Pimpalner triple murder case : धुळे जिल्ह्यातील पिंपळनेर येथे लग्नसमारंभात साक्री येथील तिघांची निर्घृण हत्या झाल्याच्या घटनेनंतर साक्री शहरात तीव्र संतापाची लाट उसळली आहे. या पार्श्वभूमीवर पीडित कुटुंबांना तात्काळ आर्थिक मदत मिळावी तसेच कुटुंबातील एका सदस्यास शासकीय सेवेत सामावून घ्यावे, या मागणीसाठी आज हजारोंच्या संख्येने नागरिकांनी एकजूट दाखवत साक्री तहसील कार्यालयावर भव्य मोर्चा काढला.
19 फेब्रुवारी रोजी साक्री येथील तीन युवक पिंपळनेर येथे लग्नसमारंभासाठी गेले असता, सोनगड येथील काही युवकांनी देवेंद्र पवार, सुनील गिरी आणि साहिल गिरी यांच्यावर धारदार शस्त्राने हल्ला करून त्यांची निर्घृण हत्या केली. या घटनेत कोणताही संबंध नसताना देवेंद्र पवार यांचा नाहक बळी गेला असल्याचा आरोप करण्यात येत आहे.
घरातील कर्ता पुरुष गमावल्याने संबंधित कुटुंबांवर उपासमारीची वेळ
या दुर्दैवी घटनेमुळे साक्री तालुक्यासह संपूर्ण जिल्हा हादरून गेला असून कुटुंबातील कर्ता पुरुष गमावल्याने संबंधित कुटुंबांवर उपासमारीची वेळ आली आहे. पीडित कुटुंबांनी पुढील आयुष्य कसे जगायचे, हा मोठा प्रश्न त्यांच्या समोर उभा ठाकला आहे. याबाबत जिल्ह्याचे पालकमंत्री यांनी आपल्या स्तरावरून तात्काळ आर्थिक मदतीची घोषणा करावी आणि कुटुंबातील एका सदस्याला शासकीय नोकरी द्यावी, अशी मागणी निवेदनाद्वारे करण्यात आली. साक्री येथील अप्पर तहसीलदार पेंढारकर यांना निवेदन देण्यात आले. यावेळी मोठ्या संख्येने नागरिक उपस्थित होते.
