NEET Paper Leak Case | नीट पेपरफुटी प्रकरणामुळे (NEET Paper Leak Case) सगळीकडे एकच खळबळ उडाली आहे. कारण या प्रकरणात महाराष्ट्रात सर्वात मोठी आणि प्रसिद्ध असलेली नीट-जेईई कोचिंगच्या संस्थेचे मालक शिवराज मोटेगावकर (Shivraj Motegaonkar) यांना पोलिसांनी बेड्या ठोकल्या आहेत. तसेच सध्या मोटेगावकरांची कसून चौकशी केली जात आहे. तर शिवराज मोटेगावकरांच्या अटकेनंतर चौकशीच्या फेऱ्यात अडकलेल्या त्यांच्या आरसीसी इन्स्टिट्यूट (RCC Institute) या कोचिंग संस्थेबाबत एक धक्कादायक खुलासा झाला आहे.

हेही वाचा – मुंबईत मोठी कारवाई! तीन-चार मजली झोपड्यांवर फिरवला बुलडोझर, वांद्रे स्टेशनबाहेर मोठा पोलीस बंदोबस्त

सीबीआय तपासात मोटेगावकरांबाबत नेमका काय झाला खुलासा?

नीट पेपरफुटी प्रकरणातील आरोपी शिवराज मोटेगावकर हे लाखोंचे व्यवहार करत असल्याची माहिती समोर आली आहे. ते पेपरफुटीचा व्यवसाय पूर्णपणे व्यावसायिक पद्धतीने चालवत होते, असं तपासात उघड झालं आहे. आधी काम होऊ द्या मग पैसे द्या असं म्हणत मोटेगावकर लोकांकडून पैसे घेत व्यवहार करत होते. या व्यवहारांमध्ये 30 लाख रुपयांपर्यंतच्या रकमेचा समावेश आढळला आहे. तसेच काही डॉक्टर आणि पालक मोटेगावकरांना कोरा चेक देत होते अशी माहिती समोर आली आहे.

सीबीआय तपासात समोर आलेल्या माहितीनुसार, लातूरमधील आरसीसी इन्स्टिट्यूट सगळ्यात आधी शैक्षणिक पात्रतेनुसार विद्यार्थ्यांची निवड करते. त्यानंतर विद्यार्थ्यांच्या पालकांशी संपर्क साधला जातो. मग पालकांना त्यांच्या मुलांच्या निवडीची हमी दिली जाते. तसेच परीक्षा संपल्यानंतर आणि संस्थेने प्रश्नपेढी वापरल्याची खात्री झाल्यानंतरच पैसे घेतले जात होते. त्यापूर्वी पालक संस्थेला टोकन रक्कम देत होते, अशी धक्कादायक माहितीही उघड झाली आहे.

लातूरच्या एका अधिकाऱ्याने सांगितले की, या RCC संस्थेत अनेक डॉक्टरांची मुले शिकतात. तसेच आपल्या मुलांनी डॉक्टर व्हावं अशी त्यांच्या पालकांची इच्छा असून त्यासाठी ते कोणतीही रक्कम देण्यास तयार होतात. त्यामुळे आता या संस्थेत आपल्या मुलांसाठी कागदपत्रे विकत घेतलेले अनेक डॉक्टर तपास यंत्रणांच्या रडारवर आहेत.