Ram Mandir Donation Theft Case : करोडो हिंदू भाविकांचे सर्वोच्च श्रद्धास्थान आणि भारताच्या सांस्कृतिक अस्मितेचे प्रतीक असलेल्या राम मंदिरातील चोरी प्रकरण सध्या चांगलेच चर्चेत आले आहे…भाजपचं सरकार ज्या ठिकाणी आहे, त्या उत्तर प्रदेशमध्ये मंदिरात चोरी झाली आहे…या राम मंदिराच्या मुद्द्यावरच भाजपने लोकसभेत आणि विविध राज्याच्या विधानसभा निवडणुकीत मतं मागितली होती…
पण आता याच राम मंदिरात चोरी झाल्याचे प्रकरण उघड आले आणि भाजप अडचणीत सापडले आहे….पण राम मंदिरात एकदाच नाही तर तब्बल 105 वेळा चोरी झाल्याची माहिती SIT तपासातून समोर आली आहे…यामुळे देशभरात एकच खळबळ उडाली आहे….पाहूयात की राम मंदिरात 105 वेळा चोरी कशी झाली…राम मंदिरात चोरी करणारे कोण आहेत…राम मंदिरातील चोरी प्रकरणामुळे 2027 मध्ये भाजप सत्तेवर येईल का?
CCTV फुटेज आणि डिजिटल पुराव्यांच्या तपासातून माहिती समोर ( Ram Mandir )
राम मंदिरातील देणगी प्रकरणावरून विरोधकांनी भाजपवर जोरदार हल्लाबोल केला आहे… राम मंदिरातील ( Ram Mandir ) अतिसुरक्षित मानल्या जाणाऱ्या देणगी मोजणी कक्षातून एकामागून एक तब्बल 105 वेळा देणगीची रोख रक्कम आणि मौल्यवान वस्तू गायब झाल्याचे SIT च्या सखोल चौकशीतून समोर आले आहे… या प्रकरणाची सुप्रीम कोर्टात सुनावणी सुरू असताना, देशाचे सॉलिसिटर जनरल तुषार मेहता यांनी एसआयटीच्या अत्यंत गुप्त आणि सविस्तर अहवालाचा दाखला देत या संपूर्ण चोरीच्या आकडेवारीला अधिकृत दुजोरा दिला… मंदिराच्या परिसरात आणि गाभाऱ्यात लावण्यात आलेल्या अत्यंत अत्याधुनिक आणि हायटेक सीसीटीव्ही कॅमेऱ्यांच्या फुटेजचे जेव्हा फॉरेन्सिक टीमकडून तपासण्यात आले, तेव्हा हा धक्कादायक प्रकार उघडकीस आला असून, या ऐतिहासिक दानचोरीमुळे राम मंदिर ट्रस्टच्या व्यवस्थापनावर, तिथल्या अंतर्गत देखरेखीवर आणि उत्तर प्रदेश प्रशासनाच्या कडक सुरक्षा यंत्रणेच्या कार्यपद्धतीवर आता देशभरातून अत्यंत गंभीर प्रश्नचिन्ह उपस्थित केले जात आहे….
सुप्रीम कोर्टात सादर करण्यात आलेल्या माहितीनुसार, SITने केवळ प्राथमिक माहितीच्या आधारावर हा निष्कर्ष काढलेला नसून, यासाठी गेल्या अनेक महिन्यांचे सीसीटीव्ही फुटेज, मंदिराच्या मोजणी कक्षातील कर्मचाऱ्यांची बायोमेट्रिक हजेरी, डिजिटल नोंदी आणि अनेक महत्त्वाच्या प्रत्यक्षदर्शी साक्षीदारांचे जबाब नोंदवून घेतले आहेत… या गुन्ह्याची कार्यपद्धती तपासली असता समोर आले आहे… मंदिरात दररोज जमा होणारे कोट्यवधी रुपयांचे दान मोजण्यासाठी नियुक्त करण्यात आलेल्या काही अंतर्गत कर्मचाऱ्यांनीच विश्वासघाताने हा कट रचला होता… रोज रात्री पैशांची मोजणी करत असताना, हे कर्मचारी सीसीटीव्ही कॅमेऱ्यांची नजर चुकवून अत्यंत हुशारीने नोटांचे बंडल आपल्या कपड्यांमध्ये, खिशांत आणि शूजमध्ये लपवून ठेवत असत आणि त्यानंतर ते मंदिराबाहेर काढून नेले जात असे, अशी माहिती समोर आली आहे…
SIT च्या अहवालात नेमकं काय नमूद आहे? ( Ram Mandir Donation Theft Case )
