एर्नाकुलम (केरळ) : केनियाचे माजी पंतप्रधान रैला ओडिंगा यांचं बुधवार, 15 ऑक्टोबर 2025 रोजी सकाळी केरळच्या एर्नाकुलममधील कुथट्टुकुलम इथं हृदयविकाराच्या झटक्यानं निधन झालं. 80 वर्षीय ओडिंगा आयुर्वेदिक उपचारांसाठी केरळला आले होते. त्यांची प्रकृती अचानक बिघडली आणि त्यांना जवळच्या रुग्णायलात नेण्यात आलं, परंतु त्यांचे प्राण वाचू शकले नाही. माजी पंतप्रधानांचं पार्थिव कुथट्टुकुलम येथील देवा मठ रुग्णालयात ठेवण्यात आलं आहे.
कसं झालं निधन :
ओडिंगा सहा दिवसांपूर्वी त्यांच्या मुली आणि जवळच्या कुटुंबातील सदस्यांसह कुथट्टुकुलम इथं आले होते. ते त्यांच्या नियमित तपासणीसाठी आणि त्यांच्या नियमित मॉर्निंग वॉकसाठी रुग्णालयात जात होते. स्थानिक अधिकाऱ्यांच्या म्हणण्यानुसार, सकाळी 6:30 च्या सुमारास चालत असताना त्यांना हृदयविकाराचा झटका आला. त्यांना गंभीर अवस्थेत रुग्णालयात दाखल करण्यात आलं. ओडिंगा हे चार दशकांहून अधिक काळ केनियाच्या राजकारणातील एक प्रमुख व्यक्ती होते.
PM Modi (@narendramodi) posts, “Deeply saddened by the passing of my dear friend and former Prime Minister of Kenya, Mr. Raila Odinga. He was a towering statesman and a cherished friend of India. I had the privilege of knowing him closely since my days as Chief Minister of… pic.twitter.com/THDIGSsQEO
— Press Trust of India (@PTI_News) October 15, 2025
केनियाच्या राजकारणातील एक प्रमुख व्यक्ती :
केनियाच्या राजकारणातील एक प्रमुख व्यक्ती असलेले ओडिंगा 2008 ते 2013 पर्यंत देशाचे पंतप्रधान होते. ते त्यांच्या ज्वलंत भाषणांसाठी आणि तळागाळातील सहभागासाठी ओळखले जात होते. आधुनिक केनियाच्या लोकशाहीला आकार देण्यात त्यांनी मोठी भूमिका बजावली. 2007-2008 च्या निवडणुकीत केनियातील हिंसाचार संपुष्टात आल्यानं झालेल्या सत्ता वाटप करारात ओडिंगा यांनी महत्त्वाची भूमिका बजावली. ते संवाद आणि सुधारणांचं समर्थन करणारे राष्ट्रीय नेते म्हणून उदयास आले.
हे हि वाचा : नेपाळनंतर आता हिंदी महासागरातील ‘या’ देशात Gen-Z आंदोलन; राष्ट्रपती देश सोडून पळाले
दूतावासाला देण्यात आली माहिती :
ओडिंगा हे दीर्घकाळ विरोधी पक्षनेते आणि ऑरेंज डेमोक्रॅटिक चळवळीचे प्रमुख होते. त्यांनी अनेक राष्ट्रपती पदाच्या निवडणुका लढवल्या. त्यांना केनियातील सर्वात प्रमुख राजकीय व्यक्तींपैकी एक मानलं जातं. ओडिंगा यांची कारकीर्द भयंकर राजकीय संघर्षांनी आणि अधिक समावेशक राजकीय व्यवस्था निर्माण करण्याच्या प्रयत्नांनी भरलेली होती. नवी दिल्लीतील केनियाच्या दूतावासातील अधिकाऱ्यांना ओडिंगा यांच्या निधनाची माहिती देण्यात आली आहे. केरळ सरकार आणि रुग्णालयातील अधिकारी त्यांचे पार्थिव केनियाला पाठवण्यासाठी दूतावासाशी समन्वय साधत आहेत. स्थानिक नेते आणि केनियाच्या प्रवासी समुदायाच्या सदस्यांनी त्यांच्या निधनाबद्दल शोक व्यक्त केला आहे.
