घेतली. भाजपकडून गुंडागर्दी केली जात असून, जबाबदारांवर गुन्हा दाखल झाल्याशिवाय आम्ही येथून हलणार नाही, असा इशारा त्यांनी दिला.

धीरज घाटे यांच्या तक्रारीनंतर भाजप कार्यकर्त्यांनी ठिय्या आंदोलन सुरू

काँग्रेस प्रदेशाध्यक्ष हर्षवर्धन सपकाळ यांनी टिपू सुलतान यांची तुलना छत्रपती शिवाजी महाराज यांच्याशी केल्याचा आरोप झाल्यानंतर पुण्यात राजकीय वातावरण चांगलंच तापलं. या वक्तव्यानंतर भाजपने तीव्र प्रतिक्रिया देत मध्यरात्री शिवाजीनगर पोलीस ठाण्यात धाव घेतली. भाजप शहराध्यक्ष धीरज घाटे यांच्या तक्रारीनंतर भाजप कार्यकर्त्यांनी ठिय्या आंदोलन सुरू केलं. यामध्ये दुष्यंत मोहळ धिराज घाटे, नवनिर्वाचित महापौर मंजुषा नागपुरे यांच्यासह अनेक भाजप पदाधिकारी सहभागी झाले होते.

माझ्या वक्तव्याची मोडतोड करून “ध” चा “मा” करून देवेंद्र फडणविसांना राज्यात दंगली घडवायच्या आहेत असे मी सांगितले होते, त्याचा प्रत्यय आज पुण्यात आला.

पुण्यातील भाजपचे गुंड पुणे काँग्रेसच्या कार्यालयावर चाल करून आले व त्यांनी पोलिसांच्या उपस्थितीत दगडफेक करत काँग्रेसच्या महिला…

— Harshwardhan Sapkal (@INCHarshsapkal) February 15, 2026

इट का जवाब हम पत्थर से देंगे – भाजप

दरम्यान, “इट का जवाब हम पत्थर से देंगे” अशा घोषणांनंतर काँग्रेसचे युवा कार्यकर्तेही आक्रमक झाले. क्षणातच आंदोलनाचं रूपांतर हाणामारी आणि दगडफेकीत झालं. या गोंधळात काँग्रेस आणि भाजपचे अनेक कार्यकर्ते जखमी झाले, तर काही पत्रकारांनाही मारहाणीचा फटका बसला. भाजप कार्यकर्ते शिवाजीनगर पोलीस ठाण्याबाहेर ठिय्या आंदोलन करत असतानाच, काँग्रेस कार्यकर्त्यांनी विश्रामबाग पोलीस ठाण्यात ठिय्या आंदोलन सुरू केलं. “जोपर्यंत एकमेकांविरोधात गुन्हे दाखल होत नाहीत, तोपर्यंत आंदोलन मागे घेतलं जाणार नाही,” अशी भूमिका दोन्ही पक्षांनी घेतली. परिस्थिती नियंत्रणात आणण्यासाठी पोलीस उपायुक्त रंजनकुमार शर्मा यांनी घटनास्थळी भेट देत कार्यकर्त्यांची समजूत घालण्याचा प्रयत्न केला.

आता खरा प्रश्न असा आहे की –

– काँग्रेस शहराध्यक्ष सपकाळ यांच्यावर गुन्हा दाखल होणार का?
– भाजप शहराध्यक्ष धीरज घाटे यांच्यावरही कारवाई होणार का?
– आणि या दगडफेकीप्रकरणी नेमकी जबाबदारी कोणाची ठरणार?
या सर्व प्रश्नांची उत्तरं सध्या तरी गुलदस्त्यात असून, पुणे पोलिसांच्या पुढील कारवाईकडे सर्वांचं लक्ष लागलं आहे.