Manoj Jarange Patil : एकानं वाद पेटवायचा आणि दुसऱ्यानं तो आणखी वाढवायचा, अशीच अवस्था सध्या आरक्षणासाठी भांडणाऱ्या नेत्यांची पाहायला मिळतेय आणि ओबीसी आणि मराठ्यांच्या भांडणात नेत्यांनी मजा बघायची, हेच राज्यभरात घडतेय, ओबीसी नेते नवनाथ वाघमारेंनी एक वक्तव्य केलं, त्यानंतर जरांगेंनी त्यावर पलटवार केला, आधी हाकेंची भाषणा घसरली आणि जरांगेंची भाषा तर तुम्हाला सांगायची गरजच नाही…वाघमारे विरुद्ध जरांगे वादाचा हा एपिसोड पाहूयात…
वाघमारे मराठा मुलींवर बोलले; जरांगेंचा पलटवार ( Manoj Jarange Patil )
ओबीसी नेते नवनाथ वाघमारे यांनी मराठा समाजातील महिलांबद्दल अत्यंत खालच्या पातळीवर जाऊन केलेले वक्तव्य सध्या संपूर्ण महाराष्ट्रात तीव्र संतापाचा केंद्रबिंदू ठरले आहे. या वक्तव्याचे गंभीर पडसाद उमटत असून मराठा आरक्षणाचे मुख्य आंदोलक मनोज जरांगे पाटील यांनी यावर अत्यंत आक्रमक शब्दांत पलटवार केला आहे. नवनाथ वाघमारे यांनी मर्यादा ओलांडून जे विधान केले, ते मराठा समाजातील कोणत्याही व्यक्तीला किंवा माता-भगिनींना सहन होण्यासारखे नाही, असे सांगत जरांगे पाटील यांनी वाघमारेंना थेट शब्दांत सुनावले आहे की ते आता अत्यंत खालच्या थराला गेले आहेत आणि मराठ्यांची पोरं त्यांना आता अजिबात सोडणार नाहीत. या विधानानंतर राज्यातील वातावरण कमालीचे तापले असून ठिकठिकाणी वाघमारे यांच्या विरोधात मराठा समाज आणि विशेषतः महिला वर्ग रस्त्यावर उतरल्याचे पाहायला मिळत आहे.
Navnath Waghmare : हा संपूर्ण वाद नवनाथ वाघमारे यांच्या एका जाहीर विधानानंतर सुरू झाला, ज्यामध्ये त्यांनी ओबीसी नेते किंवा मंत्र्यांची संपत्ती आणि त्यांच्या मुलांची श्रीमंती पाहून मराठा मुली त्यांच्या घरात घुसतात, अशा आशयाचे अत्यंत आक्षेपार्ह आणि मानहानीकारक विधान केले होते. या विधानामुळे केवळ मराठा समाजच नव्हे, तर सर्वसामान्य नागरिकांमधूनही वाघमारे यांच्या मानसिकतेवर आणि राजकीय पातळीवर तीव्र चीड व्यक्त केली जात आहे.
मनोज जरांगे पाटील यांनी या विधानाचा समाचार घेताना स्पष्ट केले की, आरक्षणाची लढाई ही हक्काची लढाई आहे आणि ती विचाराने किंवा कायद्याच्या चौकटीत लढली पाहिजे. परंतु, वैचारिक पातळीवर उत्तर देता येत नसल्यामुळे समोरचा गट आता थेट घरातील महिलांना आणि मुलींना लक्ष्य करत आहे, जे अत्यंत निंदनीय आहे. जरांगे पाटील यांनी इशारा देताना म्हटले की, मराठा समाजाने आजवर अनेक आंदोलने अत्यंत शांततेत आणि संयमाने केली आहेत, मात्र जर कोणी समाजाच्या अस्मितेवर आणि महिलांच्या सन्मानावर अशा प्रकारे चिखलफेक करणार असेल, तर तरुण शांत बसणार नाहीत.
हेही वाचा : मराठा मुली, पैसा आणि गोंडस ओबीसी मुलं पाहून घरात घुसतात, वाघमारेंच्या वक्तव्यानं वाद!
