Buldhana Name Change: बुलढाणा जिल्ह्याला आता ‘राजमाता जिजाऊनगर’ अशी नवी ओळख मिळणार? श्वेता महाले यांच्या मागणीनंतर नामकरणाची चर्चा जोर धरू लागली आहे.

महाराष्ट्रातील (Maharashtra News) काही जिल्हे आणि शहरांच्या नामकरणानंतर बुलढाणा जिल्ह्याच्या नावबदलाची मागणीही पुढे आली आहे. यापूर्वी उस्मानाबादचे धाराशिव, तर औरंगाबादचे छत्रपती संभाजीनगर असे नामकरण करण्यात आले आहे. या पार्श्वभूमीवर बुलढाण्याचे नाव बदलण्याची मागणी आता राजकीय आणि सामाजिक पातळीवर चर्चेचा विषय ठरत आहे.

मुख्यमंत्र्यांनी प्रशासनाला कार्यवाहीचे निर्देश दिल्याने या प्रस्तावाबाबत पुढील काळात कोणते निर्णय घेतले जातात, याकडे जिल्हावासीयांचे लक्ष लागले आहे. मात्र अंतिम नामकरणासाठी आवश्यक असलेली प्रशासकीय प्रक्रिया आणि शासनाचा अंतिम निर्णय महत्त्वाचा ठरणार आहे.

हेही वाचा: कुणबी प्रमाणपत्रांवरून जरांगे पुन्हा आक्रमक; बावनकुळे-शिंदेंना थेट इशारा, नेमकं काय घडलं? 

बुलढाणा जिल्ह्याचे नाव बदलून ‘राजमाता जिजाऊनगर’ असे करण्याची मागणी

बुलढाणा जिल्ह्याचे नाव बदलून (Buldhana Name Change) ‘राजमाता जिजाऊनगर’ (Rajmata Jijau Nagar) असे करण्याची मागणी आता चर्चेत आली आहे. भाजपच्या आमदार श्वेता महाले (Shweta Mahale) यांनी मुख्यमंत्री देवेंद्र फडणवीस (Devendra Fadnavis) यांच्याकडे याबाबत औपचारित मागणी केली आहे. राजमाता जिजाऊंच्या (Rajmata Jijau) जन्मभूमीचा सन्मान म्हणून जिल्ह्याला त्यांचे नाव देण्यात यावे, अशी भूमिका त्यांनी मांडली आहे.

आमदार श्वेता महाले यांनी पाठवले मुख्यमंत्र्यांना पत्र

आमदार श्वेता महाले (Shweta Mahale) यांनी मुख्यमंत्र्यांना पत्र पाठवून बुलढाणा जिल्ह्याचे नामकरण ‘राजमाता जिजाऊनगर’ करण्याची विनंती केली. या मागणीची मुख्यमंत्री फडणवीस यांनी दखल घेत संबंधित प्रशासनाला पुढील कार्यवाही करण्याचे निर्देश दिल्याचे सांगण्यात येत आहे. त्यामुळे जिल्ह्याच्या नामकरणाचा प्रस्ताव आता प्रशासकीय प्रक्रियेकडे जाण्याची शक्यता आहे.

जिजाऊंच्या जन्मभूमीला नाव देण्याची मागणी

बुलढाणा जिल्ह्यातील सिंदखेड राजा (Sindkhed Raja) हे राजमाता जिजाऊसाहेबांचे (Rajmata Jijau) जन्मस्थान म्हणून ओळखले जाते. त्यामुळे त्यांच्या जन्मभूमीचा गौरव करण्यासाठी संपूर्ण जिल्ह्याला त्यांच्या नावाची ओळख मिळावी, अशी मागणी करण्यात आली आहे.

राजमाता जिजाऊ यांनी बाल शिवाजी महाराजांच्या व्यक्तिमत्त्वाच्या जडणघडणीत महत्त्वपूर्ण भूमिका बजावली. स्वराज्याची प्रेरणा आणि संस्कार देत त्यांनी छत्रपती शिवाजी महाराजांच्या विचारविश्वाला आकार दिला. त्यामुळे जिजाऊंच्या जन्मभूमीला त्यांच्या नावाने ओळख मिळणे ही महाराष्ट्राच्या दृष्टीने अभिमानाची बाब ठरेल, असा दावा या मागणीमागे करण्यात आला आहे.

ऐतिहासिक आणि नैसर्गिक वारशाने समृद्ध जिल्हा

बुलढाणा हा अमरावती विभागातील ऐतिहासिक महत्त्व असलेला जिल्हा आहे. जिल्ह्यात एकूण 13 तालुके असून सुमारे 9,640 चौरस किलोमीटर क्षेत्रफळाचा हा प्रदेश विविध भौगोलिक आणि सांस्कृतिक वैशिष्ट्यांनी समृद्ध आहे.

सिंदखेड राजा येथील राजमाता जिजाऊंचे जन्मस्थान, विविध धार्मिक व ऐतिहासिक स्थळे तसेच लोणार सरोवर यामुळे बुलढाणा जिल्ह्याला महाराष्ट्राच्या (Maharashtra News) पर्यटन नकाशावर विशेष स्थान आहे. उल्कापातामुळे तयार झालेल्या लोणार सरोवराचे भूवैज्ञानिक महत्त्वही मोठे आहे. आता ‘राजमाता जिजाऊनगर’ या नावाची मागणी प्रत्यक्षात येते का, याकडे जिल्ह्यासह संपूर्ण महाराष्ट्राचे लक्ष लागले आहे.