एका विशेष सॉफ्टवेअरच्या माध्यमातून मंदिरात येणाऱ्या सर्व मोठ्या देणग्या आणि मौल्यवान वस्तूंच्या डिजिटल पावत्या तयार केल्या जातात आणि त्यानंतर हा सर्व मौल्यवान ऐवज थेट स्टेट बँक ऑफ इंडियाच्या अतिसुरक्षित लॉकरमध्ये जमा केला जातो…. मात्र चोरांनी अंतर्गत यंत्रणेच्या संगनमताने तब्बल १०५ वेळा मंदिराच्या तिजोरीवर यशस्वीपणे डल्ला मारल्यामुळे या संपूर्ण व्यवस्थेतच मोठी अंतर्गत गळती होती, हे आता स्पष्ट झाले आहे… तपास यंत्रणेने या तांत्रिक पुराव्यांच्या आधारे आतापर्यंत आठ मुख्य संशयित आरोपींना अटक केली असून, यामध्ये राम जन्मभूमी तीर्थ क्षेत्र ट्रस्टचे माजी सरचिटणीस चंपत राय यांचा अनेक वर्षे जुना वैयक्तिक ड्रायव्हर टीनू यादव आणि काही बँक कर्मचाऱ्यांचा समावेश असल्याचे उघड झाल्याने या चोरीचे गांभीर्य आणि व्याप्ती कोट्यवधी रुपयांच्या घरात असल्याचे बोलले जात आहे…
हे प्रकरण उघड झाल्यानंतर नैतिक जबाबदारी स्वीकारत राम मंदिर ट्रस्टचे प्रमुख पदाधिकारी चंपत राय आणि अनिल मिश्रा यांनी आपल्या पदांचे तातडीने राजीनामे दिले आहेत.. तर मंदिराची संपूर्ण सुरक्षा व्यवस्था आणि प्रशासकीय नियंत्रण पूर्णपणे पारदर्शक व कडक करण्यासाठी केंद्र सरकारने भारतीय हवाई दलाचे निवृत्त एअर मार्शल जितेंद्र मिश्रा यांची राम मंदिर ट्रस्टच्या नवीन मुख्य कार्यकारी अधिकारी पदावर अधिकृतपणे नियुक्ती केली आहे… एअर मार्शल जितेंद्र मिश्रा यांनी आपल्या लष्करी कारकिर्दीत ‘ऑपरेशन सिंदूर’ दरम्यान हवाई दलाच्या अत्यंत महत्त्वाच्या पश्चिम कमांडचे नेतृत्व केले होते, त्यामुळे त्यांच्या लष्करी शिस्तीचा आणि कडक प्रशासकीय अनुभवाचा फायदा मंदिरातील गैरव्यवहार थांबवण्यासाठी होईल, अशी अपेक्षा प्रशासनाला आहे… त्यांच्या सोबतीनेच प्रशासकीय कामात मदत करण्यासाठी महेश भागचंदका, मदन मोहन पांडे आणि निर्मला यादव या तीन नवीन उच्चशिक्षित विश्वस्तांचीही ट्रस्टवर वर्णी लावण्यात आली असून, संपूर्ण कॅश काउंटिंग रूममध्ये आता मानवी हस्तक्षेपाऐवजी स्वयंचलित नोटा मोजणारी यंत्रे आणि कडक डिजिटल स्कॅनर बसवण्याची प्रक्रिया युद्धपातळीवर सुरू करण्यात आली आहे….
विरोधकांकडून व्यवस्थापनावर प्रश्न उपस्थित
या ऐतिहासिक आणि हायव्होल्टेज दानचोरीच्या प्रकरणाचे थेट पडसाद आगामी काळात उत्तर प्रदेशात होणाऱ्या अत्यंत चुरशीच्या सन 2027 च्या विधानसभा निवडणुकांवर पडणार असल्याचे राजकीय विश्लेषकांचे स्पष्ट मत आहे… मुख्यमंत्री योगी आदित्यनाथ यांच्यासाठी ही निवडणूक त्यांचे राजकीय अस्तित्व आणि राज्यातील पकड टिकवण्यासाठी अत्यंत महत्त्वाची मानली जात असताना, राम मंदिरातील हा सुरक्षेचा आणि भ्रष्टाचाराचा मुद्दा भाजपसाठी सर्वात मोठी डोकेदुखी आणि राजकीय अडचण ठरणार आहे… आतापर्यंत भाजप विरोधी पक्षांवर राम मंदिराला विरोध केल्याचा आरोप करत राजकारण करत आली होती… मात्र आता थेट मंदिराच्या आतूनच कोट्यवधी रुपयांचा अपहार झाल्याचे सर्वोच्च न्यायालयात सिद्ध झाल्यामुळे विरोधकांच्या हातात सत्ताधाऱ्यांविरोधात एक अत्यंत अमोघ आणि धारदार शस्त्र मिळाले आहे… आगामी निवडणुकीत समाजवादी पक्ष आणि काँग्रेस या मुद्द्याला थेट जनतेच्या दारात घेऊन जाणार असून, “रामाच्या नावावर मते मागणाऱ्यांनी रामाचाच निधी सुरक्षित ठेवला नाही” असा प्रचार केला जात असल्याने, भाजपचा पारंपरिक आणि हुकुमी मानला जाणारा हिंदुत्वाचा अजेंडा या एकाच मुद्द्यामुळे पूर्णपणे बॅकफूटवर जाण्याची आणि योगी सरकारची सत्तेतील वाटचाल बिकट होण्याची दाट शक्यता निर्माण झाली आहे…