नवनाथ वाघमारे यांच्या वक्तव्याने महाराष्ट्रात वाद ( Navnath Waghmare )
या घटनेचे पडसाद केवळ सोशल मीडिया किंवा राजकीय वर्तुळापुरते मर्यादित राहिलेले नाहीत, तर महाराष्ट्रातील विविध जिल्ह्यांमध्ये प्रत्यक्ष जमिनीवर त्याचे तीव्र पडसाद उमटताना दिसत आहेत. नांदेड, सोलापूर, माढा, पुणे आणि छत्रपती संभाजीनगर यांसारख्या प्रमुख भागांमध्ये सकल मराठा समाजाच्या वतीने आणि महिला आंदोलकांकडून वाघमारे यांच्या प्रतिमेला जोडे मारो आंदोलने करण्यात आली आहेत. नांदेडमध्ये तर महिलांनी एक मोठा आणि आक्रमक मोर्चा काढून प्रशासनाला निवेदन दिले आहे. या आंदोलक महिलांनी अत्यंत संतप्त भावना व्यक्त करताना म्हटले आहे की, जर नवनाथ वाघमारे आमच्या समोर आले, तर त्यांच्या तोंडाला काळे फासल्याशिवाय आणि त्यांना धडा शिकवल्याशिवाय आम्ही राहणार नाही. कोणत्याही राजकीय नेत्याला किंवा आंदोलकाला आपल्या स्वार्थासाठी महिलांचा असा अपमान करण्याचा अधिकार नाही, अशी आक्रमक भूमिका महिलांनी घेतली आहे.
राज्यातील कायदा आणि सुव्यवस्थेचा प्रश्न निर्माण होऊ नये म्हणून अनेक ठिकाणी पोलीस प्रशासनाकडे नवनाथ वाघमारे यांच्या विरोधात कडक कायदेशीर कारवाई करण्याची आणि त्यांच्यावर गुन्हा दाखल करण्याची मागणी करण्यात येत आहे. सोलापूर जिल्ह्यातील माढा येथे मराठा क्रांती मोर्चाच्या कार्यकर्त्यांनी पोलीस ठाण्यावर धडक देऊन वाघमारे यांच्या विरोधात घोषणाबाजी केली आणि त्यांच्या अटकेची मागणी केली. दुसरीकडे, या मुद्द्यावरून राजकीय वातावरणही चांगलेच तापले असून विविध पक्षांच्या महिला नेत्यांनी पक्षभेद विसरून वाघमारे यांच्या या विधानाचा निषेध केला आहे. जातीय राजकारण किंवा आरक्षणाचा वाद हा कितीही टोकाचा असला, तरी त्यात महिलांना ओढणे ही महाराष्ट्राच्या संस्कृतीला आणि परंपरेला धरून नाही. वाघमारे यांनी हे वक्तव्य करून स्वतःची आणि त्यांच्या विचारसरणीची पातळी दाखवून दिली आहे.
वाघमारे यांच्या विरोधात विविध ठिकाणी आंदोलन; कारवाईची मागणी ( Maratha OBC controversy )
मराठा आरक्षण विरुद्ध ओबीसी आरक्षण हा वाद गेल्या अनेक महिन्यांपासून महाराष्ट्रात धगधगत आहे. दोन्ही बाजूंचे नेते आपापल्या समाजाची बाजू मांडण्यासाठी सातत्याने सभा, बैठका आणि आंदोलने करत आहेत. मात्र, या वैचारिक आणि कायदेशीर लढाईला आता वैयक्तिक आणि कौटुंबिक पातळीवर नेण्याचे काम अशा वादग्रस्त वक्तव्यांमुळे होत असल्याचा आरोप सर्वसामान्य नागरिक करत आहेत. जरांगे यांनी वाघमारे यांना दिलेला हा थेट जाहीर इशारा आगामी काळात या वादाला कोणते नवीन वळण देणार, याकडे सर्वांचे लक्ष लागले आहे. तुर्तास या वादग्रस्त वक्तव्यामुळे नवनाथ वाघमारे यांच्या अडचणीत मोठी वाढ झाली असून, संपूर्ण राज्यातून त्यांच्यावर कायदेशीर कारवाई करण्यासाठी दबाब वाढत आहे आणि मराठा समाज त्यांच्या या वक्तव्याचा पुरता हिशोब चुकता करण्याच्या पवित्र्यात दिसून येत आहे.
