Shweta Tiwari : उत्तर भारतीयांकडून प्रत्येक वेळी मराठी नेतेच टार्गेट का? मराठी संस्कृतीवर ज्ञान पाजळणाऱ्या श्वेता तिवारीला नेटकऱ्यांकडून खरमरीत सवाल केलाय, उत्तर भारतीय महाराष्ट्रात येतात, इथंलेच खातात, इथेच कमावतात, इथेच फेमस होतात, इथल्याच संस्कृतीवर शिंथोडे उडवतात आणि वरून मराठी नेत्यांना टार्गेट करतात, यावरून श्वेता तिवारीची फजिती सुरू झालीय, नेटकऱ्यांकडून जबरदस्त ट्रोलिग होतंय, श्वेता तिवारीच्या अगाऊपणामुळे आता नव्या वादाला तोंड फुटलंय, एक फ्लॉप हिरोईन आता मराठी माणसांना संस्कृती शिकवणार का? असा खरमरीत सवाल आता नेटकरी श्वेताला विचारु लागलेत, त्यामुळे आधी अगाऊपणे थेट राज ठाकरेंपर्यंत पोस्ट करणाऱ्या श्वेताची आता पंचाईत झालीय.
श्वेता तिवारीच्या सोशल मीडिया पोस्टवरून महाराष्ट्रात चर्चेला उधाण ( Shweta Tiwari )
अभिनेत्री श्वेता तिवारी हिने केलेल्या एका सोशल मीडिया पोस्टमुळे महाराष्ट्रात सध्या मोठा संताप व्यक्त केला जात आहे. कोणत्याही संवेदनशील विषयाची पार्श्वभूमी न तपासता किंवा त्यामागील मूळ कारणांचा शोध न घेता, थेट महाराष्ट्रातील एका मोठ्या नेत्याला आणि पर्यायाने संपूर्ण मराठी संस्कृतीलाच टार्गेट करण्याच्या तिच्या या अगाऊपणामुळे नेटकऱ्यांनी तिला जोरदार धारेवर धरले आहे. या वादाची सुरुवात श्वेता तिवारीला सोशल मीडियावर आलेल्या काही आक्षेपार्ह कमेंट्सवरून झाली. डिजिटल माध्यमांवर महिलांना ट्रोल करणे किंवा त्यांच्याबद्दल अपशब्दांचा वापर करणे ही नक्कीच निंदनीय बाब आहे आणि त्याविरोधात कायदेशीर कायदे आणि यंत्रणा देशात कार्यरत आहेत.
मात्र, श्वेता तिवारीने या वैयक्तिक ट्रोलिंगचा बदला घेण्यासाठी संपूर्ण मराठी अस्मितेला आणि थेट महाराष्ट्र नवनिर्माण सेनेचे अध्यक्ष राज ठाकरे यांनाच टार्गेट केले. तिच्या प्रोफाईलवर कमेंट करणाऱ्या काही युजर्सच्या बायोमध्ये ‘मराठी’ किंवा ‘मनसे समर्थक’ असे लिहिलेले पाहून तिने कोणताही विचार न करता थेट राज ठाकरेंना टॅग केले. “जर असे लोक तुमचे समर्थक असतील, तर त्यांचे हे वर्तन तुम्हाला मान्य आहे का?” असा आक्रमक सवाल तिने उपस्थित केला. श्वेता एवढ्यावरच थांबली नाही, तर तिने पुढे जाऊन ‘मराठी संस्कृती ही महिलांचा आदर करणारी संस्कृती आहे असे मी मानत होते, पण आता मराठी माणूस असण्याचा हाच अर्थ उरला आहे का?’ असे म्हणत थेट मराठी माणसांच्या संस्कारांवर आणि संस्कृतीवरच प्रश्नचिन्ह उपस्थित केले.
