मुंबई Gold Price : अक्षय्य तृतीयेच्या केवळ एक दिवस आधी सोन्याचे भाव स्वस्त झाल्यानं, सोने खरेदी करु इच्छिणाऱ्यांसाठी आनंदाची बातमी आहे. या सणापूर्वी सोन्याचे भाव सहसा वाढतात, पण यावेळी बाजारात उलटफेर दिसून आला आहे. देशभरातील अनेक प्रमुख शहरांमध्ये सोन्याचे भाव घसरले आहेत, तर चांदीही स्वस्त झाली आहे.

हेही वाचा : ठाणे-डोंबिवली दरम्यान 10 तास लोकल ट्रेन धावणार नाही; मध्य रेल्वेनं दिली माहिती

दिल्ली-मुंबई ते चेन्नईपर्यंत भावात घट :

18 एप्रिलला, दिल्लीत 24-कॅरेट सोन्याचा भाव प्रति 10 ग्रॅम ₹1,54,340 होता. मुंबई, कोलकाता, पुणे आणि बंगळूरुमध्येही भाव सुमारे ₹1,54,190 च्या आसपास होता. चेन्नईमध्ये 24-कॅरेट सोन्याचा भाव प्रति 10 ग्रॅम ₹1,55,010 नोंदवला गेला. दिल्लीत 22-कॅरेट सोन्याचा भाव ₹1,41,490 आणि मुंबई-कोलकातामध्ये प्रति 10 ग्रॅम ₹1,41,340 वर पोहोचला. दरम्यान, दिल्लीत 18-कॅरेट सोन्याचा भाव प्रति 10 ग्रॅम अंदाजे ₹1,15,755 वर पोहोचला आहे, तर मुंबई आणि कोलकातामध्ये तो प्रति 10 ग्रॅम अंदाजे ₹1,15,642 वर पोहोचला आहे.

एका दिवसात लक्षणीय घसरण :

दिल्लीच्या सराफा बाजारात आदल्याच दिवशी सोन्याच्या दरात अंदाजे ₹1,600 ची घसरण झाली. त्याचप्रमाणे, चांदीच्या दरातही लक्षणीय घट झाली आहे. मागील सत्रात ₹5,700 नं घसरल्यानंतर, 18 एप्रिल रोजी चांदीचा भाव प्रति किलो अंदाजे ₹2,64,900 वर पोहोचला.

किमतींमध्ये घसरण का? :

तज्ज्ञांच्या मते, आंतरराष्ट्रीय बाजारात सोन्याच्या किमती नरम पडणं आणि भू-राजकीय तणावात थोडी शिथिलता येणे ही या घसरणीची मुख्य कारणं आहेत. इस्रायल-लेबनॉन शस्त्रसंधी आणि अमेरिका व इराण यांच्यातील सलोख्याच्या आशेनं गुंतवणूकदारांच्या भावना काही प्रमाणात शांत झाल्या आहेत. यामुळं सुरक्षित गुंतवणूक म्हणून सोन्याच्या मागणीत थोडी घट झाली आहे.

अक्षय्य तृतीयेला खरेदीदारांनी काय करावं? :

अक्षय्य तृतीयेला सोने खरेदी करणं शुभ मानलं जातं. त्यामुळं, भावातील ही घसरण खरेदीदारांसाठी एक चांगली संधी ठरु शकते. मात्र, बाजारातील चढ-उतार कायम राहू शकतात, म्हणून विचारपूर्वक गुंतवणूक करणं महत्त्वाचं आहे.