चेन्नई BJP Manifesto : भाजपानं मंगळवारी तामिळनाडू विधानसभा निवडणुकीसाठी (Tamil Nadu Assembly Election) आपला जाहीरनामा प्रसिद्ध केला. या कार्यक्रमाला केंद्रीय मंत्री जेपी नड्डा, तामिळनाडू भाजपाचे अध्यक्ष नैनार नागेंद्रन आणि भाजपा नेते के. अण्णामलाई व तामिळसाई सौंदरराजन उपस्थित होते. याप्रसंगी बोलताना नड्डा म्हणाले की, तामिळ नववर्षाच्या निमित्तानं विधानसभा निवडणुकीसाठी पक्षाचा जाहीरनामा प्रसिद्ध करण्याचा निर्णय घेऊन भाजपानं एक चांगलं पाऊल उचललं आहे.

हेही वाचा : बिहारमध्ये नितीश युगाचा अंत! नितीश कुमारांचा मुख्यमंत्रीपदाचा राजीनामा, पोस्ट करत

भाजपाच्या जाहीरनाम्यात कोणत्या घोषणा आहेत?

• जाहीरनाम्यात कल्याणकारी योजनांची घोषणा करताना, भाजपानं महिला कुटुंबप्रमुखांना दरमहा ₹2,000 आणि वर्षाला तीन मोफत एलपीजी सिलिंडर (free lpg cylinders) देण्याचं आश्वासन दिलं आहे.
• करवाढ आणि वाढत्या महागाईची भरपाई करण्यासाठी प्रत्येक कुटुंबाला ₹10,000 ची एकरकमी देणगी देण्याचं आश्वासनही भाजपानं दिलं आहे.
• या जाहीरनाम्यात पात्र महिलांना ई-स्कूटर खरेदी करण्यासाठी ₹25,000 च्या अनुदानाचाही समावेश आहे.
• जल्लीकट्टू बैलपालकांना ₹2,000 ची मासिक मदत आणि सहभागीच्या मृत्यूनंतर ₹10 लाखांची सानुग्रह मदत देण्याचा प्रस्तावही मांडण्यात आला आहे.
• पक्षानं प्रथमच घर खरेदी करणाऱ्या महिलांसाठी 3% मुद्रांक शुल्कात सूट जाहीर केली.
• ₹10,000 ची एक-वेळची घरगुती मदत योजना आणि घरगुती वस्तूंसाठी ₹8,000 किमतीचं कूपन यांसारख्या अनेक सहाय्यक उपाययोजनांची घोषणाही करण्यात आली.
• पक्षानं प्रमुख मंदिरांमध्ये स्थानिक रहिवाशांसाठी दररोज दोन तासांचा दर्शनाचा वेळ राखीव ठेवण्याचा आणि तिरुप्परनकुंद्रम टेकडीच्या माथ्यावर दिवे लावण्याच्या कार्तिक दीपम विधी सुरु ठेवण्याचा प्रस्तावही मांडला.

डीएमके सरकारवर टीका :

शासन आणि कायदा व सुव्यवस्थेच्या मुद्द्यावर, जेपी नड्डा यांनी तामिळनाडूमध्ये अमली पदार्थांशी संबंधित गुन्ह्यांमध्ये 51% वाढ झाल्याचा आरोप करत डीएमके सरकारवर हल्ला चढवला. ढासळत्या कायदा आणि सुव्यवस्थेसोबतच, त्यांनी डीएमकेवर भ्रष्टाचार आणि घराणेशाहीचा आरोप केला. ‘नोकरीसाठी पैसे’ आणि निविदांशी संबंधित अनियमितता यांसारख्या कथित घोटाळ्यांमध्ये त्यांनी डीएमकेच्या अनेक नेत्यांची नावे घेतली आणि सत्ताधारी पक्षाला भ्रष्टाचाराचे संरक्षक म्हटलं.