हेही वाचा : राहुल गांधींच्या पुणे दौऱ्यावरून राजकारण तापलं; भाजपा-काँग्रेस आमनेसामने
श्वेता तिवारीच्या पोस्टवर नेटकऱ्यांच्या संतप्त प्रतिक्रिया ( Raj Thackeray )
तिच्या याच विधानामुळे महाराष्ट्रातील तमाम नेटकरी आणि मराठी जनता कमालीची संतप्त झाली आहे. सोशल मीडियावरील युजर्सनी विचारले आहे की, जर एखाद्या अज्ञात व्यक्तीने इंटरनेटवर चुकीची कमेंट केली, तर त्यासाठी थेट राज ठाकरे किंवा संपूर्ण मराठी समाज कसा काय जबाबदार असू शकतो? आजच्या डिजिटल युगात कोणीही कोणत्याही नावाने, कोणत्याही राजकीय नेत्याचा फोटो लावून फेक किंवा बनावट अकाउंट तयार करू शकते. अशा अकाउंट्सची सत्यता न तपासता, केवळ स्वतःला प्रसिद्धीच्या झोतात ठेवण्यासाठी किंवा पीडित दाखवण्यासाठी थेट एका मोठ्या राजकीय नेत्याला आणि राज्याच्या संस्कृतीला गोवणे हा श्वेता तिवारीचा निव्वळ अगाऊपणा आणि प्रसिद्धीचा स्टंट असल्याचा घणाघात नेटकऱ्यांनी केला आहे.
Shweta Tiwari trolling : या प्रकरणावरून महाराष्ट्रात पुन्हा एकदा ‘बाहेरून येणारे कलाकार आणि त्यांची इथल्या मातीबद्दलची कृतघ्नता’ हा विषय ऐरणीवर आला आहे. नेटकऱ्यांनी श्वेताला तिच्या भूतकाळातील फ्लॉप कारकिर्दीची आठवण करून देत, तिला ‘फ्लॉप हिरोईन’ म्हणून हिणवले आहे. ‘मुंबई आणि महाराष्ट्राने आजपर्यंत अनेक राज्यांतील कलाकारांना डोक्यावर घेतले, त्यांना रोजगार दिला, अफाट प्रेम दिले आणि स्टार बनवले. श्वेता तिवारीचे बालपण आणि तिची संपूर्ण कारकीर्दही याच महाराष्ट्रात घडली. इथलेच खाऊन, इथल्याच प्रेक्षकांच्या बळावर प्रसिद्धीच्या शिखरावर पोहोचल्यानंतर, आता हीच अभिनेत्री मराठी माणसांना आणि संस्कृतीला ज्ञान पाजळणार का?’ असा जळजळीत सवाल सोशल मीडियावर विचारला जात आहे.
श्वेता तिवारीच्या भूमिकेवरून नव्या वादाला तोंड ( Shweta Tiwari )
नेटकऱ्यांच्या या जबरदस्त ट्रोलिंगमुळे आणि प्रतिहल्ल्यामुळे श्वेता तिवारीची सध्या मोठी पंचाईत झाली आहे. थेट राज ठाकरेंपर्यंत पोस्ट करून स्वतःला शहाणी समजणाऱ्या श्वेताला आता मराठी मन काय असते आणि संस्कृतीवर शिंतोडे उडवल्यास त्याचे काय परिणाम होतात, याची जाणीव झाली आहे. सोशल मीडियावर युजर्सनी म्हटले आहे की, जर तिला खरोखरच ट्रोलिंगचा त्रास होत होता, तर तिने सायबर पोलिसांत तक्रार करायला हवी होती, जी एक सुजाण नागरिकाची भूमिका असते. मात्र, तसे न करता थेट मराठी नेत्यांना आणि संस्कृतीला टार्गेट करण्याच्या नादात श्वेता स्वतःच एका मोठ्या वादाच्या भोवऱ्यात अडकली आहे. या प्रकरणावरून आता सोशल मीडियावर ‘बॉयकॉट’च्या मोहिमा देखील सुरू होण्याची शक्यता वर्तवली जात असून, श्वेता तिवारीच्या या बेजबाबदार वक्तव्यामुळे तिच्या अडचणीत आगामी काळात आणखी वाढ होण्याची चिन्हे दिसत आहेत.
