Sensex Junps 919 Points : जागतिक संकेतांनुसार, आठवड्याच्या शेवटच्या सत्रात देशांतर्गत शेअर बाजार लक्षणीय वाढीसह बंद झाला. बीएसई सेन्सेक्स अखेर 918.60 अंकांनी वाढून 77,550.25 वर बंद झाला, तर एनएसई निफ्टी देखील मागील सत्रापेक्षा 275.50 अंकांनी वाढून 24,050.60 वर बंद झाला. क्षेत्रनिहाय पाहिल्यास ऑटो, कॅपिटल गुड्स, कंझ्युमर ड्युरेबल्स, रिअल्टी, पॉवर, एफएमसीजी, पीएसयू बँका, मेटल्स आणि खाजगी बँका यांनी 1 ते 2 टक्क्यांची वाढ नोंदवली, तर आयटी निर्देशांक 1.7 टक्क्यानं घसरला.

हेही वाचा : भारतातील सर्वात वयस्कर क्रिकेटपटूचं निधन; टीम इंडियाच्या पहिल्या विजयात होतं

निफ्टीमधील प्रमुख वाढलेले शेअर्स :

निफ्टी मिडकॅप आणि स्मॉलकॅप निर्देशांकांनी देखील प्रत्येकी 1.5 टक्क्यांची वाढ नोंदवली. निफ्टीमधील प्रमुख वाढलेल्या शेअर्समध्ये एशियन पेंट्स, आयशर मोटर्स, आयसीआयसीआय बँक, बजाज ऑटो आणि श्रीराम फायनान्स यांचा समावेश होता. दरम्यान, घसरलेल्या शेअर्समध्ये कोल इंडिया, सन फार्मा, इन्फोसिस, टीसीएस आणि टेक महिंद्रा यांचा समावेश होता.

रुपया 17 पैशांनी घसरला :

भारतीय रुपया शुक्रवारी आपली सुरुवातीची ताकद टिकवण्यात अयशस्वी ठरला आणि अमेरिकन डॉलरच्या तुलनेत 17 पैशांनी घसरुन 92.68 (तात्पुरता) वर बंद झाला. वाढत्या जागतिक तणावामुळं, विशेषतः अमेरिका-इराण संघर्षाशी संबंधित धोक्यांमुळं रुपयावर दबाव कायम राहिला. दिवसभर परकीय चलन बाजारात तीव्र चढ-उतार दिसून आले, ज्यामुळं गुंतवणूकदारांची सावधगिरी वाढली. परकीय चलन व्यापाऱ्यांच्या मते, या अस्थिरतेमागे भारतीय रिझर्व्ह बँकेचा निर्देश हे एक प्रमुख कारण होतं, ज्यामध्ये बँकांना त्यांची रात्रभराची स्थिती (ओव्हरनाइट पोझिशन्स) 100 दशलक्ष डॉलर्सपर्यंत मर्यादित ठेवण्यास सांगितलं होतं. या निर्देशांची अंतिम मुदत शुक्रवारी संपली, ज्यामुळं बाजारातील अस्थिरता आणखी वाढली.

आंतरबँक परकीय चलन बाजारात रुपया 92.58 वर उघडला. मात्र, दिवसभरात त्यावर दबाव आला आणि तो घसरुन 92.76 च्या नीचांकी पातळीवर पोहोचला. व्यवहारादरम्यान त्यानं 92.41 चा उच्चांकही गाठला. अखेरीस, रुपया आदल्या दिवसाच्या बंद भावापेक्षा 17 पैशांनी घसरुन 92.68 अंकांवर बंद झाला.